Xana U Swi Lunghekerile Ku Khuvuriwa?

U dyondze swilo swo tala hi Yehovha loko u ri karhi u dyondza Bibele. Naswona swi nga endleka u cince swo karhi evuton’wini bya wena leswaku u tirhisa leswi u swi dyondzeke. Kambe, swi nga endleka ku ri ni swin’wana leswi ku sivelaka ku tinyiketela eka Yehovha ivi u khuvuriwa. Eka dyondzo leyi, hi ta bula hi swilo leswi talaka ku sivela vanhu ku khuvuriwa ni ndlela leyi u nga swi hlulaka ha yona.

1. U fanele u va ni vutivi byo fikela kwihi u nga si khuvuriwa?

Leswaku u khuvuriwa, u fanele u wu “tiva kahle ntiyiso.” (1 Timotiya 2:4) Leswi a swi vuli swona leswaku u fanele u tiva nhlamulo ya xivutiso xin’wana ni xin’wana xa le Bibeleni loko u nga si khuvuriwa. Hambi ku ri Vakreste lava ku nga khale va khuvuriwile va ha ya emahlweni va dyondza. (Vakolosa 1:9, 10) Kambe u fanele u ti twisisa kahle tidyondzo ta xisekelo ta le Bibeleni. Vakulu va le vandlheni va ta ku pfuna ku tiva loko u ri ni vutivi lebyi eneleke.

2. Hi swihi swilo leswi u faneleke u swi endla u nga si khuvuriwa?

Loko u nga si khuvuriwa, u fanele u ‘hundzuka u tlhelela eka Xikwembu.’ (Hlaya Mitirho 3:19.) Leswi swi vula leswaku wa tisola swinene hikwalaho ka swidyoho leswi u tshameke u swi endla kutani u kombela Yehovha a ku rivalela. Nakambe u tiyimisele hi mbilu hinkwayo ku tshika mahanyelo yo biha kutani u hanya hi ndlela leyi tsakisaka Xikwembu. Ku engetela kwalaho, u sungula ku va kona etinhlengeletanweni ta vandlha ni ku chumayela u ri muhuweleri la nga khuvuriwangiki.

3. Hikwalaho ka yini u nga fanelanga u pfumelela ku chava ku ku sivela?

Van’wana va chava leswaku a va nge swi koti ku endla leswi va swi tshembiseke Yehovha. I ntiyiso leswaku u ta swi endla swihoxo, ku fana ni vavanuna ni vavasati vo tshembeka lava ku vulavuriweke ha vona eBibeleni lava na vona va swi endleke. Kambe Yehovha wa swi tiva leswaku vagandzeri vakwe va ta swi endla swihoxo. (Hlaya Pisalema 103:13, 14.) Swa n’wi tsakisa loko u endla leswi u nga swi kotaka leswaku u n’wi gandzela! U ta ku pfuna. Entiyisweni, Yehovha wa hi tiyisekisa leswaku a xi kona lexi nga ‘kotaka ku hi hambanisa ni rirhandzu ra yena.’—Hlaya Varhoma 8:38, 39.

ANAKANYISISA

4. Tiva Yehovha ku antswa

U fanele u n’wi tiva ku fikela kwihi Yehovha loko u nga si khuvuriwa? U fanele u n’wi tiva kahle leswaku u ta n’wi rhandza u tlhela u lava ku n’wi tsakisa. Tlanga VHIDIYO leswaku u vona ndlela leyi swichudeni swa Bibele emisaveni hinkwayo swi swi endlaka ha yona sweswo. Endzhaku mi bula hi xivutiso lexi landzelaka.

VHIDIYO: Matitwelo Ya Vona Hi Nkhuvulo (3:56)

• Eka vhidiyo leyi, i yini leswi pfuneke van’wana ku tilunghiselela ku khuvuriwa?

Hlaya Varhoma 12:2, ivi mi bula hi swivutiso leswi:

• Xana ku ni tidyondzo to karhi ta le Bibeleni leti u ti kanakanaka, kumbe wa kanakana leswaku Timbhoni ta Yehovha ti dyondzisa ntiyiso?

• Loko swi ri tano, u ta endla yini hi swona?

5. Hlula swilo leswi nga ku sivelaka ku khuvuriwa

Hinkwerhu hi langutana ni swiphiqo loko hi endla xiboho xo tinyiketela eka Yehovha kutani hi khuvuriwa. Leswaku u vona van’wana lava swi va endlekeleke, tlanga VHIDIYO, ivi mi bula hi swivutiso leswi landzelaka.

