Mfumo wa Xikwembu i mhaka ya nkoka leyi ku vulavuriwaka ha yona eBibeleni. Yehovha u ta tirhisa Mfumo wolowo leswaku a endla misava yi va Paradeyisi. I yini Mfumo wa Xikwembu? Hi swi tivisa ku yini leswaku sweswi wu le ku fumeni? I yini leswi se wu nga swi endla naswona wu ta endla yini enkarhini lowu taka? Hi ta bula hi swivutiso leswi eka nhlokomhaka leyi ni le ka tinhlokomhaka timbirhi leti landzelaka.

1. I yini Mfumo wa Xikwembu naswona i mani Hosi ya wona?

Mfumo wa Xikwembu i mfumo lowu vekiweke hi Yehovha Xikwembu. Yesu Kreste i Hosi ya wona naswona u fuma a ri etilweni. (Matewu 4:17; Yohane 18:36) Bibele yi vula leswi hi Yesu: “U ta va Hosi . . . hilaha ku nga heriki.” (Luka 1:32, 33) Yesu hi yena Hosi ya Mfumo wa Xikwembu naswona u ta fuma vanhu hinkwavo emisaveni.

2. Yesu u ta fuma na vamani?

Yesu a nge fumi a ri yexe. Vanhu va ‘tinyimba hinkwato, tindzimi hinkwato ni matiko hinkwawo va ta va tihosi emisaveni.’ (Nhlavutelo 5:9, 10) I vanhu vangani lava nga ta fuma na Kreste? Vakreste va timiliyoni va ve valandzeri va Kreste endzhaku ka loko a te emisaveni. Kambe eka vanhu volavo, i vanhu va 144 000 ntsena lava nga ta fuma na Yesu. (Hlaya Nhlavutelo 14:1-4.) Vakreste lavan’wana va ta fumiwa hi Mfumo wa Xikwembu.—Pisalema 37:29.

3. Mfumo wa Xikwembu wu yi tlula njhani mifumo ya vanhu?

Hambiloko tihosi leti fumaka vanhu ti lava ku endla leswinene, a ti na wona matimba yo endla hinkwaswo leswi ti swi lavaka. Hi ntolovelo lava salaka va teka xitulu, va nga ha va ni makwanga va tlhela va nga vi na mhaka ni vanhu. Kambe Yesu, Hosi ya Mfumo wa Xikwembu a nge pfuki a tekeriwe xitulu. Xikwembu xi “[simeke] mfumo lowu nga ta ka wu nga wisiwi.” (Daniyele 2:44) Yesu u ta fuma misava hinkwayo naswona a nge vi na xihlawuhlawu. U ni rirhandzu, musa, u lulamile naswona u ta dyondzisa vanhu leswaku va va lava lulameke, va rhandzana ni ku va ni musa.—Hlaya Esaya 11:9.

4. Ku ni mfumo wa matimba lowu nga ta fuma misava hinkwayo

A ku na hosi leyi nga tshama yi va ni matimba ku tlula Yesu Kreste. Hlaya Matewu 28:18, ivi mi bula hi xivutiso lexi:

• Loko Yesu a pimanisiwa ni vafumi lava nga kona, xana u ni matimba yo fikela kwihi?

Hi ntolovelo, mifumo ya vanhu ya cincacinca naswona tihosi ta kona ti fuma ndhawu yo karhi ntsena. Ku vuriwa yini hi Mfumo wa Xikwembu? Hlaya Daniyele 7:14, ivi mi bula hi swivutiso leswi:

• Hikwalaho ka yini ku ri mahungu lamanene ku tiva leswaku Mfumo wa Xikwembu “a wu nge lovisiwi”?

• Hikwalaho ka yini swi tsakisa ku tiva leswaku wu ta fuma misava hinkwayo?

5. Mfumo wa Xikwembu wu ta siva mifumo ya vanhu

Hikwalaho ka yini Mfumo wa Xikwembu wu fanele wu siva mifumo ya vanhu? Tlanga VHIDIYO, ivi mi bula hi xivutiso lexi landzelaka.

