1-3. Hi swihi swivutiso leswi vanhu va swi vutisaka hi rifu naswona tikereke tin’wana ti swi hlamula njhani?

BIBELE yi hi tshembisa leswaku siku rin’wana “rifu a ri nge he vi kona.” (Nhlavutelo 21:4) Eka Ndzima 5, hi dyondze leswaku nkutsulo wu endla swi koteka leswaku hi kuma vutomi lebyi nga heriki. Kambe vanhu va ya emahlweni va fa. (Eklesiasta 9:5) Kutani xin’wana xa swivutiso leswi hi tivutisaka xona hi lexi nge, Ku endleka yini hi hina loko hi fa?

² Nhlamulo ya xivutiso xexo i ya nkoka swinene loko ku fa munhu loyi hi n’wi rhandzaka. Hi nga ha tivutisa leswi: ‘Xana u ye kwihi? Xana wa hi vona? Xana a nga hi pfuna? Xana hi ta tlhela hi n’wi vona?’

³ Tikereke ti hlamula swivutiso sweswo hi tindlela leti nga faniki. Tin’wana ti dyondzisa leswaku loko u endla leswinene, u ya etilweni kambe loko u endla swo biha u ta tshwa etiheleni. Tin’wana ti vula leswaku loko u fa u hundzuka moya ivi u ya tshama ni swirho swa ndyangu wa ka n’wina leswi se swi feke. Kasi tin’wana ti vula leswaku endzhaku ka loko u file ni ku tlhela u avanyisiwa, u ta tlhela u velekiwa kumbe u tlhela u hanya u ri ni miri wun’wana, kumbexana u ri munhu un’wana kumbe xiharhi.

4. Hi wihi nchumu lowu tikereke ti wu dyondzisaka hi rifu?

⁴ Tikereke ti dyondzisa swilo leswi nga faniki. Kambe to tala ta tona ti pfumela nchumu wun’we. Ti dyondzisa leswaku loko munhu a fa, ku ni xiphemu lexi yaka emahlweni xi hanya. Xana wolowo i ntiyiso?

HI KWIHI LAHA HI YAKA KONA LOKO HI FA?

5, 6. Ku endleka yini hi hina loko hi fa?

⁵ Yehovha wa swi tiva leswi endlekaka eka hina loko hi fa naswona u hi byele leswaku loko munhu a fa vutomi byakwe bya hela. Loko munhu a fa a nga ha hanyi. Kutani loko munhu a fa, ndlela leyi a titwaka ha yona ni leswi a swi anakanyaka a swi yi emahlweni swi hanya kun’wana.a Loko hi fa a hi koti ku vona, ku twa naswona a hi ehleketi.

⁶ Hosi Solomoni u tsale leswaku “lava feke, a va tivi nchumu nikatsongo.” Lava feke a va koti ku rhandza kumbe ku venga naswona ‘a ku na ntirho hambi ku ri kungu, vutivi kumbe vutlhari eSirheni.’ (Hlaya Eklesiasta 9:5, 6, 10.) Kutani eka Pisalema 146:4, Bibele yi hi byela leswaku loko munhu a fa, “miehleketo yakwe” ya fa.

LESWI YESU A SWI VULEKE HI RIFU

7. Xana Yesu u te yini hi rifu?

⁷ Loko munghana wakwe lonkulu Lazaro a file, Yesu u byele vadyondzisiwa vakwe a ku: ‘Lazaro nakulorhi u etlele.’ Kambe Yesu a a nga vuli swona leswaku Lazaro u le ku wiseni. Yesu u ye emahlweni a ku: “Lazaro u file.” (Yohane 11:11-14) Kutani Yesu u fanise rifu ni ku etlela. A nga vulanga swona leswaku Lazaro a a ri etilweni kumbe a ri ni swirho swa ndyangu wa ka vona leswi feke. Nakambe a nga vulanga swona leswaku Lazaro a a ri eku xanisekeni etiheleni kumbe a ta tlhela a velekiwa a ri munhu un’wana kumbe xiharhi. Kambe a swi fana ni loko Lazaro a etlele vurhongo lebyikulu. Matsalwa man’wana ma fanisa rifu ni vurhongo lebyikulu. Bibele yi vula leswaku loko Stefano a dlayiwile ‘u etlele eku feni.’ (Mintirho 7:60) Muapostola Pawulo u tlhele a tsala leswaku Vakreste van’wana va “etlele eku feni.”—1 Vakorinto 15:6.

