Xingheniso

Ndzi Nga Yi Kuma Kwihi Ndzayo Leyi Pfunaka?

Vanhwanyana

U tshamela ku anakanya hi jaha leri nga mpohlo lera ha ku fikaka exikolweni. U nga ha ku, ‘A ri ndzi languti no ndzi languta kutani a swi bihanga ku anakanya hi rona.’ Naswona a hi wena ntsena. Vanhwanyana hinkwavo va tifela hi rona. Wa swi tiva leswaku va ri lava hikuva hinkwavo va tshamela ku vulavula hi rona.

Hiloko mi hlangana hi matihlo u nga swi langutelanga kutani ri n’wayitela. Na wena u n’wayitela. Kutani ri tshinela.

Ivi ri ku pfuxela onge hiloko ri khomiwe hi tingananyana ri ku: “Kunjhani?”

U ku: “Ndzi kona!”

Ri ku: “Hi mina Brett.”

Kutani u hlamula hi ku hatlisa u ku: “Wa ha ku fika laha xikolweni?”

Ri ku: “Ha ha ku rhurhela emugangeni lowu emavhikini lama ha ku hundzaka.”

A wu tshembi leswaku hi wena la vulavulaka na Brett!

Brett u ya emahlweni a ku: “Loko hi huma xikolo namuntlha ndzi ta endla xinkhubyana le kaya. Ndzi nga tsaka loko wo ta!”

Hiloko a ku hlevela a ku: “Vatswari va mina va ta va va nga ri kona naswona byala byi ta va byi lo vuya! Xana u tata?”

Brett u rindzele leswaku u n’wi hlamula. Vanhwanyana lavan’wana exikolweni a va ta hatla va pfumela!

Xana u ta ku yini?

Vafana

Vafana vambirhi lava u nghenaka na vona xikolo va ta eka wena. U khomiwa hi rhumbyana hikuva se i kambirhi evhikini leri va ringeta ku ku sindzisa leswaku u dzaha. Sweswi se va ringeta ra vunharhu.

Un’wana wa vona u ri: “Wa ha ri wexe ninamuntlha?” U tsopeta tihlo kutani a humesa xin’wana ephakitini a ku nyika kutani a ku: “Inge ndzi ku nyika nchumu lowu nga ta ku susa xivundza.”

Wa swi vona leswaku nchumu lowu a ku nyikaka wona wu fana ni fole. U ya u chava ngopfu hikuva u swi tiva kahle leswaku i yini.

Kutani u ku: “Ndzi mi byerile leswaku a ndzi . . . ”

Hiloko mufana lo un’wana a ku nghena enon’wini a ku: “A wu koti ku tiphina hikwalaho ka vukhongerinyana lebya wena!”

Kutani mufana lo un’wana a ku: “U pfalekile!”

Wena u ku: “A ndzi pfalekanga.”

Hiloko mufana lo un’wana a veka voko ra yena ekatleni ra wena kutani a endla onge wa ku xavelela, a ku: “Teka!”

Mufana lo un’wana a tshineta nchumu wolowo exikandzeni xa wena kutani a ku hlevela a ku: “Teka, a hi nge byeli munhu.”

Xana u ta endla yini?

VANTSHWA vo tala emisaveni hinkwayo va langutana ni swiyimo leswi fanaka ni leswi siku ni siku. Kambe, van’wana va va va swi lunghekerile ku langutana na swona. Loko mufana a sindzisiwa ku dzaha, a nga ha ku: ‘A ndzi swi lavi kambe se ndzi karhele ku sindzisiwa. Xana swi bihe kwihi ku komba vana lava ndzi nghenaka na vona xikolo leswaku ndzi nga swi kota ku fana na vona?’ Kumbe nhwanyana loyi jaha ri lavaka ku famba na yena leswaku va ya tihungasa, a nga ha ku: ‘I jaha ra kahle. Swi ta va swi nga bihanga loko ndzo pfumela kan’we ntsena!’

Kambe vantshwa vo tala va leteriwa leswaku va yima va tiyile eka leswi va dyondzisiweke swona. Hikwalaho ka sweswo, a va titwi va tshikilelekile ku endla swo biha. Xana wa swi lava ku fana na vona? U nga swi kota! Kambe u nga swi endlisa ku yini?

