Vanhu Lava U Nga Va Tshembaka
Santiago, muchayeri wa thekisi le Argentina, a nga kalanga a tivutisa leswaku u ta endla yini. Loko ku siyiwe bege ethekisini yakwe, u nambe a yi tlherisela eka n’wini wa yona. Leswi a swi endleke swi nga ha vonaka swi nga tolovelekanga, ngopfu-ngopfu leswi bege yoleyo a yi ri ni mali leyi tlulaka 32 000 wa tidolara!
XANA u tshame u ehleketa hi misava leyi teleke hi vanhu vo tshembeka? Hakunene a swi ta tsakisa swinene ku hanya eka yona! A wu ta siya n’wana wa wena ni munhu la n’wi hlayisaka handle ko chava. A wu nga ta lava swilotlelo swo lotlela tinyangwa ta yindlu ya wena. Xana sweswo ko va norho ntsena?
Ndlela Leyi Milawu Ya Mahanyelo Yi Pfunaka Ha Yona
Muapostola Pawulo la nga Mukreste u vule leswi hi yena ni Vakreste-kulobye: “Hi [navela] ku tikhoma hi ku tshembeka eka swilo hinkwaswo.” (Vaheveru 13:18) Sweswo hi leswi Timbhoni ta Yehovha ti tikarhatelaka ku swi endla. Xikongomelo xa tona i ku va ni timfanelo leti boxiweke eBibeleni eka Esaya 33:15 leyi nge: “U kona loyi a fambaka hi ku tshembeka nkarhi ni nkarhi, la vulavulaka leswinene, loyi a bakanyaka mpindzulo wo biha wa vukanganyisi, loyi mavoko yakwe ma nga xi khomiki xifumbarheriso.” Xana van’wana va hanye njhani hi ndlela yoleyo yo tshembeka?
● ‘Vulavula leswinene.’ Domingo, la nga Mbhoni ya Yehovha, u tirha epurasini ra tikhokhonati le Philippines. U ri: “Vanhu vo tala a va tshembekanga eka vathori va vona. Hi xikombiso, a va va byeli vathori va vona leswaku va tate masaka mangani hi leswi nga endzeni ka tikhokhonati. Sweswo va swi endla hi xikongomelo xo lava ku xavisa masaka man’wana exihundleni.”
A ku sele katsongo leswaku Domingo ni ndyangu wakwe va hlongoriwa epurasini hileswi a va nga swi lavi ku hembela muthori wa vona leswaku va ta vuyeriwa. Nilokoswiritano, Domingo u te: “Hi byele muthori wa hina leswaku hambi loko ho hlongoriwa, a hi nge hembi. Eku heteleleni, muthori wa hina u vule leswaku Timbhoni ta Yehovha i vanhu lavanene lava u nga va tshembaka naswona u hi nyike ndhawu leyi engetelekeke leswaku hi rima eka yona.”
● ‘Bakanya mpindzulo wo biha.’ Pierre, ndhuna ya swibalo endhawini yin’wana ya le Cameroon, a a ri ni tindlela to tala to tikumela mali leyi a nga yi tirhelangiki. Loko a nyikiwe ntirho ro sungula wo holela vatirhi va nkarhinyana, u xiye leswaku swin’wana a swi nga fambi kahle. U ri: “A ku holeriwa vanhu lava tikontraka ta vona se a ti hundzeriwe hi nkarhi kumbe vanhu lava se a va file. Ematshan’weni yo ehleketa ku teka mali yoleyo ndzi yi tirhisa, ndzi ti tsale ehansi tirhekhodo hinkwato ni ku veka mali ya kona eka xisefo.”
Xana ku ve ni vuyelo byihi? Pierre u ri: “Endzhaku ka malembe mambirhi, ku kambisisiwe tirhekodo ta miholo ya vatirhi. Ndzi tinyungubyise ngopfu hileswi ndzi va nyikeke tirhekhodo leti heleleke ni mali hinkwayo, leyi hi nkarhi wolowo se a yi tele ngopfu. Vakambisisi volavo va ndzi bumabumele ngopfu hikwalaho ka ku tshembeka ka mina.”