8. Hi swi tivisa ku yini leswaku Xikwembu a xi vumbanga vanhu leswaku va fa?

⁸ Xana Xikwembu xi vumbe Adamu na Evha leswaku va fa eku heteleleni? Doo! Yehovha u va vumbe leswaku va tiphina hi vutomi hilaha ku nga heriki va ri ni rihanyo leri hetisekeke. Loko Yehovha a vumba vanhu, u va endle va ri ni ku navela ku hanya hilaha ku nga heriki. (Eklesiasta 3:11) Vatswari a va swi lavi ku vona vana va vona va dyuhala ni ku fa kutani Yehovha u titwa hi ndlela leyi fanaka hi hina. Kambe loko ku ri hileswaku Xikwembu xi hi vumbe leswaku hi hanya hilaha ku nga heriki, ha yini hi fa?

HA YINI HI FA?

9. Ha yini xileriso lexi Yehovha a xi nyikeke Adamu na Evha a xi nga tiki?

⁹ Entangeni wa Edeni, Yehovha u byele Adamu a ku: “U nga ha tidyela u eneriseka eka murhi wun’wana ni wun’wana wa ntanga. Kambe loko ku ri murhi wa ku tiva leswinene ni leswo biha u nga tshuki u wu dya hikuva siku u nga ta wu dya, u ta fa hakunene.” (Genesa 2:9, 16, 17) Xileriso xexo lexi nga erivaleni a xi nga tiki lerova munhu a nga ta tsandzeka ku xi yingisa naswona Yehovha a a ri ni mfanelo yo byela Adamu na Evha leswinene ni leswi nga riki swinene. Hi ku yingisa Yehovha, a va ta kombisa leswaku va xixima vulawuri byakwe. Nakambe a va ta kombisa leswaku va tlangela nchumu wun’wana ni wun’wana lowu a va nyikeke wona.

10, 11. (a) Xana Sathana u va hambukise njhani Adamu na Evha? (b) Ha yini Adamu na Evha a va nga ta rivaleriwa hikwalaho ka leswi va swi endleke?

¹⁰ Lexi twisaka ku vava, Adamu na Evha va hlawule ku ka va nga n’wi yingisi Yehovha. Sathana u vutise Evha a ku: “Xana hakunene i ntiyiso leswaku Xikwembu xi vule leswaku mi nga tshuki mi dya eka murhi wun’wana ni wun’wana wa ntanga?” Evha u hlamule a ku: “Mbhandzu wa mirhi ya ntanga hi nga dya. Kambe loko ku ri ku dya mbhandzu wa murhi lowu nga exikarhi ka ntanga, Xikwembu xi te, ‘mi nga tshuki mi dya eka wona, e-e, mi nga tshuki mi wu khumba leswaku mi nga fi.’”—Genesa 3:1-3.

¹¹ Kutani Sathana u te: “Entiyisweni mi nga ka mi nga fi. Hikuva Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.” (Genesa 3:4-6) Sathana a lava leswaku Evha a ehleketa leswaku u fanele a tiendlela xiboho xa leswinene ni leswi nga riki swinene. Hi nkarhi lowu fanaka, u xise Evha hileswi a swi ta endleka loko a nga xi yingisi Xikwembu. Sathana u vule leswaku Evha a nge fi, kutani u dye wun’wana wa mbhandzu wolowo ivi wun’wana a wu nyika nuna wakwe. Adamu na Evha a va swi tiva leswaku Yehovha u va byele leswaku va nga dyi mbhandzu. Loko va wu dya, va hlawule ku nga xi yingisi xileriso lexi nga erivaleni ni lexi twisisekaka. Hi ku wu dya, va kombise leswaku a va n’wi xiximi Tata wa vona wa le tilweni loyi a nga ni rirhandzu. A va nga ta rivaleriwa hikwalaho ka leswi va swi endleke!