VHIDIYO: Mfumo Wa Xikwembu I Yini?—Xiphemu (1:41)

• Xiyimo xi njhani hileswi ku fumaka mifumo ya vanhu?

Hlaya Eklesiasta 8:9, ivi mi bula hi swivutiso leswi:

• U vona onge hi wihi mfumo lowu wu faneleke wu fuma eka Mfumo wa Xikwembu ni mifumo ya vanhu? Hikwalaho ka yini u vula tano?

6. Mfumo wa Xikwembu wu ni vafumi lava hi tivaka kahle

Leswi Yesu Hosi ya hina a nga tshama a va munhu wa nyama, wa swi kota ku hi “twela vusiwana eku tsaneni ka hina.” (Vaheveru 4:15) Yehovha u hlawule vavanuna ni vavasati vo tshembeka va 144 000 lava nga ta fuma na Yesu lava “humaka eka tinyimba hinkwato, tindzimi hinkwato, vanhu hinkwavo ni matiko hinkwawo.”—Nhlavutelo 5:9.

• Xana u vona swi ri swinene ku fumiwa hi Yesu ni vafumikulobye lava nga tshama va va vanhu lava hanyeke laha misaveni? Hikwalaho ka yini u vula tano?

7. Mfumo wa Xikwembu wu ni milawu leyinene yo tlula ya vanhu

Mifumo yi veka milawu leswaku yi pfuna vaakatiko va yona ni ku va sirhelela. Mfumo wa Xikwembu na wona wu ni milawu leyi lava fumiwaka hi wona va faneleke va yi yingisa. Hlaya 1 Vakorinto 6:9-11, ivi mi bula hi swivutiso leswi:

• U vona onge misava yi ta va njhani loko vanhu hinkwavo va hanya hi milawu ya Xikwembu?a

• Xana u vona swi fanerile ku va Yehovha a lava leswaku vanhu hinkwavo lava nga ta fumiwa hi Mfumo wakwe va yingisa milawu ya wona? Hikwalaho ka yini u vula tano?

• I yini lexi kombisaka leswaku vanhu lava nga yi yingisiki milawu leyi, va nga swi kota ku cinca mahanyelo?—Vona ndzimana 11.

NKATSAKANYO

Mfumo wa Xikwembu i mfumo wa le tilweni lowu nga ta fuma misava hinkwayo.

Mpfuxeto

• I vamani vafumi va Mfumo wa Xikwembu?

• Mfumo wa Xikwembu wu yi tlula njhani mifumo ya vanhu?

• I yini swin’wana leswi Yehovha a swi languteleke eka lava nga ta fumiwa hi Mfumo wakwe?

KUMA LESWI ENGETELEKEKE

Twana leswi Yesu a swi dyondziseke mayelana ni laha Mfumo wa Xikwembu wu nga kona.

“Xana Mfumo Wa Xikwembu Wu Le Mbilwini Ya Wena?” (Nhlokomhaka leyi kumekaka eka website)

Hikwalaho ka yini Timbhoni ta Yehovha ti seketela Mfumo wa Xikwembu ntsena?

A Va Seketela Mfumo Wa Xikwembu Ntsena (1:43)

Kambisisa leswi Bibele yi swi vulaka hi lava 144 000, lava Yehovha a va hlawuleke leswaku va fuma na Yesu.

“I Vamani Lava Yaka eTilweni?” (Nhlokomhaka leyi kumekaka eka website)

I yini lexi pfuneke wansati loyi a a khomiwile leswaku a swi vona leswaku Xikwembu hi xona ntsena xi nga endlaka leswaku ku va ni vululami emisaveni?

“Ndlela Leyi Ndzi Swi Tiveke Ha Yona Leswaku Ha Yini Ku Nga Ri Na Vululami” (Xalamuka!, November 2011)

Mfumo wa Xikwembu wu sungule ku fuma etilweni hi 1914. Wolowo ku ve nkarhi wa ku sungula ka masiku yo hetelela ya ku fuma ka vanhu. Hi swi tivisa ku yini? Kambisisa vuprofeta bya Bibele ni leswi endlekaka laha misaveni namuntlha ku katsa ni ndlela leyi vanhu va tikhomeke ha yona ku sukela hi 1914.

