Mudyondzisi Wakwe U Yi Bumabumerile

◼ Xana vantshwa va nga xi kuma kwihi xitsundzuxo ni nkongomiso leswi nga swinene? Cheren wa le Italy la nga ni malembe ya 13, u tsakisiwe hi buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka. Wa ha ku pfulekeriwa hi nkarhi wo byela vadyondzi-kulobye hileswi a swi hlayaka eka yona.

U ri: “Ndzi endla gredi ya vunhungu, naswona etlilasini a hi ri karhi hi bula hi swiphiqo leswi vantshwa va langutanaka na swona. Siku rin’wana mudyondzisi wa mina u vulavule na mina a vula leswaku u twe leswaku tibuku ta hina ti pfuna vantshwa. U ndzi kombele leswaku ndzi n’wi kumela tibuku to karhi. Kutani ndzi n’wi nyike buku leyi nge Vantshwa Va Vutisa.

“Endzhaku ka masiku ma nga ri mangani u tirhise buku leyi, a bula ni swichudeni hinkwaswo hi ndzima 10, leyi nga ni nhloko-mhaka leyi nge ‘Swivumbeko I Swa Nkoka Ku Fikela Kwihi Ke?’ U tlhele a hi nyika ntirho lowu a hi fanele hi ya wu endla ekaya lowu sekeriweke eka xihloko lexi nge ‘Swivutiso Swo Vulavurisana,’ leswi nga emakumu ka ndzima. U te, ‘Buku leyi yi tsariwe kahle, kambe khombo ra kona hinkwenu a mi na yona.’

“Ndzi vule leswaku ndzi nga kumela un’wana ni un’wana loyi a yi lavaka buku leyi, naswona 16 ya vadyondzi-kulorhi va kombele leswaku ndzi va tela na tona. Loko ndzi ta na tona, hambi ku ri swichudeni leswi eku sunguleni a swi ku a swi ti lavi swi cince mianakanyo kutani swi ku na swona swa ti lava!”

Buku leyi nge Vantshwa Va Vutisa yi ni swihloko swo tanihi leswi nge “Ha Yini Ndzi Va Ni Gome Lerikulu?,” “Ndzi Swi Tivisa Ku Yini Loko Ri Ri Rirhandzu Ra Xiviri?,” “Ha Yini Ndzi Ku E-e Eka Swidzidzirisi Ke?” ni lexi nge “Xana Ndzi Nga Yi Lawurisa Ku Yini Mikhuva Ya Mina Yo Hlalela TV?” U nga ha kombela buku ya wena hi ku tata xiphephana lexi kutani u xi rhumela eka adirese leyi kombisiweke laha kumbe eka adirese leyi faneleke eka leti longoloxiweke eka tluka 5 ra magazini lowu.

□ Handle ka ku tiboha, ndzi kombela mi ndzi tisela buku leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.