12. Ha yini swi twisa ku vava leswi Adamu na Evha va nga n’wi yingisangiki Yehovha?

¹² Hakunene swi twisa ku vava leswi vatswari va hina vo sungula va nga n’wi xiximangiki Muvumbi wa vona! Xana a wu ta titwa njhani loko a wu tirhe hi matimba ku kurisa n’wana wa jaha ni wa nhwanyana kutani va nga ku yingisi va endla leswi hambaneke ni leswi u va kombeleke ku swi endla? Xana a swi nga ta ku twisa ku vava?

13. Xana Yehovha a vula yini loko a ku “u ta tlhelela entshurini”?

¹³ Leswi va nga yingisangiki, Adamu na Evha va lahlekeriwe hi lunghelo ro hanya hilaha ku nga heriki. Yehovha u byele Adamu a ku: “Hikuva u ntshuri u ta tlhelela entshurini.” (Hlaya Genesa 3:19.) Leswi swi vula leswaku Adamu a ta tlhela a va ntshuri, onge hiloko a nga kalanga a vumbiwa. (Genesa 2:7) Endzhaku ka loko Adamu a dyohile, u file naswona a nga ha yanga emahlweni a hanya.

14. Ha yini hi fa?

¹⁴ Loko Adamu na Evha a va yingise Xikwembu, a va ta va va ha hanya ninamuntlha. Kambe leswi va nga yingisangiki, va dyohile kutani va fa eku heteleleni. Xidyoho xi fana ni vuvabyi lebyi dlayaka lebyi hi tluletiweke byona hi vatswari va hina vo sungula. Hinkwerhu hi velekiwa hi ri vadyohi kutani hi yona mhaka hi faka. (Varhoma 5:12) Kambe xexo a hi xona xikongomelo xa Xikwembu hi vanhu. Xikwembu a a xi nga lavi leswaku vanhu va fa naswona Bibele yi vula leswaku rifu i “nala.”—1 Vakorinto 15:26.

NTIYISO WA HI NTSHUNXA

15. Xana ku tiva ntiyiso hi rifu swi hi ntshunxa hi ndlela yihi?

¹⁵ Ku tiva ntiyiso hi rifu swi hi ntshunxa eka tidyondzo to tala ta mavunwa. Bibele yi hi dyondzisa leswaku lava feke a va twi ku vava kumbe ku va ni gome. A hi nge swi koti ku vulavula na vona naswona a va nge vulavuli na hina. A hi nge swi koti ku pfuna vanhu lava feke kasi na vona a va nge hi pfuni. A va nge swi koti ku hi vavisa, kutani a hi fanelanga hi va chava. Hambiswiritano, tikereke to tala ti vula leswaku vafi va hanya kun’wana nileswaku hi nga kota ku va pfuna loko hi hakela mali eka vafundhisi kumbe lava tekiwaka tanihi vanhu lava kwetsimaka. Kambe loko hi tiva ntiyiso hi rifu, a hi xisiwi.

16. Hi wahi mavunwa lawa tikereke to tala ti ma dyondzisaka hi vafi?

¹⁶ Sathana u tirhisa vukhongeri bya mavunwa leswaku a hi xisa ni ku hi endla hi ehleketa leswaku vafi va ha hanya. Hi xikombiso, tikereke tin’wana ti dyondzisa leswaku loko hi fa, ku ni nchumu wo karhi eka hina lowu yaka emahlweni wu hanya kun’wana. Xana kereke ya wena yi dyondzisa sweswo kumbe yi dyondzisa leswi Bibele yi swi vulaka hi rifu? Sathana u tirhisa mavunwa leswaku vanhu va nga n’wi yingisi Yehovha.

17. Ha yini dyondzo ya leswaku vanhu va tshwa etiheleni yi hlundzukisa Yehovha?

¹⁷ Leswi tikereke to tala ti swi dyondzisaka swi tsema nhlana. Hi xikombiso, tin’wana ti dyondzisa leswaku vanhu lava endlaka swo biha va ta tshwa hilaha ku nga heriki etiheleni. Mavunwa wolawo ma hlundzukisa Yehovha. A nge pfuki a pfumelele vanhu leswaku va xaniseka hi ndlela yoleyo! (Hlaya 1 Yohane 4:8.) Xana a wu ta titwa njhani hi munhu loyi a xupulaka n’wana wakwe hi ku n’wi hisa mavoko endzilweni? A wu ta ehleketa leswaku u ni nsele. A wu nga ta lava ku endla xinghana ni munhu wo tano. Kutani Sathana u lava leswaku hi titwa hi ndlela yoleyo hi Yehovha!