1. I yini leswi Bibele yi swi profeteke?

Buku ya Bibele ya Daniyele yi vule leswaku Mfumo wa Xikwembu a wu ta sungula ku fuma eku heleni ka nkarhi lowu vitaniwaka “malembe ya nkombo.” (Daniel 4:16, 17) Endzhaku ka malembe yo tala, Yesu u vule leswaku nkarhi wolowo i “nkarhi lowu vekiweke wa matiko,” naswona u dyondzise leswaku a wu nga si hela. (Luka 21:24) Hilaha hi nga ta dyondza hakona, malembe ya nkombo ma hele hi 1914.

2. Ku sukela hi 1914 misava yi njhani naswona vanhu va tikhoma njhani?

Vadyondzisiwa va Yesu va n’wi vutise va ku: “Xi ta va xihi xikombiso xa ku vuya ka wena ni xa ku fika ka makumu?” (Matewu 24:3) Loko Yesu a va hlamula, u va byele hi swilo swo tala leswi a swi ta endleka endzhaku ka loko a sungule ku fuma etilweni tanihi Hosi ya Mfumo wa Xikwembu. Swin’wana swa swona swi katsa tinyimpi, ku kayivela ka swakudya ni ku tsekatseka ka misava. (Hlaya Matewu 24:7.) Bibele yi tlhele yi vula leswaku ndlela leyi vanhu a va ta tikhoma ha yona “emasikwini yo hetelela” a swi ta ‘tika ku hanya eka wona.’ (2 Timotiya 3:1-5) Swilo leswi hinkwaswo, swi sungule ku vonaka ku sukela hi 1914.

3. Hikwalaho ka yini misava yi nyanye ku biha ku sukela loko Mfumo wa Xikwembu wu sungule ku fuma?

Loko Yesu a ha ku va Hosi ya Mfumo wa Xikwembu, u lwe na Sathana ni madimona yakwe etilweni. Sathana u hluriwile. Bibele yi vula leswaku ‘u lahleriwe emisaveni ni tintsumi ta yena.’ (Nhlavutelo 12:9, 10, 12) Sathana u hlundzukile swinene hikuva wa swi tiva leswaku u ta herisiwa. Hikwalaho ka sweswo, wa hi cangarisa namuntlha. A swi hlamarisi leswi swiyimo swa misava swi yaka swi nyanya ku biha! Hambiswiritano, Mfumo wa Xikwembu wu ta herisa swiphiqo leswi hinkwaswo.

ANAKANYISISA

4. Vuprofeta bya Bibele byi kombisa leswaku Mfumo wa Xikwembu wu sungule ku fuma hi 1914

VHIDIYO: Mfumo Wa Xikwembu Wu Sungule Ku Fuma Hi 1914 (5:02)

Xikwembu xi endle leswaku Hosi Nebukadnetsara wa le Babilona a lorha hi leswi a swi ta endleka. Norho wolowo ni leswi Daniyele a swi vuleke hi wona swi swi veka erivaleni leswaku a wu fambisana ni mfumo wa Nebukadnetsara swin’we ni Mfumo wa Xikwembu.—Hlaya Daniyele 4:17.a

Hlaya Daniyele 4:20-26, ivi mi tirhisa chati leyi ku hlamula swivutiso leswi landzelaka:

• (A) Nebukadnetsara u vone yini enorhweni wakwe?—Vona ndzimana 20 na 21.

• (B) A ku ta endleka yini hi murhi lowu? —Vona ndzimana 23.

• (C) A ku ta endleka yini eku heleni ka “malembe ya nkombo”?—Vona ndzimana 26.

Norho Lowu Vulavulaka Hi Murhi Wu Fambisana Njhani Ni Mfumo Wa Xikwembu?

VUPROFETA (Daniyele 4:20-36)

Vuhosi

(A) Murhi lowukulu

Vuhosi byi kavanyeteka

(B) “Tsemani murhi” kutani mi tshika “malembe ya nkombo” ma hundza

Vuhosi byi ya emahlweni

(C) “U ta tlhela u nyikiwa mfumo”

Loko vuprofeta lebyi byi hetiseka ro sungula . . .

