TINHLAMULO TA SWIVUTISO SWA BIBELE
Xana swa koteka ku kuma vutomi lebyi nga heriki?
I yini lexi nga ta hi ntshunxa eka rifu?
Wanuna wo sungula, ku nga Adamu, u hanye malembe yo tala. Kambe eku heteleleni, u dyuharile kutani a fa. Kutani ku sukela kwalaho, vanhu va ringete tindlela to tala leswaku va papalata ku dyuhala. Kambe ku hava ni un’we loyi a tshameke a balekela rifu. Ha yini? Adamu u dyuharile kutani a fa hikuva u dyohile hileswi a nga xi yingisangiki Xikwembu. Ha dyuhala hikuva hi tswariwe hi ri ni xidyoho xa Adamu ni vuyelo bya xona, ku nga rifu.—Hlaya Genesa 5:5; Varhoma 5:12.
Leswaku hi tiphina hi vutomi lebyi nga heriki, hi lava ku kutsuriwa. (Yobo 33:24, 25) Nkutsulo i mali leyi hakeriwaka leswaku ku ntshunxiwa munhu naswona na hina hi lava ku ntshunxiwa eka rifu. (Eksoda 21:29, 30) Rifu ra Yesu ri hi kutsurile.—Hlaya Yohane 3:16.
Xana hi nga byi kuma njhani vutomi lebyi nga heriki?
A hi vanhu hinkwavo lava nga ta ntshunxiwa eka vuvabyi ni ku dyuhala. Entiyisweni, vanhu lava nga yingisiki Xikwembu ku fana na Adamu va ta lahlekeriwa hi lunghelo ro kuma vutomi. I vanhu lava rivaleriweke swidyoho swa vona lava nga ta tiphina hi vutomi lebyi nga heriki.—Hlaya Esaya 33:24; 35:3-6.
Leswaku hi rivaleriwa, hi fanele hi teka goza. Hi fanele hi tiva Xikwembu hi ku hlaya Rito ra xona, ku nga Bibele. Ri hi dyondzisa ndlela yo tiphina hi vutomi ni ndlela leyi ha yona hi nga kumaka ku tsakeriwa hi Xikwembu ni vutomi lebyi nga heriki.—Hlaya Yohane 17:3; Mintirho 3:19.