18. Ha yini hi nga fanelanga hi chava vafi?

¹⁸ Tikereke tin’wana ti dyondzisa leswaku loko vanhu va fa, va hundzuka mimoya. Tikereke to tano ti dyondzisa leswaku hi fanele hi xixima hambi ku ri ku chava mimoya yoleyo hikuva yi nga hundzuka vanghana lavakulu kumbe valala lavakulu. Vanhu vo tala va ma pfumela mavunwa lawa. Va chava vafi, kutani va gandzela vona ematshan’weni yo gandzela Yehovha. Tsundzuka leswaku vafi a va swi koti ku twa kumbe ku vona, kutani a hi fanelanga hi va chava. Yehovha i Muvumbi wa hina. I Xikwembu xa ntiyiso naswona hi fanele hi gandzela yena ntsena.—Nhlavutelo 4:11.

19. Xana ku tiva ntiyiso hi rifu swi hi pfuna njhani?

¹⁹ Loko hi tiva ntiyiso hi rifu, hi ntshunxeka eka mavunwa ya tikereke. Nakambe ntiyiso lowu wu hi pfuna ku twisisa switshembiso leswinene leswi Yehovha a swi endleke hi vutomi ni vumundzuku bya hina.

20. I yini leswi hi nga ta swi dyondza eka ndzima leyi landzelaka?

²⁰ Eka malembe yo tala lama hundzeke, nandza wa Xikwembu loyi a vuriwaka Yobo u vutise a ku: “Xana loko munhu la tiyeke emirini a fa a nga tlhela a hanya?” (Yobo 14:14) Xana hakunene swa koteka leswaku munhu loyi a feke a tlhela a hanya? Nhlamulo leyi Xikwembu xi hi nyikaka yona ku suka eBibeleni ya tsakisa swinene. Hi ta dyondza hi yona eka ndzima leyi landzelaka.

1-3. I yini lexi hinkwerhu ka hina hi nga ta ka hi nga xi balekeli naswona Yehovha u ta hi ntshunxa njhani eka xona?

EHLEKETA u gweviwe ku tshama ejele vutomi hinkwabyo hikwalaho ka vugevenga lebyi u nga byi endlangiki. A swi tshembisi leswaku u ta kala u ntshunxiwa. A wa ha ri na ntshembo naswona a xi kona lexi u nga xi endlaka. Leswi u heleriweke hi ntshembo, u kuma leswaku ku na munhu un’wana loyi a nga ni matimba yo ku humesa naswona u ku tshembisa leswaku u ta ku pfuna! A wu ta titwa njhani?

² Hinkwerhu ha fa. Hambiloko ho endla yini, a hi nge swi koti ku balekela rifu. Kambe Yehovha u ni matimba yo hi ponisa eka rifu. Nakambe u hi tshembisa leswaku “rifu i nala wo hetelela la nga ta herisiwa.”—1 Vakorinto 15:26.

³ Ehleketa ntsako lowu u nga ta va na wona loko u nga ha vilerisiwi hi ku fa! Kambe Yehovha a nge herisi rifu ntsena. U ta tlhela a pfuxa lava se va feke. Ehleketa ndlela leyi sweswo swi nga ta vula swona eka wena. U tshembisa leswaku lava “hluriweke hi rifu” va ta tlhela va hanya. (Esaya 26:19) Leswi hi swona leswi Bibele yi swi vulaka hi ku pfuxiwa ka vafi.

LOKO MUNHU LOYI HI N’WI RHANDZAKA A FA

4. (a) I yini lexi nga hi chavelelaka loko hi feriwa hi xirho xa ndyangu kumbe munghana? (b) A ku ri vamani vanghana lavakulu va Yesu?

