Ndzima 37

Xana Ndzi Fanele Ndzi Khuvuriwa?

Fungha loko swiga leswi swi ri ntiyiso kumbe mavunwa:

Swa boha leswaku Mukreste a khuvuriwa.

□ I ntiyiso

□ I mavunwa

Xikongomelo-nkulu xa ku khuvuriwa i ku ku sirhelela leswaku u nga weli exidyohweni.

□ I ntiyiso

□ I mavunwa

Ku khuvuriwa swi ku endla leswaku u fanelekela ku ponisiwa.

□ I ntiyiso

□ I mavunwa

Loko u nga khuvuriwanga, a wu nge tihlamuleli eka Xikwembu hileswi u swi endlaka.

□ I ntiyiso

□ I mavunwa

Loko vanghana va wena evandlheni va khuvuriwa swi vula leswaku na wena u fanele u khuvuriwa.

□ I ntiyiso

□ I mavunwa

HI XITALO vantshwa lava anakanyaka hi ku khuvuriwa, hi lava va hanyaka hi ku pfumelelana ni milawu ya Xikwembu, va aka vuxaka na xona naswona va bula ni van’wana hi vukhongeri bya vona. Kambe, xana u nga swi tivisa ku yini loko u lunghekele ku khuvuriwa? Leswaku hi hlamula xivutiso lexi, a hi rhange hi hlamula swivutiso leswi vutisiweke eku sunguleni ka ndzima leyi.

● Swa boha leswaku Mukreste a khuvuriwa.

I ntiyiso. Yesu u lerise hinkwavo lava lavaka ku va vadyondzisiwa va yena leswaku va khuvuriwa. (Matewu 28:19, 20) Entiyisweni na Yesu hi byakwe u khuvuriwile. Leswaku u landzela Kreste, u fanele u khuvuriwa loko u kule hilaha ku ringaneke leswaku u kota ku tiendlela xiboho xexo niloko u swi lava ku endla tano.

● Xikongomelo-nkulu xa ku khuvuriwa i ku ku sirhelela leswaku u nga weli exidyohweni.

I mavunwa. Loko u khuvuriwa u komba mani na mani leswaku se u tinyiketerile eka Yehovha. A swi vuli leswaku a wu nge he dyohi loko se u tinyiketerile. Ku ri na sweswo, u tinyiketela eka Yehovha hileswi u rhandzaka ku hanya hi milawu ya yena.

● Ku khuvuriwa swi ku endla leswaku u fanelekela ku ponisiwa.

I ntiyiso. Bibele yi vula leswaku nkhuvulo i goza ra nkoka leswaku munhu a ponisiwa. (1 Petro 3:21) Kambe, sweswo a swi vuli leswaku loko wo kala u khuvuriwa se u ponisiwile. U khuvuriwa hileswi u rhandzaka Yehovha naswona u lavaka ku n’wi tirhela hi mbilu ya wena hinkwayo hilaha ku nga heriki.—Marka 12:29, 30.

● Loko u nga khuvuriwanga, a wu nge tihlamuleli eka Xikwembu hileswi u swi endlaka.

I mavunwa. Yakobo 4:17 yi ri: “Loko munhu a tiva ndlela yo endla leswi lulameke kambe a nga swi endli, i xidyoho eka yena,” swi nga khathariseki leswaku u khuvuriwile kumbe a nga si khuvuriwa. Loko u swi tiva leswi u faneleke u swi endla naswona u kule hilaha ku ringaneke leswaku u kota ku endla leswinene, kumbexana u nga ha vulavula ni mutswari wa wena kumbe Mukreste un’wana loyi u n’wi tshembaka. Sweswo swi ta ku pfuna leswaku u fanelekela ku khuvuriwa.

● Loko vanghana va wena evandlheni va khuvuriwa swi vula leswaku na wena u fanele u khuvuriwa.

I mavunwa. U fanele u tiendlela xiboho xa ku khuvuriwa. (Pisalema 110:3) U fanele u khuvuriwa ntsena loko se u swi twisisa leswi ku va Mbhoni ya Yehovha swi vulaka swona na loko se u swi lunghekerile ku hanya hi ndlela yoleyo.—Eklesiasta 5:4, 5.

