KU LANGUTANA NI KU TLAKUKA KA MINXAVO

Hanana

Loko swi ku tikela ku tiyisela ku tlakuka ka minxavo, u nga ha vona onge ku hanana a swi koteki. Kambe loko u nyika van’wana swi huma embilwini swi ta ku pfuna u tiyisela swiyimo swo tika swa ikhonomi. Swa koteka ku hlayisa mali loko hi hala tlhelo u ri karhi u hanana.

HIKWALAHOKAYINI SWI RI SWA NKOKA KU HANANA?

Loko hi hanana hambi ku ri hi tindlela titsongo, swi endla hi tsaka ni ku tlhela hi titwa kahle. Entiyisweni, madokodela ma kombisa leswaku ku nyika swi endla hi hanya kahle emirini ni le miehleketweni. Hi xikombiso, swi nga hunguta ku vilela, ntshikilelo, ku tlakuka ka blood pressure hambi ku ri switlhavi. Nakambe swi ta hi pfuna leswaku hi etlela bya n’wantenyana.

“Ku nyika swi tisa ntsako lowukulu ku tlula ku amukela.”—Mitirho 20:35.

Loko hi nyika van’wana mali kumbe swin’wana, swi nga hi olovela ku amukela mpfuno loko hi wu lava. Howard loyi a tshamaka eNghilandhi u ri: “Loko mina ni nghamu hi lava tindlela to hanana ni ku pfuna van’wana, hi titwa hi nga ri ndzhwalo loko se ku fanele ku pfuniwa hina.” I ntiyiso leswaku vanhu lava nyikaka swi huma embilwini a va langutelanga ku tlheriseriwa swo karhi. Kambe leswi va nga ta swi kuma i vanghana va ntiyiso lava tiyimiseleke ku va pfuna hi mikarhi yo tika.

“Hanyani hi ku nyika, kutani na n’wina mi ta nyikiwa.”—Luka 6:38.

LESWI U NGA SWI ENDLAKA

Phemelana ni van’wana nhloko ya njiya. Hambi u nga ri na swo tala, u nga swi kota ku nyika van’wana swo karhi hambiloko ku ri swakudya leswi nga nyawuriki. Duncan ni ndyangu wakwe lava tshamaka eUganda i swisiwana kambe va hanana swinene. Duncan u ri: “Hi Tisonto, mina ni nghamu hi rhamba van’wana ekaya ra hina leswaku hi ta dya na vona. Ha tiphina hi ku dzumba ni van’wana.”

I ntiyiso leswaku loko u nyika van’wana u fanele u ringanisela. Loko u nga endli tano, u ta endla leswaku ndyangu wa wena wu koka exilogweni.—Yobo 17:5.

Ringeta leswi: Nyika un’wana swakudya hambi ku ri swonwa. Loko u ri ni swilo leswi u nga ha swi laviki, hikwalahokayini u nga swi nyiki vanghana kumbe vanhu lava nga ta swi tirhisa?

Nyika hi tindlela tin’wana. Tinyiko tin’wana letinene a ti lavi mali. Hi xikombiso, hi nga tirhisa nkarhi wa hina ni ku kombisa leswaku ha khathala hi van’wana hi ku va pfuna hi swilo leswi va swi lavaka. Marito ya musa na wona ma nga va nyiko! Byela van’wana ndlela leyi va nga va nkoka hayona eka wena kumbe ndlela leyi u va rhandzaka hayona.

Ringeta leswi: Pfuna van’wana hi mitirho ya vona, u va lunghisela swilo ekaya kumbe u ya va xavela swo karhi. Tsala khadi leri nga ni marito lama khumbaka mbilu kumbe u rhumela munghana meseji hambi wo vula ntsena leswaku u ehleketa hi yena.

Loko u lava tindlela to hanana, u ta tsaka swinene.

“Mi nga rivali ku endla swilo leswinene ni ku avela van’wana swilo leswi mi nga na swona.”—Vaheveru 13:16.

Vatekani va pfuna mukhegula ku basisa jarata. U va yisela tiya loko va ri karhi va harika ni ku hlengeleta matluka.