MATIKO NI VANHU

Ku Endzela Tiko Ra Liechtenstein

Mepe lowu kombisaka tiko ra Liechtenstein leri nga exikarhi ka ndzilakana wa le Switzerland ni wa le Austria

IRIN’WANA ra matiko lamatsongo emisaveni hinkwayo, leri nga entshaveni leyi nga exikarhi ka Switzerland na Austria. Eka madzana ya malembe lama hundzeke Macelt, Marhaetia, Varhoma ni Vaalemanni hinkwavo a va tshama exifundzheni lexi. Namuntlha, kwalomu ka 67 wa tiphesente ta vanhu lava tshamaka eLiechtenstein va huma eka rixaka ra Vaalemanni, lava a va tshama exifundzheni lexi kwalomu ka malembe ya 1 500 lama hundzeke.

Xijarimani i ririmi ra ximfumo ra le Liechtenstein, hambileswi mavulavulelo ma hambanaka hi ku ya hi miganga. Mixaka mimbirhi ya swakudya leswi dyiwaka ngopfu eLiechtenstein i Tüarka-Rebel, leyi endliwaka hi mavele ni Käsknöpfle, ku nga makaroni lama cheriwaka chizi.

Wansati ni xinhwanyetana va ambale swiambalo swa mivala swa ndhavuko wa le Liechtenstein — Swakudya leswi vuriwaka *Käsknöpfle*

Buloho leri akiweke hi timhandzi ri tlhela ri va ni lwangu enambyeni wa le Liechtenstein — Swiambalo swa ndhavuko swa mivala

Loko vaendzi va endzela tiko leri va vona tintshava leti funengetiweke hi gamboko, minkova leyi rhendzeriweke hi mirhi ya rihlaza, masimu ya vhinyo ni swimilana swo hambanahambana. Hi xikombiso, etikweni leri ra tintshava ku ni tinxaka ta swiluva swa nhova swa kwalomu ka 50. ELiechtenstein ku tlhela ku va ni timuziyamu, yindlu ya mintlango ni ndhawu leyi ku endliwaka vhinyo eka yona. Hi ximumu ni hi xixika vaendzi va endzela ndhawu leyi.

Ku sukela hi va 1920 Timbhoni ta Yehovha ta le Liechtenstein ti tshame ti khomekile hi ku chumayela. Sweswi ku ni Timbhoni ta kwalomu ka 90 etikweni leri, leti chumayelaka rungula ra le Bibeleni eka vaakatiko ni le ka vaendzi.

Buku leyi nge Xana Bibele Yi Dyondzisa Yini Hakunene? yi kandziyisiwa hi Timbhoni ta Yehovha hi Xijarimani, ku nga ririmi ra ximfumo ra le Liechtenstein naswona ya kumeka ni le ka website ya www.jw.org.