Goza Leri Cincaka Mahanyelo Ya Wena

Mahanyelo ya wena ma cinca endzhaku ka loko u khuvuriwile naswona sweswo swi endla leswaku u kuma mikateko yo tala. Kambe i vutihlamuleri lebyikulu, lebyi lavaka leswaku u hanya hi ku pfumelelana ni ku tinyiketela ka wena eka Yehovha.

Xana se u swi lunghekerile ku tinyiketela? Loko swi ri tano, tsaka. U ta va ni lunghelo lerikulu ngopfu, ra ku tirhela Yehovha hi mbilu hinkwayo ni ku hanya hi ndlela leyi kombisaka leswaku hakunene u tinyiketele eka yena.—Matewu 22:36, 37.

MATSALWA

“Nyikelani mimiri ya n’wina yi va xitlhavelo lexi hanyaka, xo kwetsima ni lexi amukelekaka eka Xikwembu, ku nga ntirho wo kwetsima, hi matimba ya n’wina ya ku anakanya.”—Varhoma 12:1.

XITSUNDZUXO

Kombela vatswari va wena va ku pfuna u kuma munhu evandlheni la nga ku pfunaka leswaku u tiyisa vuxaka bya wena ni Xikwembu.—Mintirho 16:1-3.

XANA A WU SWI TIVA LESWAKU . . . ?

Nkhuvulo i “mfungho” wa nkoka lowu kombaka leswaku wa faneleka ku ponisiwa.—Ezekiyele 9:4-6.

LESWI NDZI TIYIMISELEKE KU SWI ENDLA!

Leswaku ndzi fanelekela ku khuvuriwa, ndzi ta ringeta ku twisisa tidyondzo leti landzelaka ta Bibele: ․․․․․

Leswi ndzi lavaka ku vutisa (va-)mutswari wa mina hi mhaka leyi ․․․․․

U NGA KU YINI?

● Ha yini nkhuvulo wu ri goza ra nkoka?

● I yini lexi nga endlaka leswaku muntshwa a hatlisela ku khuvuriwa?

● I yini lexi nga endlaka leswaku muntshwa a kanakana ku tinyiketela kutani a khuvuriwa?

[Marito lama tshahiweke exihlokweni lama nga eka tluka 306]

“Ku tiva leswaku ndzi khuvuriwile, swi ndzi pfunile leswaku ndzi endla swiboho swa vutlhari ni ku nga endli swilo leswi nga ta onha vuxaka bya mina na Yehovha.”—Holly

[Bokisi/Xifaniso lexi nga eka tluka 307]

Swivutiso Leswi Talaka Ku Vutisiwa Mayelana Ni Nkhuvulo

Xana nkhuvulo i xikombiso xa yini? Ku nyuperisiwa ni ku humesiwa ematini swi kombisa leswaku u fularhele mahanyelo ya wena ya khale kutani se u lava ku endla ku rhandza ka Yehovha.

Xana swi vula yini ku nyiketela vutomi bya wena eka Yehovha? Swi vula leswaku a wa ha tilawuli naswona u tshembisa leswaku u ta rhangisa ku endla ku rhandza ka Xikwembu. (Matewu 16:24) I swa nkoka leswaku u endla xikhongelo xo tinyiketela eka Yehovha u nga si khuvuriwa.

Xana mahanyelo ya wena ma fanele ma va ma ri njhani loko u nga si khuvuriwa? U fanele u hanya hi ku pfumelelana ni Bibele naswona u chumayela van’wana. U fanele u tiyisa vunghana bya wena na Xikwembu hi xikhongelo ni ku dyondza Bibele. U fanele u tirhela Yehovha hileswi u swi rhandzaka ku nga ri hileswi van’wana va ku sindzisaka ku endla tano.

Xana munhu u fanele a khuvuriwa loko a ri ni malembe mangani? Leswaku u ni malembe mangani a hi swa nkoka. Kambe u fanele u va u kule hilaha ku ringaneke leswaku u kota ku twisisa leswi ku tinyiketela swi vulaka swona.

