DYONDZO 43
Hi Rihi Langutelo Leri Vakreste Va Faneleke Va Va Na Rona Hi Byala?
Emisaveni hinkwayo, vanhu va ni mavonelo lama hambaneke hi byala. Mikarhi yin’wana van’wana va hlawula ku nwa loko va titshamele ni vanghana va vona. Van’wana va hlawula ku nga byi khumbi nikatsongo. Kasi van’wana va nwa kukondza va dakwa. Xana Bibele yi ri yini hi byala?
1. Xana swi hoxile ku nwa byala?
Bibele a yi swi arisi ku nwa byala. Kambe, loko Bibele yi vulavula hi tinyiko to tala leti Xikwembu xi hi nyikeke tona, yi katsa na “vhinyo leyi tsakisaka mbilu ya munhu.” (Pisalema 104:14, 15) Vavanuna ni vavasati van’wana vo tshembeka lava ku vulavuriwaka ha vona eBibeleni a va nwa byala.—1 Timotiya 5:23.
2. Hi xihi xitsundzuxo lexi Bibele yi xi nyikaka lava hlawulaka ku nwa?
Yehovha a nga swi lavi leswaku hi nwa ku tlula mpimo kumbe hi dakwa. (Vagalatiya 5:21) Rito Rakwe ri ri: “U nga vi exikarhi ka lava nwaka ngopfu vhinyo.” (Swivuriso 23:20) Hikwalaho, loko hi nwa hambi hi nwela exihundleni, a hi fanelanga hi nwa ngopfu lerova hi nga ha ehleketi kahle, hi vulavula ni ku endla swilo swo huma endleleni kumbe hi kala hi tivangela mavabyi. Loko hi nga swi koti ku lawula ndlela leyi hi nwaka ha yona, hi fanele hi tshika ku nwa.
3. Hi nga swi xixima njhani swiboho swa van’wana loko swi ta emhakeni ya byala?
Munhu un’wana ni un’wana u fanele a tiendlela xiboho xa loko a ta nwa byala kumbe a nga ta nwa. A hi fanelanga hi tseketsela munhu loko a hlawula ku nwa byala hi ku ringanisela, naswona a hi fanelanga hi sindzisa munhu ku nwa hambi a nga swi lavi. (Varhoma 14:10) Hi hlawula ku nga n’wi loko sweswo swi ta vangela van’wana swiphiqo. (Hlaya Varhoma 14:21.) Hi lava “leswi pfunaka ni van’wana, ku nga ri leswi pfunaka [hina] ntsena.”—Hlaya 1 Vakorinto 10:23, 24.
ANAKANYISISA
Kambisisa misinya ya milawu ya Bibele leyi nga ta ku pfuna u endla xiboho xa loko u ta nwa byala kumbe doo, ni leswaku u fanele u nwa byo tanihi kwihi. Nakambe kumisisa leswi u nga swi endlaka loko u ri ni xiphiqo xa ku nwa ngopfu.
4. Hlawula loko u ta nwa
Yesu a a byi teka njhani byala? Leswaku u kuma nhlamulo, twana hi singita ro sungula leri a ri endleke. Hlaya Yohane 2:1-11, ivi mi bula hi swivutiso leswi:
Eka singita leri, hi nga dyondza yini hi ndlela leyi Yesu a byi teka ha yona byala ni lava va byi nwaka?
Leswi Yesu a nga vulangiki leswaku ku nwa byala swi hoxile, Mukreste u fanele a n’wi teka njhani munhu loyi a hlawulaka ku nwa?
Hambiswiritano, leswi Mukreste a tshunxekeke ku nwa byala, sweswo a swi vuli swona leswaku mikarhi hinkwayo i vutlhari ku nwa. Hlaya Swivuriso 22:3, ivi u kambisisa ndlela leyi tinhla leti landzelaka ti nga xi khumbaka ha yona xiboho xa wena loko u fanele u nwa kumbe u nga fanelanga:
U ta chayela movha kumbe u tirhisa muchini.
U tikile.
Dokodela u ku byele leswaku u nga nwi byala.
U na xiphiqo xo nwa ku tlula mpimo.
Nawu a wu ku pfumeleli ku nwa byala.
U na munhu loyi a nga laviki ku nwa byala hikwalaho ka leswi a nga tshama a va ni xiphiqo xa ku nwa ku tlula mpimo.