⁴ Loko xirho xa ndyangu kumbe munghana lonkulu a fa, ku vava ni gome leri hi vaka na rona a swi tiyiseleleki. Hi titwa hi nga pfuni nchumu. A hi nge swi koti ku pfuxa munhu yoloye leswaku a tlhela a hanya. Kambe Bibele ya hi chavelela. (Hlaya 2 Vakorinto 1:3, 4.) A hi kambisiseni xikombiso lexi kombisaka ndlela leyi Yehovha na Yesu va swi lavaka ha yona ku pfuxa vanhu lava hi va rhandzaka. Loko Yesu a ha ri emisaveni, a a tala ku endzela Lazaro ni vamakwavo vakwe, Marta na Mariya. Havanharhu ka vona a va ri vanghana lavakulu va Yesu. Bibele yi ri: ‘Yesu a a rhandza Marta, Mariya na Lazaro.’ Kutani siku rin’wana Lazaro u file.—Yohane 11:3-5.

5, 6. (a) Yesu u endle yini loko a vona ndyangu wa ka va Lazaro wu ri eku rileni? (b) Ha yini swi chavelela ku tiva ndlela leyi Yesu a titweke ha yona hi rifu?

⁵ Yesu u ye a ya chavelela Marta na Mariya. Loko Marta a twa leswaku Yesu u le ku teni, u ye ehandle ka muti kutani a ya hlangana na yena. A a tsakile loko a vona Yesu kambe u n’wi byele leswi: “Loko a wu ri kona laha, makwerhu ingi a nga fanga.” Marta a a ehleketa leswaku Yesu u hlwele ku fika. Endzhaku, loko Yesu a vona Mariya makwavo wa Marta a ri eku rileni, u twe ku vava kutani a rila. (Yohane 11:21, 33, 35) U twe ku vava swinene ku fana ni loku hi ku twaka loko hi feriwa hi vanhu lava hi va rhandzaka.

⁶ Ku tiva leswaku Yesu u titwa hi ndlela leyi hi titwaka ha yona hi rifu swa hi chavelela. Nakambe Yesu u fana ni Tata wakwe. (Yohane 14:9) Yehovha u ni matimba yo ri herisela makumu rifu naswona sweswo hi swona leswi a nga ta swi endla ku nga ri khale.

“LAZARO, HUMA!”

7, 8. Ha yini Marta a a nga swi lavi leswaku ku susiwa ribye eka sirha ra Lazaro, kambe xana Yesu u endle yini?

⁷ Loko Yesu a fika esirheni leri ntsumbu wa Lazaro a wu ri eka rona, a ri pfariwe hi ribye lerikulu. Yesu u te: “Susani ribye.” Kambe Marta a a nga swi lavi ku ri susa. Ntsumbu wa Lazaro se a wu ri ni mune wa masiku wu ri kwalaho. (Yohane 11:39) A a nga swi tivi leswi Yesu a a lava ku swi endla leswaku a pfuna buti wakwe.

⁸ Yesu u byele Lazaro a ku: “Huma!” Leswi Marta na Mariya va swi voneke a swi hlamarisa. “Munhu loyi a a file a huma, milenge yakwe ni mavoko swi boheleriwe hi swo tsondzela.” (Yohane 11:43, 44) Lazaro u pfuxiwile! U hlanganisiwe ni ndyangu wa ka vona swin’we ni vanghana vakwe. Va n’wi khoma ni ku tlhela va vulavula na yena. Hakunene rero a ku ri singita! Yesu u pfuxe Lazaro.

“NHWANYANA, NDZI RI EKA WENA, PFUKA!”

9, 10. (a) I mani loyi a nyikeke Yesu matimba yo pfuxa vanhu? (b) Ha yini ku pfuxiwa ka vanhu volavo ku ri ka nkoka eka hina?