Xana u fanele u endla njhani loko u lava ku khuvuriwa kambe vatswari va wena va ku byela leswaku u yimanyana? Kumbexana va lava leswaku u antswisa mahanyelo ya wena ya Vukreste. Xixima xitsundzuxo xa vona naswona u tirhisa nkarhi wolowo ku tiyisa vunghana bya wena na Yehovha.—1 Samuwele 2:26.

[Bokisi leri nga eka tluka 308, 309]

Xitoloveto

Xana U Lava Ku Khuvuriwa?

Tikambele hi ku anakanyisisa hi swivutiso ni swiga leswi nga laha hansi. Rhanga hi ku hlaya matsalwa lama kombisiweke u nga si tsala tinhlamulo ta wena.

Xana u kombisa leswaku u tshemba Yehovha hi tindlela tihi?—Pisalema 71:5. ․․․․․

Xana u kombisa hi ndlela yihi leswaku matimba ya wena ya ku twisisa ma leteriwile ku hambanisa leswi lulameke eka leswi hoxeke?—Vaheveru 5:14. ․․․․․

Xana u khongela kangani? ․․․․․

Xana hi swihi swilo leswi u swi khongelelaka hi ku kongoma naswona swikhongelo swa wena swi kombisa hi ndlela yihi leswaku wa n’wi rhandza Yehovha?—Pisalema 17:6. ․․․․․

Tsala tipakani leti u tivekeleke tona leswaku u ta antswisa ndlela leyi u khongelaka ha yona. ․․․․․

Xana u yi endla kangani dyondzo ya wena ya Bibele?—Yoxuwa 1:8. ․․․․․

I yini swin’wana leswi u swi hlayaka eka dyondzo ya wena ya Bibele? ․․․․․

Tsala tipakani leti u tivekeleke tona leswaku u antswisa ndlela leyi u dyondzaka ha yona Bibele. ․․․․․

Xana ntirho wa wena wa nsimu wu njhani? (Hi xikombiso: Xana wa swi kota ku hlamusela van’wana tidyondzo ta xisekelo ta Bibele? Xana wa vuyela eka vanhu lava tsakelaka? Xana u tivekele pakani yo fambisa dyondzo ya le kaya ya Bibele?)

□ Ina □ Doo!

Xana wa ya ensin’wini hambiloko vatswari va wena va nga yi?—Mintirho 5:42.

□ Ina □ Doo!

Tsala tipakani leti u tivekeleke tona leswaku u antswisa ntirho wa wena wo chumayela.—2 Timotiya 2:15. ․․․․․

Xana u va kona minkarhi hinkwayo eminhlanganweni ya vandlha kumbe u ta hi xiwelo?—Vaheveru 10:25. ․․․․․

Xana wa hlamula loko u ri eminhlanganweni?

(Loko vatswari va wena va ku pfumelela), xana u va kona eminhlanganweni hambiloko vona va nga tanga?

□ Ina □ Doo!

Xana hakunene wa swi tsakela ku endla ku rhandza ka Xikwembu?—Pisalema 40:8.

□ Ina □ Doo!

Xana u nga boxa swiyimo swo karhi hi ku kongoma, leswi eka swona u aleke ku endla leswi tintangha ta wena ti lavaka u endla swona?—Varhoma 12:2. ․․․․․

Xana u tiyimisele ku endla yini leswaku u tshama u ri karhi u rhandza Yehovha?—Yudha 20, 21. ․․․․․

Xana u ta hambeta u tirhela Yehovha hambiloko vatswari ni vanghana va wena va tshika ku n’wi tirhela?—Matewu 10:36, 37.

□ Ina □ Doo!

[Xifaniso lexi nga eka tluka 310]

Ku fana ni vukati, mahanyelo ya wena ma cinca endzhaku ka loko u khuvuriwile kutani a wu fanelanga u ku tekela ehansi

Ndzima 38

Xana Ndzi Ta Endla Yini Hi Vutomi Bya Mina?