• (D) Murhi a wu yimela mani? —Vona ndzimana 22.

• (E) I yini leswi nga endleka leswaku a nga ha vi hosi?​—Hlaya Daniyele 4:29-33.

• (F) Ku endleke yini hi Nebukadnetsara loko ku hela “malembe ya nkombo”?​—Hlaya Daniyele 4:34-36.

KU HETISEKA KO SUNGULA

Vuhosi

(D) Nebukadnetsara, Hosi ya Babilona

Vuhosi byi kavanyeteka

(E) Endzhaku ka 606 B.C.E., Nebukadnetsara u hlangane nhloko a nga ha koti ku fuma ku ringana malembe ya nkombo

Vuhosi byi ya emahlweni

(F) Miehleketo ya Nebukadnetsara yi vuyile kutani a sungula ku tlhela a fuma

Loko vuprofeta lebyi byi hetiseka ra vumbirhi . . .

• (G) Murhi a wu yimela vamani?​—Hlaya 1 Tikronika 29:23.

• (H) I yini leswi nga endleka leswaku ti nga ha fumi? Hi swi tivisa ku yini leswaku a ti nga ri eku fumeni loko Yesu a ri laha misaveni?​—Hlaya Luka 21:24.

• (I) Mfumo lowu wu vuyeteriwe rini naswona kwihi?

KU HETISEKA KA VUMBIRHI

Vuhosi

(G) Tihosi ta Vaisrayele leti yimelaka Mfumo wa Xikwembu

Vuhosi byi kavanyeteka

(H) Muti wa Yerusalema wu lovisiwa, leswi endleke leswaku tihosi ta Vaisrayele ti nga ha koti ku fuma ku ringana malembe ya 2 520

Vuhosi byi ya emahlweni

(I) Yesu a sungula ku fuma etilweni tanihi Hosi ya Mfumo wa Xikwembu

5. Misava yi cincile ku sukela hi 1914

Tlanga VHIDIYO.

VHIDIYO: Misava Yi Cincile Ku Sukela Hi 1914 (1:10)

Yesu u hlamusele ndlela leyi misava a yi ta va ha yona endzhaku ka loko a ri Hosi. Hlaya Luka 21:9-11, ivi mi bula hi xivutiso lexi:

• Hi swihi swiendlakalo leswi boxiweke eka tsalwa leri leswi u tweke ha swona kumbe u swi voneke swi endleka?

Muapostola Pawulo u hlamusele ndlela leyi vanhu a va ta tikhoma ha yona emasikwini yo hetelela ya ku fuma ka vanhu. Hlaya 2 Timotiya 3:1-5, ivi mi bula hi xivutiso lexi:

• Eka leswi hi swi hlayeke, hi swihi leswi u swi xiyeke eka vanhu namuntlha?

6. Swi kombise hi mitirho leswaku wa tshemba leswaku Mfumo wa Xikwembu wa fuma

Hlaya Matewu 24:3, 14, ivi mi bula hi swivutiso leswi:

• Hi wihi ntirho wa nkoka lowu kombisaka leswaku Mfumo wa Xikwembu wu le ku fumeni sweswi?

• U nga katseka njhani eka ntirho lowu?

Mfumo wa Xikwembu wu le ku fumeni sweswi naswona siku ra leswaku wu fuma misava hinkwayo ri tshinele. Hlaya Vaheveru 10:24, 25, ivi mi bula hi xivutiso lexi:

• I yini leswi un’wana ni un’wana wa hina a faneleke a swi endla leswi hi “vonaka siku ri tshinela”?

NKATSAKANYO

Vuprofeta bya Bibele ni leswi endlekaka namuntlha swi kombisa leswaku Mfumo wa Xikwembu wu le ku fumeni sweswi. Hi kombisa leswaku ha swi tshemba leswi hi ku chumayela van’wana hi mhaka leyi ni ku va kona eka tinhlengeletano ta vandlha.

