Mikateko Leyi Kumiwaka Hi Lava Yingisaka Xikwembu

Muprofeta Muxe u vule leswaku loko hi yingisa swileriso swa Xikwembu, hi ta kuma mikateko ya xona. (Deteronoma 10:13; 11:27) A hi yingiseli Xikwembu hileswi hi chavaka ku xupuriwa. Timfanelo ta xona letinene ti hi susumetela ku va hi xi yingisa hileswi hi xi rhandzaka ni leswi hi nga laveki ku endla swilo leswi xi nga swi tsakeriki. “Hikuva ku rhandza Xikwembu, hi kona ku hlayisa swileriso swa xona.”—1 Yohane 5:3.

Hi nga yi kuma njhani mikateko loko hi yingisa Xikwembu? Xiya tindlela timbirhi.

1. LOKO HI YINGISA XIKWEMBU HI TA TLHARIHA

“Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.”—ESAYA 48:17.

Yehovha Xikwembu, Muvumbi wa hina, u hi tiva kahle naswona u hi nyika nkongomiso lowu hi wu lavaka. Loko hi lava leswaku tidyondzo ta yena ti hi pfuna hi endla swiboho hi vutlhari, hi fanele hi dyondza leswi Xikwembu xi lavaka leswaku hi swi endla eka Matsalwa yo Kwetsima hi tlhela hi swi endla.

2. LOKO HI YINGISA XIKWEMBU HI TA TSAKA

“Va tsaka lava twaka rito ra Xikwembu va tlhela va ri hlayisa!”—LUKA 11:28.

Namuntlha, timiliyoni ta vanhu lava yingisaka Rito ra Xikwembu va tiphina hi ntsako wa xiviri. Hi xikombiso, wanuna un’wana wa le Spain loyi a nga swi koti ku lawula ku hlundzuka kakwe, a xanisa swirho swa ndyangu ku katsa ni nsati wakwe. Siku rin’wana u hlaye hi leswi tsariweke hi muprofeta Muxe mayelana ni ndlela leyi Yosefa n’wana wa Yakobe a rhule ha yona. Yosefa u xavisiwile a va hlonga, a tlhela a pfaleriwa a nga ri na nandzu kambe u tshame a ri ni ku rhula ni ku tlhela a rivalela. (Genesa, tindzima 37-45) Wanuna loyi wa le Spain u ya emahlweni a ku: “Ku ehleketa hi xikombiso xa Yosefa swi ndzi susumetele ku hlakulela ku olova, musa ni ku tikhoma. Vuyelo bya kona hi leswaku sweswi ndzi tiphina hi vutomi byo tsakisa.”

Matsalwa yo Kwetsima ma hi nyika nkongomiso wa ndlela leyi hi nga khomaka van’wana ha yona. Hi ta kuma leswi engetelekeke eka nhlokomhaka leyi landzelaka.