“Eku sunguleni a ndzi nga ri na mhaka ni vumundzuku. Kambe loko ndzi ri kusuhi ni ku heta xikolo, ndzi swi xiyile leswaku a ndzi ta sungula ku tikhathalela, ndzi tirha naswona ndzi va ni swikweleti.”—Alex.

ANAKANYA u ri karhi u lava ku teka riendzo ro ya ekule swinene ni le kaya. Kumbexana u ta rhanga hi ku langutisa mepe leswaku u ta vona ndlela yo antswa leyi yaka kona. Swi tano ni hi ku lunghiselela vumundzuku bya wena. Muntshwa un’wana la vuriwaka Michael, loyi sweswi a tirhaka erhavini rin’wana ra Timbhoni ta Yehovha u ri: “Swi tele swilo leswi u nga swi endlaka.” Xana u nga hlawula yini? Michael u ri: “Swi ya hi tipakani leti u tivekeleke tona.”

Pakani yi fana ni ku ya endhawini yo karhi. Swi nga endleka u nga fiki loko u nga ku tivi laha u yaka kona. Swa antswa ku tiva ndlela leyi u nga yi fikelelaka ha yona pakani ya wena. Loko u endla tano, u ta va u landzela ndzayo leyi kumekaka eka Swivuriso 4:26, leyi nge: “Khulela nenge wa wena ndlela.” Bibele leyi vuriwaka Contemporary English Version yi ri: “Tiva lomu u yaka kona.”

Loko u ri karhi u kula, u ta boheka ku endla swiboho swa nkoka mayelana ni vugandzeri, ntirho, vukati, ndyangu ni timhaka tin’wana ta nkoka. Swi ta ku olovela ku endla swiboho swa vutlhari loko u tiva leswaku u lava ku endla yini hi vutomi bya wena. Naswona loko u ri karhi u anakanya leswaku i yini leswi u lavaka ku swi endla, ku ni nchumu wun’wana lowu u nga fanelangiki u wu tekela ehansi.

“Anakanya Muvumbi Wa Wena”

Leswaku u ta tsaka, u fanele u anakanyisisa hi marito ya Solomoni, Hosi yo tlhariha, lama nge: “Anakanya Muvumbi wa wena hi masiku ya vuntshwa bya wena.” (Eklesiasta 12:1, BX) Leswi swi vula leswaku swiboho leswi u swi endlaka evuton’wini swi fanele swi kombisa leswaku u lava ku endla ku rhandza ka Xikwembu.

Ha yini swi ri swa nkoka ku endla tano? Eka Nhlavutelo 4:11, Bibele yi ri: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” Swivumbiwa hinkwaswo etilweni le laha misaveni swi fanele swi nkhensa Muvumbi. Xana wa n’wi nkhensa hileswi a ku nyikeke “vutomi ni ku hefemula ni swilo hinkwaswo”? (Mintirho 17:25) Xana a wu titwi u boheka ku nkhensa Yehovha Xikwembu hikwalaho ka swilo hinkwaswo leswi a ku nyikeke swona?

Vantshwa vo tala lava nga Timbhoni ta Yehovha va anakanya hi Muvumbi wa vona, hi ku va maphayona, ku tirha eBethele, ku va varhumiwa ni ku pfuna entirhweni wo aka, ni le ka mintirho yin’wana. Anakanya mintirho yin’wana leyi tsakisaka, leyi u nga hlanganyelaka eka yona.

Ku phayona. Maphayona ya nkarhi hinkwawo ma heta nkarhi wo tala ensin’wini. Hikwalaho ka ndzetelo ni ntokoto lowu ma wu kumaka, ma kota ku va ni vutshila byo dyondzisa Bibele.

Ku tirha laha ku nga ni xilaveko lexikulu. Van’wana va rhurhela laha ku nga ni xilaveko lexikulu xa vahuweleri va Mfumo. Van’wana va dyondza ririmi rin’wana kutani va ya pfuna evandlheni ra le kusuhi leri tirhisaka ririmi rero kumbe va rhurhela etikweni rimbe.a

Ku va murhumiwa. Maphayona lama fanelekaka ni lama hanyeke kahle ma leteriwa leswaku ma ya chumayela ematikweni mambe. Varhumiwa va hanya vutomi lebyi tsakisaka ni lebyi nga ni xikongomelo.