Bibele yi ta ku pfuna leswaku u kota ku va ni xivindzi xo langutana ni mintlhontlho leyi vantshwa va langutanaka na yona. Yi tamele ndzayo leyi pfunaka hikuva i Rito ra Xikwembu leri huhuteriweke. (2 Timotiya 3:16, 17) Hi swihi swiphiqo leswi Bibele yi nga ku pfunaka eka swona? Languta nxaxamelo lowu nga laha hansi kutani u fungha hi ✔ ekusuhi ni xihloko lexi u nga lavaka ku tiva swo tala ha xona.

□ Ku hanyisana ni vafana ni vanhwanyana

□ Ku twisisa ku kula ka miri wa mina

□ Ku va ni vanghana

□ Ku langutana ni ntshikilelo exikolweni

□ Ku tirhisa mali ya mina hi vutlhari

□ Ku hanyisana ni vatswari va mina

□ Ku lawula ndlela leyi ndzi titwaka ha yona

□ Ku hlawula vuhungasi lebyinene

□ Ku antswisa vuxaka bya mina na Yehovha

Hilaha u nga ta swi xiya hakona eka matluka 4 na 5, swihloko leswi tsariweke laha henhla swi fambisana ni swiyenge swa kaye swa buku leyi. Xana u funghe swihi? Swi nga va swinene leswaku u rhanga hi ku kambisisa swona. Milawu ya Bibele leyi kongomisaka yi nga ku pfuna eka timhaka to tano evuton’wini bya wena. Buku leyi yi ta ku pfuna.a

Buku leyi yi ta ku nyika ni ndhawu leyi u nga ta tsala leswi u swi ehleketaka. Hi xikombiso, loko ndzima yin’wana ni yin’wana yi ya eku heleni, u ta kuma bokisi leri nge “Leswi Ndzi Tiyimiseleke Ku Swi Endla!” Eka rona u ta tsala leswi u lavaka ku swi endla leswaku u tirhisa leswi wa ha ku swi hlayaka. Ku ni matluka yo hlawuleka yo fana ni laha ku nge “Ku Tilunghiselela Ku Langutana Ni Ntshikilelo Wa Tintangha,” eka matluka 132 na 133, lama nga ta ku pfuna leswaku u kota ku langutana ni mintlhontlho leyi u langutanaka na yona leswaku u ta kota ku endla swiboho swa vutlhari. Nakambe, xiyenge ha xin’we xi gimeta hi tluka leri nge “Tinhla Ta Mina,” laha u nga tsalaka ndlela leyi u titwaka ha yona hi mhaka yo karhi leyi ku khumbaka eka leswi u swi hlayeke. U ta tlhela u kuma matluka ya kaye ebukwini leyi, lama nga ni xihloko lexi nge, “Xikombiso Lexinene.” Eka xona u ta hlaya hi vanhu vo hambana-hambana lava hanyeke hi nkarhi wa ku tsariwa ka Bibele, lava hi faneleke hi tekelela xikombiso xa vona.

Bibele yi ri: “Kuma vutlhari, kuma ku twisisa.” (Swivuriso 4:5) Rito leri nge “vutlhari” ni leri nge “ku twisisa” a ma vuli ku tiva ku hambanisa leswinene eka leswo biha ntsena. U fanele u yi twisisa kahle mhaka leyi u hlayaka ha yona. Hi xikombiso, loko u tiva vuyelo lebyi vaka kona loko u endla swilo swo biha ni lebyi vaka kona loko u endla leswinene, swi ta ku pfuna leswaku u va ni xivindzi xo ala ku endla leswi tintangha ta wena ti lavaka leswaku u swi endla.

Tiyiseka leswaku hambiloko u langutane ni swiphiqo swo tika, a hi wena ntsena. Va kona van’wana lava langutaneke na swona kutani va swi hlula. Na wena u nga swi hlula. Yi tirhise kahle buku leyi, leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2. Yi ta ku komba leswaku Bibele yi tamele ndzayo leyi pfunaka swinene!

[Nhlamuselo ya le hansi]