Mpfuxeto

• Ku endleke yini eku heleni ka malembe ya nkombo lawa Bibele yi profeteke ha wona eka buku ya Daniyele?

• I yini lexi endlaka u tshemba leswaku Mfumo wa Xikwembu wu sungule ku fuma hi 1914?

• U nga swi kombisa njhani leswaku wa tshemba leswaku Mfumo wa Xikwembu wu le ku fumeni sweswi?

KUMA LESWI ENGETELEKEKE

Twana leswi van’wamatimu ni van’wana va swi vulaka hi ku cinca ka mahanyelo ya vanhu ku sukela hi 1914.

“Ku Hohloka Ngopfu Ka Mahanyelo” (Xalamuka!, April 2007)

Twana ndlela leyi vuprofeta lebyi kumekaka eka Matewu 24:14 byi cinceke vutomi bya wanuna un’wana ha yona.

“A Ndzi Rhandza Baseball Ku Tlula Hinkwaswo!” (Xihondzo xo Rindza No. 3 2017)

Hi swi tivisa ku yini leswaku vuprofeta lebyi kumekaka eka Daniyele ndzima 4 byi vulavula hi Mfumo wa Xikwembu?

“Xana Mfumo Wa Xikwembu Wu Sungule Rini Ku Fuma? (Xiyenge 1)” (Xihondzo xo Rindza, October 1, 2014)

I yini leswi kombisaka leswaku “malembe ya nkombo” lama boxiweke eka Daniyele ndzima 4 ma hele hi 1914?

“Mfumo Wa Xikwembu Wu Sungule Rini Ku Fuma? (Xiyenge 2)” (Xihondzo xo Rindza, November 1, 2014)

Mfumo wa Xikwembu wu le ku fumeni. Ku nga ri khale wu ta cinca swilo emisaveni. A hi bule hi swilo swin’wana leswinene leswi u nga swi langutelaka loko ku fuma Mfumo wa Xikwembu.

1. Mfumo wa Xikwembu wu ta ku tisa njhani ku rhula ni vululami emisaveni?

Yesu, Hosi ya Mfumo wa Xikwembu, u ta lovisa vanhu vo homboloka ni mifumo ya misava hi nyimpi ya Armagedoni. (Nhlavutelo 16:14, 16) Hi nkarhi wolowo, xitshembiso lexi xa le Bibeleni lexi nge, “ku sele nkarhinyana leswaku lavo homboloka va herisiwa” xi ta hetiseka hi ku helela. (Pisalema 37:10) Yesu u ta tirhisa Mfumo wa Xikwembu leswaku emisaveni ku va ni vululami ni ku rhula.—Hlaya Esaya 11:4.

2. Vutomi byi ta va njhani loko ku endleka ku rhandza ka Xikwembu emisaveni?

Loko ku fuma Mfumo wa Xikwembu, “lavo lulama va ta tshama emisaveni, va ta hanya eka yona hilaha ku nga heriki.” (Pisalema 37:29) Ehleketa u hanya emisaveni leyi vanhu va kona va lulameke, va rhandza Yehovha ni ku tlhela va rhandzana! Ku hava loyi a nga ta vabya naswona vanhu hinkwavo va ta hanya hilaha ku nga heriki.

3. Mfumo wa Xikwembu wu ta endla yini loko lavo homboloka va lovisiwile?

Loko lavo homboloka va lovisiwile, Yesu u ta fuma malembe ya 1 000. Hi nkarhi wolowo, yena ni lava 144 000 lava a nga ta fuma na vona, va ta pfuna vanhu emisaveni hinkwayo leswaku va nga ha vi na xidyoho. Loko ku hela nkarhi wolowo, misava yi ta va paradeyisi yo saseka naswona vanhu hinkwavo va ta tsaka hi leswi va yingisaka milawu ya Yehovha. Kutani Yesu u ta tlherisela Mfumo eka Tata wakwe, Yehovha. ‘Vito ra Yehovha ri ta va ri kwetsimisiwile’ hilaha ku heleleke. (Matewu 6:9, 10) Swi ta va swi kombisiwile leswaku Yehovha i Mufumi lonene loyi a khathalaka hi vanhu vakwe. Yehovha u ta lovisa Sathana, madimona ni vanhu lava nga laviki ku seketela vuhosi Byakwe. (Nhlavutelo 20:7-10) Mfumo wa Xikwembu wu ta endla swilo leswinene leswi nga ta tshama hilaha ku nga heriki.