● Papalata ku teka “xifumbarheriso.” Ku sukela loko Ricardo a ve mutiyisekisi wa le nawini wa maphepha lama sayiniwaka eRio de Janeiro le Brazil, vanhu va ringete ko tala ku n’wi fumbarherisa. U ri: “Siku rin’wana, gqweta rin’wana ri ringete ku ndzi fumbarherisa. Ri ndzi rhumele muchini wo tlanga ti-CD ekaya ndzi nga swi tivi. Hi nkarhi wolowo, michini yoleyo a ya ha ku huma naswona a yi tirhisiwa hi swigwili ntsena.”
I yini leswi Ricardo a swi endleke? U ri: “Mina ni nsati wa mina hi teke xiboho xa leswaku a hi nge ri pfuli no ri pfula bokisi ra kona. Ndzi ye ehofisini yakwe kutani ndzi fika ndzi veka bokisi rero etafuleni rakwe naswona a a nga ndzi langutelanga. Wolowo a wu ri nkarhi wa kahle wo n’wi hlamusela leswaku ha yini ndzi ri vuyisile. Matsalana wakwe swi n’wi khumbe ngopfu leswi ndzi swi endleke.”
Hambileswi Timbhoni ta Yehovha ku nga riki tona ntsena leti ringetaka ku va vanhu vo lulama, ti tiviwa tanihi vanhu vo tshembeka. Hi yona mhaka leyi sweswinyana ku thoriweke Timbhoni ta Yehovha ntsena eka ntlawa wa switolo swa swiambalo le Poland. Mininjhere wa swona u te: “Va tele vanhu vo tshembeka, kambe Timbhoni ta Yehovha ti hanya hi ku ya hi milawu leyi nga eBibeleni.”
Ku Tshembeka Ku Nga Khathariseki Vusweti
Vanhu vo tala va ehleketa leswaku munhu la nga evuswetini a nga fanelanga a tshembeka. Hi xikombiso, xiviko xa mahungu ya CNN xi vike hi jaha ra malembe ya 14 ra le Nigeria leri tirhisaka nkarhi wa rona ku kanganyisa vanhu eka Internet. Loko ri tiyimelela ri ri: “Mi lava ndzi endla yini? Phela ndzi khathalela ndyangu wa ka hina—sesi wa mina, mana wa mina ni [tata] wa mina. Munhu u fanele a tihanyisa.”
I ntiyiso leswaku Bibele a yi va tshembisi rifuwo vanhu vo lulama, kambe ya va tiyisekisa leswaku va ta kuma swilaveko swa vona swa nyama. Esaya 33:16 yi ri: “Kunene u ta nyikiwa xinkwa; mati ya yena a ma nge heli.”
Hambiswiritano, van’wana va nga ha tivutisa va ku: ‘Ku tshembeka ku nga va pfuna njhani vanhu lava nga evuswetini? Ku vuriwa yini hi vanhu lava siku ni siku va kululaka va n’watseka leswaku va tikhathalela?’
Ehleketa hi Berthe, noni yin’wana ya le Cameroon leyi xavisaka mintsumbula leyi cheriweke swinyunyuteri. U ri: “Hi ntolovelo, ku hoxiwa mintsumbula ya 20 eka phakete rin’wana ni rin’wana. Hambiswiritano, swi tolovelekile ku va vaxavisi va hoxa 17 kumbe 18 wa mintsumbula eka maphakete yo tala, kambe a ndzi swi rhandzi ku kanganyisa van’wana leswaku ndzi vuyeriwa.”
Xana bindzu ra Berthe ri famba kahle? A hi minkarhi hinkwayo ri fambaka kahle. U ri: “Hakanyingi siku ra hela ndzi nga xavisanga nchumu. Kambe loko ndzi byela vaxavisi va swakudya leswaku a ndzi si xaveriwa ivi ndzi va kombela leswaku va ndzi kolotisa swona, a va pfumela hikuva a va swi tiva leswaku ndzi ta va hakela loko ndzi kuma mali. A va ndzi tshemba hileswi a ndzi tiviwa hi ku tshembeka.”
Xikwembu Lexi Hi Faneleke Hi Tshembeka Eka Xona
Loko munhu a hetisisa switshembiso swakwe hi sungula ku n’wi tshemba swinene. Yoxuwa, murhangeri wa tiko ra khale ra Israyele, u vule leswi hi Xikwembu: “Ku hava xitshembiso lexi tsandzekeke eka switshembiso hinkwaswo leswinene leswi Yehovha a swi tshembiseke . . . Hinkwaswo swi hetisekile.” (Yoxuwa 21:45) Xana na hina hi na swona swivangelo leswi twalaka swo tshemba Xikwembu?
