Tshinela Eka Xikwembu

Muavanyisi Loyi A Endlaka Leswi Lulameke Minkarhi Hinkwayo

Genesa 18:22-32

VULULAMI. Ku nga yi hi nghohe. Xana timfanelo toleto letinene a ti ku tsakisi? Hina vanhu hi ntumbuluko hi tsakela ku khomiwa hi ndlela leyinene. Lexi vavisaka, namuntlha vululami a bya ha ri kona emisaveni. Hambiswiritano, ku ni Muavanyisi loyi hi faneleke hi n’wi tshemba—Yehovha Xikwembu. Minkarhi hinkwayo u endla leswi lulameke. Mhaka leyi yi kombisiwe kahle loko Yehovha a vulavula na Abrahama, hilaha swi tsariweke hakona eka Genesa 18:22-32.a

Loko Yehovha a byele Abrahama leswaku u ta kambisisa xiyimo eSodoma ni le Gomora, Abrahama u karhateke hi vuhlayiseki bya vanhu vo lulama lava a va tshama emitini yoleyo, ku katsa ni ntukulu wakwe Lota. Abrahama u kombele Yehovha a ku: “Xana hakunene u ta kukula wo lulama swin’we ni wo homboloka? A hi nge ku ni vanhu va 50 lava lulameke exikarhi ka muti. Xana . . . u nge yi rivaleli ndhawu leyi hikwalaho ka vanhu va 50 lava kumekaka endzeni ka yona?” (Tindzimana 23, 24) Xikwembu xi vule leswaku a xi nge yi lovisi miti yoleyo loko ntsena ku ri ni vanhu va 50 lava lulameke. Abrahama u tlhele a kombela Yehovha minkarhi ya ntlhanu, hakatsongo-tsongo a hunguta nhlayo kukondza yi va vanhu va khume. Nkarhi ha wun’we loko Abrahama a kombela, Xikwembu xi vule leswaku a xi nga ta yi lovisa miti yoleyo loko ku ri ni vanhu vo tala lava lulameke eka yona.

Xana Abrahama a a phikizana na Xikwembu? Nikatsongo! Sweswo a swi ta va swi kombise leswaku Abrahama wa delela. Ndlela leyi Abrahama a vulavuleke ha yona a yi kombisa leswaku u ni xichavo naswona wa titsongahata. U vule leswaku a a ri “ntshuri ni nkuma.” Ku ringana minkarhi ya mune u vule hi xichavo a ku: “Ndza ku kombela.” (Tindzimana 27, 30-32) Ku tlula kwalaho, marito ya Abrahama ma kombise leswaku a a tshemba leswaku Yehovha u ni vululami. Abrahama u vule leswaku a hi “swinene” hi Xikwembu leswaku xi lovisa vanhu vo lulama ni lava hombolokeke—a nga swi vulanga kan’we kambe kambirhi. Abrahama wo tshembeka u vule hi ku tiyiseka leswaku “Muavanyisi wa misava hinkwayo” a a ta “[endla] leswi lulameke.”—Ndzimana 25.

Xana leswi Abrahama a swi vuleke a ku ri ntiyiso? Swin’wana a ku nga ri ntiyiso kasi swin’wana a ku ri ntiyiso. A a hoxisile loko a ehleketa leswaku a ku ri ni vanhu vo lulama vo ringana khume eSodoma ni le Gomora. Kambe a a tiyisile hakunene loko a vula leswaku Xikwembu a xi nga ta “kukula wo lulama swin’we ni wo homboloka.” Loko Xikwembu xi hetelele xi lovisa miti yoleyo yo homboloka, ntsumi yi pfune Lota wo lulama ni vana vakwe vambirhi va xisati leswaku va baleka.—2 Petro 2:7-9.

Xana rungula leri ri hi dyondzisa yini hi Yehovha? Ku va Yehovha a byele Abrahama leswaku u ta kambela miti yoleyo, entiyisweni a a lava leswaku Abrahama a phofula ndlela leyi a a titwa ha yona. Kutani u tinyike nkarhi wo yingisela munghana wakwe Abrahama loko a phofula mhaka leyi a yi n’wi karhata. (Esaya 41:8) Hakunene leswi swi hi dyondzisa leswaku Yehovha i Xikwembu lexi titsongahataka, lexi nga ma tekeriki hansi malandza ya xona ya laha misaveni kambe xa ma xixima! Kutani hi ni swivangelo swo tshemba Yehovha hi mbilu ya hina hinkwayo, Muavanyisi loyi a endlaka leswi lulameke minkarhi hinkwayo.

[Nhlamuselo ya le hansi]

[Xifaniso lexi nga eka tluka 24]

Abrahama u kombele Yehovha malunghana ni muti wa Sodoma ni wa Gomora