⁹ Xana Yesu a tirhisa matimba yakwe ku pfuxa vanhu? Doo! Loko a nga si pfuxa Lazaro, Yesu u khongele eka Yehovha naswona U n’wi nyike matimba yo pfuxa Lazaro. (Hlaya Yohane 11:41, 42.) Lazaro a hi yena ntsena loyi a pfuxiweke. Bibele yi hi byela hi xinhwanyetana xa malembe ya 12 lexi a xi vabya swinene. Tata wa xona Yayiro, a nga ha swi tivi leswaku u ta endla yini kutani u kombele Yesu leswaku a xi horisa. A xo va xoxe. Loko a ri karhi a vulavula na Yesu, vanhu van’wana va tile kutani va ku: ‘N’wana wa wena wa nhwanyana u file! U nga ha n’wi karhati Mudyondzisi.’ Kambe Yesu u byele Yayiro a ku: “U nga chavi, ntsena kombisa ripfumelo, kutani yena u ta ponisiwa.” Hiloko a famba na Yayiro ekaya rakwe. Loko va ri ekusuhi ni yindlu, Yesu u vone ni ku twa vanhu va ri karhi va rila. Yesu u va byele a ku: “Tshikani ku rila, hikuva a nga fanga kambe u lo etlela.” Vatswari va xona va nga ha va va hlamarile leswaku Yesu a a vula yini. Yesu u kombele vanhu hinkwavo leswaku va huma kutani a teka vatswari va xona a nghena na vona endlwini leyi xinhwanyetana a xi etlele eka yona. Hi musa Yesu u xi khome voko kutani a ku: “Nhwanyana, ndzi ri eka wena, pfuka!” Ehleketa ntsako lowu vatswari va xona va veke na wona loko hi ku hatlisa xi pfuka kutani xi sungula ku fambafamba! Yesu u pfuxe xinhwanyetana xa vona. (Marka 5:22-24, 35-42; Luka 8:49-56) Ku sukela hi siku rero ku ya emahlweni, loko va vona xinhwanyetana xa vona, a va tsundzuka leswi Yehovha a va endleleke swona hi ku tirhisa Yesu.a

¹⁰ Vanhu lava Yesu a va pfuxeke va tlhele va fa. Kambe leswi hi swi hlayaka hi vanhu lava i swa nkoka hikuva swi hi nyika ntshembo wa xiviri. Yehovha u lava ku pfuxa vanhu naswona u ta va pfuxa.

LESWI HI SWI DYONDZAKA HI TA KU PFUXIWA KA VAFI

11. Eklesiasta 9:5 yi hi dyondzisa yini hi Lazaro?

¹¹ Bibele yi swi veka erivaleni leswaku “lava feke, a va tivi nchumu nikatsongo.” A swi ri tano eka Lazaro. (Eklesiasta 9:5) Hi laha Yesu a vuleke hakona, a swi fana ni loko Lazaro a etlele. (Yohane 11:11) Loko a ri esirheni, Lazaro a nga tivi “nchumu nikatsongo.”

12. Hi swi tivisa ku yini leswaku Lazaro u pfuxiwile hakunene?

¹² Vanhu vo tala va swi vonile loko Yesu a pfuxa Lazaro. Hambi ku ri valala va Yesu a va swi tiva leswaku u ri endlile singita ro tano. Lazaro a hanya naswona sweswo swi kombise leswaku u pfuxiwile hakunene. (Yohane 11:47) Nakambe vanhu vo tala va endzele Lazaro naswona hikwalaho ka sweswo va sungule ku tshemba leswaku Yesu a rhumiwe hi Xikwembu. Valala va Yesu a swi va tsakisanga sweswo, kutani va pulane ku dlaya Yesu na Lazaro.—Yohane 11:53; 12:9-11.

13. Ha yini hi tiyiseka leswaku Yehovha u ta pfuxa lava feke?

¹³ Yesu u vule leswaku ‘hinkwavo lava nga emasirheni’ va ta pfuxiwa. (Yohane 5:28) Leswi swi vula leswaku hinkwavo lava Yehovha a va tsundzukaka va ta tlhela va hanya. Kambe leswaku Yehovha a pfuxa munhu, u fanele a tsundzuka swilo hinkwaswo leswi munhu yoloye a swi endleke. Xana hakunene a nga swi endla sweswo? Ku ni tinyeleti ta magidi ya timiliyoni exibakabakeni. Bibele yi vula leswaku Yehovha u tiva vito ra nyeleti yin’wana ni yin’wana. (Hlaya Esaya 40:26.) Loko a tiva vito ra nyeleti ha yin’we, ha tiyiseka leswaku swi ta n’wi olovela ku tsundzuka swilo hinkwaswo leswi endliweke hi lava a nga ta va pfuxa. Xa nkoka swinene, Yehovha u tumbuluxe swilo hinkwaswo, kutani ha swi tiva leswaku u ni matimba yo pfuxa lava feke.

