MATIMU YA HINA

“Hi Rirhandzu Ni Hi Ku Hiseka Ku Tlula Rini Na Rini”

A KU ri Ravuntlhanu nimixo hi September 1922 naswona dyambu a ri ya ri hisa, vanhu va 8 000 a va hlengeletanile eholweni. Mutshamaxitulu u vule leswaku ehlengeletanweni yoleyo ya nkoka, un’wana ni un’wana loyi a lavaka ku famba, a nga famba, kambe a nga ta pfumeleriwa ku nghena eholweni nakambe.

Leswaku ku sunguriwa, ku yimbeleriwe risimu ro pfula, kutani endzhaku ka sweswo Joseph F. Rutherford u ye xitejini. Vayingiseri vo tala a va lava ku twa leswi a va khomele swona. Van’wana a va yimile hikwalaho ka leswi a va twa ku hisa. Kambe xivulavuri xi va kombele leswaku va tshama ehansi va yingisela. Kutani nkulumo yi sungurile, a swi tiveki loko ku ve ni munhu loyi a swi xiyeke leswaku a ku ri ni lapi lerikulu leri a ri hayekiwe ehenhla ka xiteji.

Makwerhu Rutherford u vule nhlokomhaka ya nkulumo leyi a yi ku: “Mfumo wa matilo wu le kusuhi.” Ku ringana awara na hafu rito rakwe a ri duma holo hinkwayo naswona u vulavule hi ndlela leyi vaprofeta va khale va twariseke hi ku ta ka Mfumo wa Xikwembu hi xivindzi ha yona. Loko nkulumo yi ya eku heleni u vutise vayingiseri a ku: “Xana ma tshemba leswaku Hosi ya ku vangama se ya fuma?” Vayingiseri va angule hi ku huwelela lokukulu va ku: “Ina!”

Kutani u te: “Loko swi ri tano, tlhelelani eku chumayeleni, n’wina vana va Xikwembu xa le henhlahenhla!” Makwerhu Rutherford u tlhele a huwelela a ku: “Vonani, Hosi ya fuma! N’wina mi vayimeri va yona. Hikwalaho, twarisani, twarisani, twarisani.”

Hi nkarhi wolowo, lapi ri pfuriwile, kutani ku vonaka marito lama nge: “Twarisani Hosi ni Mfumo.”

Ray Bopp u ri: “Vayingiseri a va tsake ngopfu.” Anna Gardner u ri: “Mavoko ma biwe hi ntsako lowukulu lerova ni lwangu ri twala onge ra ninginika.” Fred Twarosh u ri: “Vayingiseri hinkwavo va yimile.” Evangelos Scouffas u ri: “Hinkwerhu hi tlakuke hi yima naswona a hi tengatenga mihloti ya ntsako.”

Vo tala lava a va ri enhlengeletanweni yoleyo se a va ri vachumayeri va rungula ra Mfumo. Kambe leswi se a va xi twisisa kahle xikongomelo xa kona va khutazeke ku chumayela hi ku hiseka. Ethel Bennecoff u vule leswaku Swichudeni Swa Bibele swi ye emahlweni swi chumayela hi “rirhandzu ni hi ku hiseka ku tlula rini na rini.” Odessa Tuck, loyi hi nkarhi wolowo a ri ni malembe ya 18, loko a suka enhlengeletanweni yoleyo a a tiyimisele ku ya hlamula xirhambo lexi nge “Xana ndzi ta rhuma mani?” U ri: “A ndzi nga swi tivi leswaku ndzi ta rhumiwa kwihi naswona yini. Kambe lexi a ndzi xi tiva hi leswaku a ndzi lava ku fana na Esaya, la nga te: ‘Hi mina loyi! Ndzi rhume!’” (Esa. 6:8) Ralph Leffler u ri: “Siku rero ro tsakisa, a ku ri masungulo ya tsima ra ku twarisiwa ka Mfumo leri namuntlha ri endliwaka emisaveni hinkwayo.”

