Ndlela Yo Kombisa Van’wana Rirhandzu

Tanihi leswi hinkwerhu hi humaka eka munhu un’we ku nga Adamu, hi ndyangu wun’we. Hambileswi ku languteriweke leswaku swirho swa ndyangu swi rhandzana swi tlhela swi xiximana, namuntlha a swi olovi ku vona vanhu va ri karhi va rhandzana. Leswi a hi swona leswi Xikwembu a xi lava leswaku swi va xi swona.

LESWI MATSALWA YO KWETSIMA MA SWI VULAKA HI RIRHANDZU

“U fanele u rhandza munhu-kuloni kukota loko u tirhandza.”—LEVHITIKA 19:18.

“Hambetani mi rhandza valala va n’wina.”—MATEWU 5:44.

LESWI KU RHANDZA WARIKWERHU SWI VULAKA SWONA

Xiya ndlela leyi Xikwembu xi hlamuseleke rirhandzu ha yona eRitweni ra xona eka 1 Vakorinto 13:4-7:

“Rirhandzu ri ni mbilu yo leha ni musa.”

Ehleketa hi mhaka leyi: U titwa njhani loko van’wana va ku lehisela mbilu va ku komba musa, va nga xopaxopi swihoxo swa wena?

“Rirhandzu a ri na mavondzo.”

Ehleketa hi mhaka leyi: U titwa njhani loko van’wana va tshamela ku ku ehleketelela swilo swo biha kumbe va ku vondzoka?

Rirhandzu “a ri lavi leswi vuyerisaka rona ntsena.”

Ehleketa hi mhaka leyi: U titwa njhani loko van’wana va nga sindzisi mavonelo ya vona kambe va yingisela mavonelo ya wena?

Rirhandzu “a ri hlayisi mhaka yo biha.”

Ehleketa hi mhaka leyi: Xikwembu xi tiyimisele ku rivalela vanhu lava dyoheke kutani va hundzuka. ‘A xi nge tshameli ku kuma xihoxo nkarhi hinkwawo, hambi ku ri ku tshama xi karihile.’ (Pisalema 103:9) Swa hi tsakisa loko vanhu lava hi va dyoheleke va hi rivalela. Kutani hi fanele hi tiyimisela ku rivalela van’wana loko va hi dyohela.—Pisalema 86:5.

Rirhandzu “a ri tsaki hi leswi nga lulamangiki.”

Ehleketa hi mhaka leyi: A hi swi lavi leswaku van’wana va tsaka loko hi humeleriwa hi swilo swo biha. Kutani na hina a hi tsaki loko van’wana va xaniseka hambiloko va tshame va hi khoma hi ndlela yo biha.

Leswaku hi kuma mikateko ya Xikwembu, hi fanele hi rhandza vanhu hinkwavo ku nga khathariseki leswaku va huma kwihi. Ndlela yin’wana leyi hi nga swi endlaka ha yona i ku pfuna lava lavaka ku pfuniwa.