VHIDIYO: Ku Rhandza Yehovha Ku Endla Hi Hlula Swihinga (5:22)

• Eka vhidiyo, hi swihi swihinga leswi Narangerel a a fanele a swi hlula leswaku a ta tirhela Yehovha?

• Ndlela leyi a a rhandza Yehovha ha yona yi n’wi pfune njhani leswaku a hlula swiphiqo swoleswo?

Hlaya Swivuriso 29:25 na 2 Timotiya 1:7, ivi mi bula hi xivutiso lexi:

• I mani la hi nyikaka xivindzi xo hlula swiphiqo?

6. Tshemba Yehovha u ta ku pfuna

Yehovha u ta ku pfuna leswaku u n’wi tsakisa. Tlanga VHIDIYO, ivi mi bula hi swivutiso leswi landzelaka.

VHIDIYO: Yehovha Xikwembu U Ta Ku Pfuna (2:50)

• Eka vhidiyo, i yini lexi khomeleteke xichudeni xa Bibele leswaku xi nga khuvuriwi?

• I yini leswi xi swi dyondzeke leswi xi pfuneke leswaku xi ya xi n’wi tshemba swinene Yehovha?

Hlaya Esaya 41:10, 13, ivi mi bula hi xivutiso lexi:

• Hikwalaho ka yini u tiyiseka leswaku u nga swi kota ku endla leswi u swi tshembisaka loko u tinyiketela?

7. Yana emahlweni u khensa rirhandzu leri Yehovha a ku kombaka rona

Loko u ya u ehleketa hi ndlela leyi Yehovha a ku rhandzaka ha yona, u ta ya u n’wi khensa swinene naswona u ta ya u lava ku n’wi tirhela hilaha ku nga heriki. Hlaya Pisalema 40:5, ivi mi bula hi xivutiso lexi:

• Hi yihi mikateko leyi humaka eka Yehovha leyi u yi tlangelaka swinene?

Muprofeta Yeremiya a a rhandza Yehovha ni rito ra yena, naswona a a wu tlangela swinene nkateko wa ku vitaniwa hi vito ra Yehovha. U te: “Rito ra wena ri endle mbilu ya mina yi khana yi tlhela yi tsaka, hikuva ndzi vitaniwa hi vito ra wena, Yehovha Xikwembu.” (Yeremiya 15:16) Hlamula swivutiso leswi:

• Hikwalaho ka yini ku ri nkateko lowukulu ku va Mbhoni ya Yehovha?

• Xana wa swi lava ku khuvuriwa u va Mbhoni ya Yehovha?

• Xana ku ni lexi ku sivelaka ku khuvuriwa?

• U ehleketa leswaku u fanele u endla yini leswaku u kota ku khuvuriwa?

NKATSAKANYO

Hi ku pfuniwa hi Yehovha, u nga hlula nchumu wihi na wihi lowu ku sivelaka ku khuvuriwa.

Mpfuxeto

• U fanele u yi tiva ku fikela kwihi Bibele leswaku u ta kota ku khuvuriwa?

• Hi swihi swilo leswi u nga ha bohekaka ku swi cinca evuton’wini bya wena u nga si khuvuriwa?

• Hikwalaho ka yini u nga fanelanga u pfumelela ku chava ku ku sivela ku khuvuriwa?

KUMA LESWI ENGETELEKEKE

Twana leswaku i yini leswi faneleke swi ku endla u lava ku khuvuriwa.

“Xana U Swi Lunghekerile Ku Khuvuriwa?” (Xihondzo xo Rindza, March 2020)

Twana ndlela leyi u nga swi hlulaka ha yona swilo leswi nga ku sivelaka ku khuvuriwa.

“I Yini Lexi Ndzi Sivelaka Ku Khuvuriwa?” (Xihondzo xo Rindza, March 2019)

Vona ndlela leyi wanuna un’wana a swi hluleke ha yona swihinga leswikulu leswaku a ta kota ku khuvuriwa.

‘I Yini Lexi Endlaka U Kanakana Ku Khuvuriwa?’ (1:10)

Eku sunguleni, wanuna la vuriwaka Ataa a a kanakana ku khuvuriwa. Vona lexi n’wi pfuneke ku teka xiboho xa nkoka xo va a khuvuriwa.

Xana Hakunene Swa Ndzi Fanela Swilo Leswi? (7:21)