U Hanyisiwe Hi “Buku Ya Khale Swinene”

◼ Mbhoni yin’wana ya Yehovha ya xisati ya le Brazil, le Amerika Dzonga, a yi ri karhi yi endzela vanhu emakaya ya vona loko yi hlangana ni wansati un’wana loyi a byeleke n’wingi wakwe leswaku u hanyisiwe hi buku. Hi ku hlamala, Mbhoni yi vutisile leswaku hi yihi buku ya kona. Wansati loyi u vule leswaku i “buku ya khale swinene,” hiloko a tisa buku leyi nge Buku Yanga Ya Timhaka Ta Bibele leyi hlakaleke ya n’wana wakwe wa mufana.

Wansati loyi u hlamusele leswaku n’wingi wakwe a a karhatiwa hi ntshikilelo wa mianakanyo naswona a a chava rifu ni ku va endhawini leyi nga ni munyama lerova a a nga suki emubedweni wakwe. N’wana wa wansati loyi wa mufana u kume buku leyi nge Buku Yanga Ya Timhaka Ta Bibele, naswona u sungule ku yi hlayela kokwana wakwe. Kokwana wa kona u sungule ku khutazeka ngopfu hileswi ntukulu wakwe a a n’wi hlayela swona lerova u kote ku hlula xiphiqo xa yena.

Mbhoni yoleyo yi ri: “Loko ndzi byele wansati loyi leswaku buku leyi yi kandziyisiwe hi Timbhoni ta Yehovha nileswaku ndzi nga n’wi tisela kopi leyintshwa, u ndzi kombele leswaku ndzi n’wi tisela tibuku tin’wana—yin’we ya n’wingi wakwe kasi leyin’wana ya yena n’wini. Loko ndzi tise tibuku leti, u kombele leswaku ndzi n’wi tisela tin’wana. Hi ku famba ka nkarhi, u kume tikopi ta 16 a ti nyika vanghana vakwe!”

U nga ha kombela kopi ya buku leyi, leyi nge Buku Yanga Ya Timhaka Ta Bibele, leyi nga ni tinhloko-mhaka ta 116 leti nga ni swifaniso swa vanhu ni swiendlakalo swa le Bibeleni. Eka malembe ya 30 lama hundzeke ku kandziyisiwe tibuku leti to tlula 72 wa timiliyoni. Leswaku u kuma kopi leyi, tata xiphephana lexi kutani u xi rhumela eka adirese leyi kombisiweke laha kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi tisela buku leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.