ANAKANYISISA

4. Mfumo wa Xikwembu wu ta herisa mifumo ya vanhu

“Munhu u fuma munhu un’wana ku n’wi endla swo biha.” (Eklesiasta 8:9) Yehovha u ta tirhisa Mfumo wakwe ku herisa vuhomboloki lebyi.

Hlaya Daniyele 2:44 na 2 Vatesalonika 1:6-8, ivi mi bula hi swivutiso leswi:

• Yehovha ni N’wana wakwe Yesu, va ta endla yini hi mifumo ya vanhu ni lava yi seketelaka?

• Leswi u swi dyondzeke hi Yehovha na Yesu swi ku tiyisekisa njhani leswaku leswi va nga ta swi endla swi ta va swi lulamile?

5. Yesu i Hosi leyinene ngopfu

Yesu, Hosi ya Mfumo wa Xikwembu u ta endlela vanhu lava a nga ta va fuma va swilo swo tala leswinene. Tlanga VHIDIYO leswaku u vona leswi Yesu a swi endleke ku kombisa leswaku u lava ku pfuna vanhu ni leswaku Xikwembu xi n’wi nyike matimba yo va pfuna.

VHIDIYO: Yesu U Kombise Leswi Mfumo Wa Xikwembu Wu Nga Ta Swi Endla (1:13)

Loko Yesu a ri laha misaveni, u endle swilo leswi Mfumo wa Xikwembu wu nga ta swi endla. Eka mikateko leyi landzelaka, hi yihi leyi u yi languteleke hi mahlongati? Hlaya matsalwa lama kombisiweke lama fambisanaka ni mikateko leyi.

6. Mfumo wa Xikwembu wu ta hi endlela swilo leswinene

VHIDIYO: Vumundzuku Lebyinene Lebya Ha Taka (4:38)

Hlaya Pisalema 145:16, ivi mi bula hi xivutiso lexi:

• Ku tiva leswaku Yehovha u ta “enerisa ku navela ka swivumbiwa hinkwaswo leswi hanyaka” swi ku endla u titwa njhani?

NKATSAKANYO

Xikwembu xi ta tirhisa Mfumo wa xona ku endla leswi xi swi lavaka. Wu ta hundzula misava yi va paradeyisi leyi nga ta tala hi vanhu lavanene lava nga ta gandzela Yehovha hilaha ku nga heriki.

Mpfuxeto

• Mfumo wa Xikwembu wu ta ri kwetsimisa njhani vito ra Yehovha?

• Hikwalaho ka yini hi tshemba leswaku Mfumo wa Xikwembu wu ta hetisisa switshembiso swa le Bibeleni?

• Eka swilo leswi Mfumo wa Xikwembu wu nga ta swi endla, hi swihi leswi u swi languteleke hi mahlongati?

KUMA LESWI ENGETELEKEKE

Twana leswaku Armagedoni i yini.

“I Yini Nyimpi Ya Armagedoni?” (Nhlokomhaka leyi kumekaka eka website)

Kambisisa leswi nga ta endleka leswi Yesu a vuleke leswaku i “nhlomulo lowukulu.”​—Matewu 24:21.

“I Yini Nhlomulo Lowukulu?” (Nhlokomhaka leyi kumekaka eka website)

Vona ndlela leyi mindyangu yi nga anakanyisisaka ha yona hi mikateko ya le nkarhini lowu taka.

Tivone U Ri eParadeyisini (1:50)

Eka nhlokomhaka leyi nge, “A Ndzi Ri Ni Swivutiso Swo Tala,” twana ndlela leyi n’watipolitiki a kumeke tinhlamulo ta swivutiso swakwe ha yona.

“Bibele Yi Hundzula Vutomi Bya Vanhu” (Xihondzo xo Rindza, January 1, 2012)