BOKISI RO DYONDZISA 10C
Hi Pfuniwa Ku Tlhela Hi Yima Hi Milenge
HI NGA tiyisiwa hi ku anakanyisisa hi dyondzo leyi nga eka xivono lexi tsakisaka lexi kumekaka eka Ezekiyele 37:1-14, ku nga dyondzo leyi hi nga yi tirhisaka eka swiyimo swa hina vini. Hi yihi dyondzo ya kona?
Mikarhi yin’wana hi nga titwa hi tshikilelekile swinene hikwalaho ka swiphiqo swa vutomi, lerova hi sala hi lo lakahla, hi nga ha koti ku endla nchumu. Hambiswiritano, mikarhi yoleyo, hi nga tiyisiwa loko hi anakanyisisa hi xivono lexi tsakisaka xa Ezekiyele xa ku pfuxetiwa. Hikwalaho ka yini? Eka vuprofeta lebyi, hi dyondza leswaku Xikwembu lexi nga ni matimba yo endla leswaku marhambu lama feke ma tlhela ma hanya, hakunene xi nga hi nyika matimba lawa hi ma lavaka leswaku hi hlula swiphiqo, hambi ku ri leswi hi ku ya hi langutelo ra munhu swi vonakaka onge a swi koteki ku swi hlula.—Hlaya Pisalema 18:29; Filp. 4:13.
I swinene ku tsundzuka leswaku madzana ya malembe Ezekiyele a nga si velekiwa, muprofeta Muxe u vule leswaku Yehovha a ngo va ni matimba ntsena kambe wa swi rhandza ku tirhisa matimba yakwe leswaku a pfuna vanhu vakwe. Muxe u tsale a ku: “Xikwembu i vutumbelo ku sukela khale, mavoko ya xona lama tshamaka hilaha ku nga heriki ma ku khomile.” (Det. 33:27) Hakunene, hi nga tiyiseka leswaku loko hi kombela mpfuno eka Xikwembu xa hina hi mikarhi yo tika, Yehovha u ta hi khoma hi mavoko yakwe, ivi hi musa a hi yimisa kutani a hi pfuna leswaku hi tlhela hi yima hi milenge.—Ezek. 37:10.