U Dyondze Swo Tala Loko A Ri Karhi A Dyondzisa Vana Vakwe

● Manana un’wana la nga emalembeni ya va-30, la tshamaka ni nuna wakwe ni vana vanharhu eKentucky le U.S.A., u tsale a ku: “Mina ni ndyangu wa mina hi vuyeriwe ngopfu eka tibuku hinkwato leti hi nga na tona leti kandziyisiweke hi Timbhoni ta Yehovha.” U te: “Buku leyi ndzi rhandzaka leswaku vana va mina va yi hlaya hi leyi nge Buku Yanga Ya Timhaka Ta Bibele.” U tlhela a ku: “Entiyisweni, a ndzi dyondza swo tala loko ndzi ri karhi ndzi hlaya na vona.”

Buku leyi yi ni swifaniso swo saseka naswona yi vulavula hi swiendlakalo swa le Bibeleni hi ku landzelelana ka minkarhi. Hi xikombiso: Xiyenge 2 xi katsa nhloko-mhaka leyi nge “Hosi Ya Nsele Yi Fuma Egipta,” “Ndlela Leyi Muxe A Ponisiweke Ha Yona,” “Leswi Endleke Leswaku Muxe A Baleka,” “Muxe Na Aroni Va Ri Eka Faro,” “Makhombo Ya 10,” ni leyi nge “Ku Pela Lwandle Ro Tshwuka.”

Xiyenge 6 xa buku leyi lexi nga ni nhloko-mhaka leyi nge “Ku Velekiwa Ka Yesu Ku Ya Eku Feni Kakwe,” yi ni switori leswi vulavulaka hi vutomi bya Yesu ku sukela loko a velekiwa ku fikela loko a fa. Nhloko-mhaka leyi katsiweke hi leyi nge “Yesu A Velekiwa eXivaleni” ni leyi nge “Vavanuna Lava Kongomisiweke Hi Nyeleti.” Nhloko-mhaka yo hetelela yi vula leswaku “vavanuna vo tlhariha,” lava kahle-kahle a va ri vangoma va swilo swa le mpfhukeni, va nghene “endlwini” leswaku va ta vona Yesu, ku nga ri exidyelweni laha a velekiweke kona. Endlwini yoleyo va “[vone] n’wana lontsongo a ri na Mariya mana wakwe.” Vavanuna lava va lemukisiwe hi Xikwembu leswaku va nga tlheleli eka Heroda, loyi a a lava ku dlaya Yesu. Xana sweswo swi fanele swi hi byela yini hi munhu loyi a a kongomisa nyeleti yoleyo?—Matewu 2:1, 11, 12.

Na wena u ta dyondza swo tala loko u ri karhi u hlaya na vona buku leyi nge Buku Yanga Ya Timhaka Ta Bibele. Yi ni switori swa 116 leswi vulavulaka hi vanhu ni swiendlakalo swa le Bibeleni. Leswaku u kuma buku leyi, tata xiphephana lexi nga laha hansi kutani u xi rhumela eka adirese leyi kombisiweke eka xona kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumela buku leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.