Ku tirha eBethele. Swirho swa ndyangu wa Bethele swi tirha emarhavini ya Timbhoni ta Yehovha. Emarhavini man’wana ku gandlisiwa ku tlhela ku rhumeriwa tibuku to tala leti sekeriweke eBibeleni.

Ku tirha ematikweni mambe. Vamakwerhu lava endlaka ntirho lowu va ya eka matiko man’wana va ya pfuna ku aka Tiholo ta Mfumo, ta Tinhlengeletano ni marhavi.

Xikolo xa Ndzetelo wa Vutirheli. Vakulu ni malandza ya vutirheli lama fanelekaka, lava nga tekangiki, va leteriwa ku endla mintirho leyi khumbaka nhlengeletano ya Yehovha ni ku va swivulavuri leswinene. Van’wana va ya va ya pfuna ematikweni mambe.

Ku Hlawula Ntirho Lowu U Nga Wu Endlaka

Mintirho leyi boxiweke laha henhla i pakani leyi xiximekaka, leyi munhu a nga tivekelaka yona naswona yi tisa mikateko yo tala. Kambe munhu u fanele a anakanyisisa a nga si endla xiboho. Hi xikombiso, tivutise, ‘Xana i yini leswi ndzi nga swi endlaka leswaku ndzi tiwundla loko ndzi ri karhi ndzi endla ntirho lowu?’

Kelly a a tivekele pakani ya ku va phayona kutani u hlawule ntirho lowu nga ta n’wi pfuna ku endla tano. U ri: “Ndzi hlawule ntirho lowu nga ta ndzi pfuna loko ndzi ri karhi ndzi phayona.”

Kelly u sungule ku dyondzela ntirho wo karhi loko a ha ri exikolweni. Sweswo swi n’wi pfunile leswaku a kota ku fikelela pakani ya yena. Kelly u ri: “A ndzi lava ku phayona. Swilo leswin’wana hinkwaswo a swi nga ri swa nkoka.” Kelly a nga tisoli hi xiboho lexi a xi endleke. U ri: “Xiboho lexi ndzi xi endleke a xi ri xa nkoka ku tlula hinkwaswo leswi ndzi nga tshama ndzi swi endla.”

Kombela Van’wana Va Ku Pfuna

Loko u famba endhawini leyi u nga yi tiviki ku ni laha u nga ta kombela van’wana leswaku va ku komba ndlela. Swi tano niloko u lunghiselela vumundzuku bya wena. Kombela van’wana va ku pfuna. Swivuriso 20:18 yi ri: “Makungu ma simekiwa ma tiya hi xitsundzuxo.”

Vatswari va wena hi vona vo sungula lava u faneleke u lava mpfuno eka vona. Kambe u nga ha kombela mpfuno eka Vakreste van’wana lava u va tshembaka, lava hanyaka hi milawu ya Xikwembu. Roberto, la nga ni malembe ya 27 naswona a ri xirho xa ndyangu wa Bethele, u ri: “Tekelela Vakreste lava nga xikombiso lexinene evandlheni ra n’wina ni le ka mavandlha man’wana lama nga ekusuhi ni ra n’wina.”

Yehovha Xikwembu u lava ku ku pfuna leswaku u endla swiboho leswi nga ta ku tsakisa evuton’wini. Kutani n’wi kombele leswaku a ku pfuna u ‘twisisa leswi ku rhandza ka yena ku nga swona’ hi vumundzuku bya wena. (Vaefesa 5:17) Eka hinkwaswo leswi u swi endlaka evuton’wini bya wena, landzela xitsundzuxo xa Swivuriso 3:5, 6, lexi nge: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.”

Leswaku u kuma rungula leri engetelekeke, hlalela DVD leyi nge “Young People Ask—What Will I Do With My Life?” Yi kumeka hi tindzimi leti tlulaka 30

[Nhlamuselo ya le hansi]

MATSALWA

“‘Ndzi kombela mi ndzi ringa, . . . ’ Yehovha wa mavuthu u vurile, ‘mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.’”—Malakiya 3:10.