14, 15. Marito ya Yobo ma hi dyondzisa yini hi ku pfuxiwa ka lava feke?

¹⁴ Yobo wanuna wo tshembeka a a tshemba leswaku ku ta va ni ku pfuxiwa ka vafi. U vutise a ku: “Xana loko munhu la tiyeke emirini a fa a nga tlhela a hanya?” Kutani u byele Yehovha a ku: “U ta vitana, mina ndzi ta ku hlamula. U ta navela ntirho wa mavoko ya wena.” Yobo a a swi tiva leswaku ku ta fika nkarhi lowu Yehovha a nga ta pfuxa lava feke.—Yobo 14:13-15.

¹⁵ Xana u titwa njhani hi ntshembo wa ku pfuxiwa ka lava feke? U nga ha tivutisa u ku, ‘Xana ndyangu wa ka hina swin’we ni vanghana va mina lava feke, va ta pfuxiwa?’ Hakunene swa hi chavelela ku tiva leswaku Yehovha u lava ku pfuxa lava feke. A hi voneni leswi Bibele yi swi vulaka hi laha va nga ta tshama kona ni leswaku i vamani lava nga ta pfuxiwa.

VA “TA TWA RITO RA YENA KUTANI VA HUMA”

16. Lava pfuxiweke va ta tiphina hi vutomi bya njhani laha misaveni?

¹⁶ Enkarhini lowu hundzeke, lava pfuxiweke va hlanganisiwe ni mindyangu ya vona swin’we ni vanghana va vona laha misaveni. Nakambe swi ta va tano enkarhini lowu taka, kambe swi ta va hi ndlela leyikulu. Ha yini? Hikuva lava nga ta pfuxiwa laha misaveni va ta va ni lunghelo ro hanya hilaha ku nga heriki naswona a va nge he tlheli va fa. Nakambe va ta hanya emisaveni leyi hambaneke swinene ni leyi hi hanyaka eka yona namuntlha. Tinyimpi, vugevenga ni vuvabyi swi ta va swi nga ha ri kona.

17. I vamani lava nga ta pfuxiwa?

¹⁷ I vamani lava nga ta pfuxiwa? Yesu u vule leswaku ‘hinkwavo lava nga emasirheni va ta twa rito ra yena kutani va huma.’ (Yohane 5:28, 29) Nakambe Nhlavutelo 20:13 yi hi byela leswi: ‘Lwandle ri humesa vafi lava nga eka rona, rifu ni Sirha swi humesa vafi lava nga eka swona.’ Hakunene, vanhu va magidi ya timiliyoni va ta tlhela va hanya. Nakambe muapostola Pawulo u vule leswaku ku ta va ni ku pfuxiwa ka “lava lulameke ni ka lava nga lulamangiki.” (Hlaya Mintirho 24:15.) Xana sweswo swi vula yini?

18. I vamani “lava lulameke” lava nga ta pfuxiwa?

¹⁸ “Lava lulameke” va katsa malandza yo tshembeka ya Yehovha lama hanyeke emahlweni ko va Yesu a ta laha misaveni. Vanhu vo fana na Nowa, Abrahama, Sara, Muxe, Rhuti na Estere va ta pfuxiwa leswaku va hanya laha misaveni. U nga hlaya hi van’wana va vavanuna ni vavasati lava eka Vaheveru ndzima 11. Ku vuriwa yini hi malandza yo tshembeka ya Yehovha lama faka enkarhini wa hina? Na wona ma vuriwa lama “lulameke,” kutani ma ta pfuxiwa.

19. I vamani “lava nga lulamangiki”? Hi rihi lunghelo leri Yehovha a nga ta va nyika rona?

¹⁹ “Lava nga lulamangiki” va katsa vanhu va magidi ya timiliyoni lava nga vangiki ni lunghelo ro tiva Yehovha. Hambileswi va feke, Yehovha a nga va rivalanga. U ta va pfuxa naswona va ta va ni lunghelo ro dyondza hi yena ni ku n’wi tirhela.

