“Marhambu Lama Omeke” Ni “Timbhoni Timbirhi”—Swi Fambisana Njhani?

HI 1919 ku hetiseke vuprofeta byimbirhi lebyi yelanaka: byin’wana i bya “marhambu lama omeke,” kasi lebyin’wana i bya “timbhoni timbirhi.” Xivono xa “marhambu lama omeke” xi vulavula hi nkarhi wo leha swinene (lowu tekeke madzana ya malembe) lowu heleke loko ntlawa lowukulu wa vanhu va Xikwembu wu sungula ku hanya. (Ezek. 37:2-4; Nhlav. 11:1-3, 7-13) Vuprofeta lebyi vulavulaka hi “timbhoni timbirhi” byi hlamusela nkarhi wo koma (lowu hetisekeke ku sukela eku heleni ka 1914 ku ya eku sunguleni ka 1919) lowu heleke loko ntlawa lowutsongo wa malandza ya Xikwembu wu sungula ku hanya. Vuprofeta lebyimbirhi byi vulavula hi ku pfuxiwa ko fanekisela naswona habyimbirhi byi hetiseke hi 1919 loko Yehovha a endle leswaku malandza yakwe lama totiweke ma “yima hi milenge,” ma huma evuhlongeni bya Babilona Lonkulu kutani ma hlengeletiwa evandlheni leri pfuxetiweke.—Ezek. 37:10.

Hambiswiritano, xiya leswaku ku hetiseka ka vuprofeta lebyimbirhi ka hambana hi ndlela ya nkoka. Vuprofeta bya “marhambu lama omeke” byi vulavula hi ku hanya ka swirho hinkwaswo swa masalela ya vatotiwa. Hambiswiritano, vuprofeta bya “timbhoni timbirhi” byi vulavula hi ku hanya ka swirho swin’wana swa malandza ya Xikwembu lama totiweke, lama a ma rhangela nhlangano ma tlhela ma hlawuriwa ku va “nandza wo tshembeka ni wo tlhariha.”—Mat. 24:45; Nhlav. 11:6.a

‘Ndhawu Leyi Nga Rivala A Yi Tele Hi Marhambu’—Ezek. 37:1

1. ENDZHAKU KA 100 C.E.

   Ku sukela hi va-100 C.E. ku ya emahlweni loko vandlha ra Vakreste lava totiweke ri dlayiwe hi ndlela yo fanekisela, ‘ndhawu leyi nga rivala’ a yi tele hi “marhambu”

2. EKU HELENI KA 1914

   1919: “Marhambu lama omeke” ma sungule ku hanya loko Yehovha a endle leswaku vatotiwa hinkwavo va huma eBabilona Lonkulu kutani va hlengeletiwa evandlheni leri pfuxetiweke

“Timbhoni Timbirhi”—Nhlav. 11:3

1. EKU HELENI KA 1914

   ti chumayela ti ambale “swiambalo swo khwaxa”

   1914: “Timbhoni timbirhi” a ti chumayela ti ambale “swiambalo swo khwaxa” ku ringana malembe manharhu ni hafu. Loko ku hela nkarhi wolowo, ti dlayiwile hi ndlela yo fanekisela

2. rifu ro fanekisela

3. EKU SUNGULENI KA 1919

   1919: “Timbhoni timbirhi” ti sungule ku hanya loko ntlawa lowutsongo wa vamakwerhu lava totiweke lava a va rhangela nhlangano va hlawuriwe ku va “nandza wo tshembeka ni wo tlhariha”