XITSUNDZUXO

Vulavula ni van’wana lava ku nga khale va tirhela Yehovha va ri maphayona, valanguteri va swifundzha ni va miganga, lava tirheke eBethele ni kun’wana. Va vutise leswaku ha yini va hlawule ku endla tano nileswaku hi yihi ndlela leyi Yehovha a va katekiseke ha yona.

XANA A WU SWI TIVA LESWAKU . . . ?

Gezi ri endla leswaku xitirhisiwa xo karhi xi kota ku tirha. Hilaha ku fanaka, moya lowo kwetsima wa Xikwembu wu nga ku pfuna leswaku u endla swo tala entirhweni wa xona.—Mintirho 1:8.

LESWI NDZI TIYIMISELEKE KU SWI ENDLA!

Leswaku ndzi wu tsakela ngopfu ntirho wa nsimu, ndzi ta vulavula na ․․․․․

Leswi ndzi lavaka ku vutisa (va-)mutswari wa mina hi mhaka leyi ․․․․․

U NGA KU YINI?

● Hi byihi vuswikoti lebyi u nga na byona?

● Xana u nga byi tirhisa njhani leswaku u dzunisa Yehovha?

● Eka tipakani leti longoloxiweke eka xihloko lexi, hi yihi leyi u yi tsakelaka ngopfu?

[Marito lama tshahiweke exihlokweni lama nga eka tluka 313]

“Vatswari va mina ndzi va xixima ngopfu. Ku tiyisela ka vona entirhweni wo chumayela, ndlela leyi va koteke ku langutana ha yona ni swiyimo swo tika hi tlhelo ra timali ni ndlela leyi va ndzi khutazeke ha yona leswaku ndzi endla ntirho wa Xikwembu, swi ndzi pfune ngopfu.”—Jarrod

[Bokisi leri nga eka tluka 314]

Xitoloveto

Tipakani Ta Mina

Fungha tipakani leti u lavaka ku tivekela tona kutani tsala leswi u lavaka ku swi endla laha ku nga tsariwangiki nchumu leswaku u kota ku ti fikelela.

Tipakani Ta Ntirho Wo Chumayela

□ Ndzi ta engetela tiawara ta mina entirhweni wa nsimu ti va hi ․․․․․ n’hweti

□ Ndzi ta fambisa minkandziyiso ya ․․․․․ hi n’hweti

□ Ndzi ta tirhisa Bibele loko ndzi vulavula hi vukhongeri bya mina

□ Ndzi ta endla maendzo yo vuyela ya ․․․․․ hi n’hweti

□ Ndzi ta sungula ku dyondzela munhu Bibele

Tipakani tin’wana: ․․․․․

Tipakani Ta Ku Hlaya

□ Ndzi ta hlaya matluka ya ․․․․․ ya Bibele hi siku

□ Ndzi ta lunghiselela minhlangano ya vhiki ni vhiki

□ Ndzi ta endla ndzavisiso eka timhaka leti landzelaka ta Bibele: ․․․․․

Tipakani Ta Le Vandlheni

□ Loko swi koteka ndzi ta hlamula kan’we enhlanganweni ha wun’we

□ Ndzi ta sungula bulo ni munhu un’we lonkulu loyi ndzi lavaka ku n’wi tiva ku antswa

□ Ndzi ta endzela xirho xa vandlha lexi dyuhaleke kumbe lexi vabyaka ․․․․․

Tipakani tin’wana: ․․․․․

Siku ․․․․․

Endzhaku ka tin’hweti ta tsevu kambisisa tipakani ta wena u vona loko u swi kotile ku ti fikelela. Loko ku ri ni xilaveko, lunghisa kumbe u engetela swo karhi eka tona.

[Xifaniso lexi nga eka tluka 312]

Ku tivekela tipakani swi ta ku pfuna leswaku u hanya vutomi lebyi nga ni xikongomelo