Switshembiso swa Xikwembu swa tshembeka swinene lerova xi fanisa rito ra xona ni mpfula. (Esaya 55:10, 11) Xana wu kona nchumu lowu nga sivelaka mpfula leswaku yi nga ni, yi tsakamisa misava ni ku endla leswaku swimilana swi kula? A wu kona. Hilaha ku fanaka, ku hava nchumu lowu nga sivelaka switshembiso swa Xikwembu leswaku swi hetiseka.
Xin’wana xa switshembiso sweswo xi tsariwe eka 2 Petro 3:13 leyi nge: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.” Xikwembu xi tiyimisele ku herisa hinkwavo lava kanganyisaka vanhu van’wana emisaveni. Xana u nga swi tsakela ku dyondza leswi engetelekeke malunghana ni ndlela leyi Xikwembu xi nga ta hetisisa xikongomelo xa xona ha yona? Vulavula ni Timbhoni ta Yehovha leti nga endhawini ya ka n’wina, kumbe u tsalela eka adirese leyi faneleke eka leti nga eka tlula 5 ra magazini lowu.
[Bokisi/Xifaniso lexi nga eka tluka 8]
KU TSHEMBEKA SWA VUYERISA
Lucio, Mbhoni yin’wana ya Yehovha ya le Philippines, a a ta va a endle vukanganyisi. U kume mali leyi ringanaka 27 500 wa tidolara endzeni ka khabodo yo veka tifayili ehofisini leyi a komberiweke ku yi basisa. Hofisi ni mali yoleyo a swi ri swa muthori wakwe, loyi a a teke riendzo ra swa mabindzu. Lucio u ri: “A ku ri ro sungula ndzi vona dolara!”
Loko muthori wakwe a vuyile, Lucio u n’wi nyike mali yoleyo. Xana ku ve ni vuyelo byihi? Lucio u ri: “Ndzi byarhisiwe vutihlamuleri lebyi engetelekeke. Entiyisweni, muthori wa mina u ndzi nyike kamara leri ndyangu wa mina a wu ta tshama eka rona. Hambileswi vutomi byi tikaka ePhilippines, ndza swi xiya leswaku Yehovha Xikwembu wa hi khathalela hileswi hi hanyaka hi milawu yakwe.”
[Bokisi/Xifaniso lexi nga eka tluka 9]
SWIKALO LESWI NGA RIKI NA VUKANGANYISI
Tafula ra Moïse leri a xavisaka eka rona tinhlampfi emakete ya le Douala le Cameroon, ri dume ngopfu. U ri: “Tafula ra mina ndzi ri thye vito leri nge Swikalo, hikuva swikalo swa mina i swin’wana eka swo hlayanyana leswi nga riki na vukanganyisi emakete yoleyo hinkwayo. Ndza swi tiva leswaku vanhu va tshamela ku ndzi ringa. Loko va ndzi kombela leswaku ndzi va pimela khilogiramu yin’we ya tinhlampfi, ndzi va pimela yona. Minkarhi hinkwayo va tlhela va ya karisa tinhlampfi teto endhawini yin’wana. Loko se va ti karisile, va kuma leswaku ti hundza khilogiramu yin’we. Kutani va swi xiya leswaku a ndzi va kanganyisanga. Vanhu vo tala va ndzi byele leswi, ‘Hi xava eka wena hikuva u tshembekile.’”
[Xifaniso lexi nga eka tluka 7]
“Hi byele muthori wa hina leswaku hambi loko ho hlongoriwa, a hi nge hembi.”—Domingo, wa le Philippines.
[Xifaniso lexi nga eka tluka 7]
“Vakambisisi volavo va ndzi bumabumele ngopfu hikwalaho ka ku tshembeka ka mina.”—Pierre, wa le Cameroon.
[Xifaniso lexi nga eka tluka 7]
“Gqweta rin’wana ri ringete ku ndzi fumbarherisa. . . .Mina ni nsati wa mina hi teke xiboho xa leswaku a hi nge ri pfuli no ri pfula bokisi ra kona.”—Ricardo, wa le Brazil.
[Xifaniso lexi nga eka tluka 7]
Berthe hakanyingi u heta siku hinkwaro a nga xavisanga nchumu. Kambe vaxavisi van’wana va swakudya a va n’wi kolotisa swona hikuva a va swi tiva leswaku u ta va hakela loko a kuma mali.