U Namarhele Tidyondzo Leti A A Pfumela Eka Tona

◼ Hi nkarhi wa tiholideyi ta Khisimusi leti nga hundza, tlilasi ya ntangha yo sungula leyi Morgan wa malembe ya nkombo a a nghena eka yona, yi averiwe ku hlaya xitori lexi vulavulaka hi Khisimusi. Morgan u tsundzuxe mudyondzisi wakwe leswaku u ehleketa leswaku nkhuvo lowu a wu nga fambisani ni Bibele. Mudyondzisi wakwe u n’wi pfumelele ku hlawula xitori xin’wana lexi nga lwisaniki ni ripfalo rakwe.

Endzhaku ka nkarhi, xikolo xi hlele nhlangano wo nyika vana masagwadi naswona vatswari va Morgan va rhambiwile. Morgan u hlamarile loko a nyikiwa sagwadi hikwalaho ka leswi a namarheleke tidyondzo leti a a pfumela eka tona. Loko a vutisiwe leswaku u swi kotise ku yini ku va ni xivindzi xo namarhela tidyondzo leti a a pfumela eka tona, u vule leswaku yena ni vatswari vakwe va hlaya buku leyi nge Dyondza Eka Mudyondzisi Lonkulu, leyi rungula ra yona ri sekeriweke eka vutomi ni tidyondzo leti Yesu Kreste a ti dyondziseke.

Buku leyi ya matluka ya 256 leyi nga ni swifaniso swo tala leswi nga ni mivalavala, yi endla leswaku vatswari va tsakela ku burisana ni vana va vona. Yi ni tindzima to tanihi leti nge “Xivangelo Xo Papalata Ku Hemba,” “Xana Swinkhubyana Hinkwaswo Swa Amukeleka Eka Xikwembu?” ni leyi nge “Lexi Nga Hi Pfunaka Leswaku Hi Hlula Ku Chava.”

Loko u lava kopi ya buku leyi, hi kombela u tata xiphephana lexi nga laha hansi kutani u xi rhumela eka adirese leyi kombisiweke, kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumela buku leyi kombisiweke laha hansi.

Kombisa ririmi ra kona.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.