20. Ha yini ku ta ka ku nga pfuxiwi un’wana ni un’wana loyi a feke?

²⁰ Xana leswi swi vula leswaku ku ta pfuxiwa un’wana ni un’wana loyi a feke? Doo! Yesu u vule leswaku vanhu van’wana a va nge pfuxiwi. (Luka 12:5) I mani loyi a nga ta endla xiboho xa leswaku i mani a nga ta pfuxiwa kumbe i mani loyi a nga ta ka a nga pfuxiwi? Yehovha i Muavanyisi wo hetelela, kambe u tlhele a nyika Yesu vulawuri bya ku va “muavanyisi wa lava hanyaka ni lava feke.” (Mintirho 10:42) Un’wana ni un’wana loyi a nga ta avanyisiwa tanihi loyi a endlaka swilo swo biha naswona a nga lavi ku hundzuka a nge pfuxiwi.—Vona Nhlamuselo ya le hansi 19.

KU PFUXERIWA KU YA HANYA ETILWENI

21, 22. (a) Munhu loyi a pfuxeriwaka ku ya hanya etilweni u pfuxiwa a ri ni miri wa njhani? (b) I mani munhu wo sungula loyi a pfuxiweke ku ya hanya etilweni?

²¹ Bibele yi tlhela yi hi byela leswaku ku ni vanhu van’wana lava nga ta hanya etilweni. Loko munhu wo karhi a pfuxeriwa ku ya hanya etilweni, a nga pfuxiwi a ri ni miri wa nyama. U pfuxiwa a ri munhu wa moya.

²² Yesu i munhu wo sungula ku pfuxiwa a ri munhu wa moya. (Yohane 3:13) Hi siku ra vunharhu Yesu a dlayiwile, Yehovha u n’wi pfuxile. (Pisalema 16:10; Mintirho 13:34, 35) Yesu a nga pfuxiwanga a ri ni miri wa nyama. Muapostola Petro u hlamusela leswaku Yesu ‘u dlayiwe a ri wa nyama, kambe u hanyisiwe a ri wa moya.’ (1 Petro 3:18) Yesu u pfuxiwe a ri munhu wa moya loyi a nga ni matimba! (1 Vakorinto 15:3-6) Kambe Bibele yi vula leswaku a hi yena ntsena loyi a ta pfuxiwa hi ndlela yoleyo.

23, 24. I vamani lava “ntlhambinyana” lava Yesu a vulavuleke ha vona naswona i vangani?

²³ Emahlweni ko va Yesu a fa, u byele vadyondzisiwa vakwe vo tshembeka a ku: “Ndzi ya mi lunghiselela ndhawu.” (Yohane 14:2) Leswi a swi vula leswaku van’wana va valandzeri vakwe a va ta pfuxeriwa ku ya hanya etilweni na yena. Xana i vangani lava nga ta hanya etilweni? Yesu u vule leswaku a va ta va nhlayo leyitsongo, “ntlhambinyana.” (Luka 12:32) Muapostola Yohane u boxe nhlayo leyi kongomeke loko a vona Yesu a ‘yime eNtshaveni ya Siyoni, a ri ni lava 144 000.”—Nhlavutelo 14:1.

²⁴ Xana Vakreste va 144 000 a va ta pfuxiwa rini? Bibele yi hi byela leswaku leswi a swi ta endleka endzhaku ka loko Kreste a sungule ku fuma etilweni. (1 Vakorinto 15:23) Sweswi hi hanya enkarhini wolowo naswona vo tala va lava 144 000 se va pfuxeriwe ku ya hanya etilweni. Lava va ha riki laha misaveni naswona va faka sweswi va ta pfuxeriwa ku ya hanya etilweni. Hambiswiritano, vanhu vo tala va ta pfuxiwa enkarhini lowu taka leswaku va hanya emisaveni leyi nga Paradeyisi.

25. Hi ta dyondza yini eka ndzima leyi landzelaka?

²⁵ Ku nga ri khale, Yehovha u ta ntshunxa vanhu hinkwavo eka rifu naswona ri ta heriseriwa makumu! (Hlaya Esaya 25:8.) Kambe lava yaka etilweni va ya endla yini? Bibele yi hlamusela leswaku va ta fuma na Yesu eMfun’weni wa Xikwembu. Hi ta dyondza leswi engetelekeke hi mfumo lowu eka ndzima leyi landzelaka.