A swi hlamarisi leswi nhlengeletano leyi ya le Cedar Point, eOhio leyi veke kona hi 1922, yi veke matimu lama tsakisaka. George Gangas u te: “Nhlengeletano leyi yi endle leswaku ndzi nga naveli ku xwa nhlengeletano ni yin’we.” A nga tsundzuki a xwa enhlengeletanweni ku sukela siku rero. Julia Wilcox u tsale a ku: “Ndza tsaka swinene loko minkandziyiso ya hina yi vulavula hi nhlengeletano ya le Cedar Point leyi veke kona hi 1922, mikarhi hinkwayo ‘Ndzi khensa Yehovha leswi a ndzi pfumeleleke leswaku ndzi va kona enhlengeletanweni yoleyo.’”

Swi nga ha endleka leswaku vo tala va hina hi tsundzuka swo tala hi nhlengeletano yin’wana leyi hi khumbeke timbilu ni ku endla leswaku hi hiseka ni ku hambeta hi rhandza Xikwembu ni Hosi ya hina. Loko hi tsundzuka swiendlakalo sweswo na hina hi ri: “Ha khensa Yehovha, ku va u hi pfumelele leswaku hi va kona enhlengeletanweni yoleyo.”

Ku Hlamuriwa Ka Xikhongelo Hi Ndlela Yo Hlamarisa

Arthur na Nellie Claus va hatle va fika leswaku va ta kuma switulu swa le mahlweni. Arthur u te: “A ndzi lava ku twa rito rin’wana ni rin’wana.” Kambe hi xitshuketa u sungule ku twa switlhavi. U suke eholweni, a ri karhi a swi tiva leswaku a nge he swi koti ku tlhela a nghena. Un’wana wa varindzi u n’wi vutisile a ku: “Ha yini u famba hi nkarhi lowu?” Kambe Arthur a swi tiva leswaku u fanele a famba.

Loko a vuya, Arthur u twe ku biwa mavoko swinene endzeni ka holo. Kutani u lave ndhawu leyi a ta kota ku vona leswi a swi ri eku endlekeni endzeni ka holo, u kume ndhawu leyi a ta kota ku khandziya a ya ehenhla ka lwangu laha a ku lehe timitara ta 4.8 ku fika laha a ta kota ku vona. Kutani u khandziye a kala a ya fika laha a ku ri ni mafasitere lawa a ma pfuriwile.

Kwalaho Arthur u kume vamakwerhu vo hlayanyana, lava a va nga ha tivi ta vona va ri karhi va hlometela xivulavuri. A va nyikiwe xiavelo xo tsema tintambu hi nkarhi wun’we leswaku ku ta phurumuka lapi leri hayekiweke. Kambe leswaku va kota ku tsema tintambu teto hi nkarhi wun’we, a ku laveka mukwana wun’wana. Xana Arthur a ri ni mukwana wo tsema kahle exikhwameni xakwe? Lexi va tsakiseke hileswaku a a ri na wona. Arthur swin’we ni van’wana va yime laha a va fanele va yima kona kutani va yimela nkarhi lowunene wo tsema tintambu. Loko Makwerhu Rutherford a ku: “Twarisani” ra vumbirhi, a va fanele va tsema tintambu teto.

Lava swi voneke hi mahlo va hlamusele ndlela leyi lapi ra mihlovo yinharhu, ri phurumukeke ha yona. Exikarhi ka rona a ku ri ni xifaniso xa Yesu.

Endzhaku ka sweswo, vamakwerhu va hlamusele Arthur leswaku va tirhise xitepisi ku khandziya ehenhla ka lwangu kambe ku na munhu loyi a nga xi susa. Kutani leswi a va nga ta kota ku ya lava mukwana wun’wana, va kombele Yehovha leswaku a rhumela makwerhu loyi a nga ni mukwana. Vamakwerhu lava, a va tiyiseka leswaku Yehovha u hlamule xikhongelo xa vona hi ndlela yo hlamarisa.