Xana u fanele u va nyika byala vanhu lava teke emucatweni kumbe eswinkhubyanini swo karhi? Leswaku u vona leswi nga ku pfunaka ku endla xiboho, tlanga VHIDIYO.
Hlaya Varhoma 13:13 na 1 Vakorinto 10:31, 32. Endzhaku ko hlaya tsalwa ha rin’we, bulani hi xivutiso lexi:
Ku tirhisa leswi boxiweke eka tsalwa leri, swi nga ku pfuna njhani leswaku u endla xiboho lexi nga ta tsakisa Yehovha?
Mukreste ha un’we wa tihlawulela loko a ta nwa byala kumbe a nga ta byi nwa. Hambiloko a pfa a nwa, mikarhi yin’wana a nga ha hlawula ku nga nwi
5. Pima leswaku u ta nwa ku fikela kwihi
Loko u hlawula ku nwa byala, tsundzuka leswi: Hambileswi Yehovha a hi pfumelelaka ku nwa byala kambe a nga lavi hi nwa ku tlula mpimo. Hikwalaho ka yini? Hlaya Hosiya 4:11, 18, ivi mi bula hi xivutiso lexi:
Ku nga endleka yini loko munhu a nwa ku tlula mpimo?
Hi nga swi papalata njhani ku nwa ku tlula mpimo? Hi fanele hi nwa hi ku ringanisela. Hlaya Swivuriso 11:2, ivi mi bula hi xivutiso lexi:
Hikwalaho ka yini ku ri vutlhari ku tivekela mpimo lowu u nga ta nwa wona?
6. I yini leswi nga pfunaka munhu ku nwa hi ku ringanisela?
Vona leswi pfuneke wanuna un’wana ku tshika ku nwa byala ku tlula mpimo. Tlanga VHIDIYO, ivi mi bula hi swivutiso leswi landzelaka.
Eka vhidiyo leyi, xana Dmitry a a endla yini loko a byi twile?
Xana u vhele a ku byi thya hi nkarhi wolowo?
Eku heteleleni u swi kote njhani ku tshika vudakwa?
Hlaya 1 Vakorinto 6:10, 11, ivi mi bula hi swivutiso leswi:
Vudakwa byi bihe ku fikela kwihi?
I yini leswi kombisaka leswaku munhu loyi a nga xidakwa a nga cinca?
Hlaya Matewu 5:30, ivi mi bula hi xivutiso lexi:
Ku tsema voko swi fanekisela ku titsona swo karhi leswaku u tsakisa Yehovha. U nga endla yini loko swi ku tikela ku nwa u pima?a
Hlaya 1 Vakorinto 15:33, ivi mi bula hi xivutiso lexi:
Loko vanghana va wena va ri swidakwa swi nga va ni nkucetelo wihi eka wena?
UN’WANA A NGA KU VUTISA A KU: “Xana swi hoxile ku nwa byala?”
A wu ta n’wi hlamula njhani?
NKATSAKANYO
Yehovha u hi nyike byala leswaku hi tiphina, kambe a nga lavi leswaku hi byi nwa ku tlula mpimo ni ku dakwa.
Mpfuxeto
Xana Bibele yi ri yini hi byala?
Hi wahi makhombo ya ku nwa ku tlula mpimo?
Hi nga swi xixima njhani swiboho swa van’wana mayelana ni ku nwa?
KUMA LESWI ENGETELEKEKE
Vantshwa va nga swi endla njhani swiboho leswinene loko swi ta eka byala?
Twana leswi u nga swi endlaka leswaku u hlula xiphiqo xa ku nwa ngopfu.
“Ku Va Ni Langutelo Lerinene Hi Byala” (Xihondzo xo Rindza, January 1, 2010)
Xana Vakreste va fanele va tlakusela tinghilazi ta byala ehenhla va ti bananisa?
“Swivutiso Swa Vahlayi” (Xihondzo xo Rindza, February 15, 2007)
Eka mhaka ya vutomi leyi nge “A Ndzi Ri Xindzendzele,” twana ndlela leyi wanuna un’wana a tshikeke ha yona ku nwa ku tlula mpimo.
“Bibele Yi Hundzula Vutomi Bya Vanhu” (Xihondzo xo Rindza, May 1, 2012)
a Swilovekelo swi nga lava mpfuno wa dokodela leswaku swi tshika ku nwa ngopfu. Madokodela yo tala ma vula leswaku lava tshameke va va ni xiphiqo xa ku nwa ngopfu a va fanelanga va nwa.