“I Yini Leswi U Nga Swi Endlaka Leswaku U Pona Loko Misava Leyi Yi Lovisiwa?”

◼ Xana Bibele yi vula yini loko yi vulavula hi makumu ya misava, kumbe mafambiselo yo homboloka ya swilo? Xana yi vulavula hi nyimpi ya misava hinkwayo ya nyutliya leyi nga ta lovisa vanhu hinkwavo? Kumbe yi vulavula hi xiendlakalo xa ntumbuluko, xo tanihi ku wa ka swiribyana swa le mpfhukeni? Lexi tsakisaka Bibele yi vula leswaku “ntshungu lowukulu” wa vanhu wu ta pona loko misava leyi yi lovisiwa. (Nhlavutelo 7:9, 10, 14) Xana ku ta va ku ri vamani? Xana u nga va un’wana wa vona?

Swivutiso swoleswo swa nkoka swi ta hlamuriwa hi nkulumo ya le rivaleni leyi nge “I Yini Leswi U Nga Swi Endlaka Leswaku U Pona Loko Misava Leyi Yi Lovisiwa?” Yi ta nyikeriwa emintsombanweni ya Timbhoni ta Yehovha leyi nge “TSHAMANI MI RINDZILE!” leyi nga ta khomiwa emisaveni hinkwayo naswona eAfrika Dzonga yi ta sungula loko lembe ra 2009 ri ya eku heleni. Wa rhambiwa leswaku u va kona eka ntsombano lowu nga ta khomiwa ekusuhi ni le ndhawini ya ka n’wina. Leswaku u kuma ndhawu leyi wu nga ta khomiwa kona ekusuhi ni laha u tshamaka kona, vulavurisana ni Timbhoni ta Yehovha ta le ndhawini ya ka n’wina kumbe u tsalela vakandziyisi va magazini lowu.