Yuropa

Ndlela Leyinene Leyi A Hlamuleke Ha Yona

EGeorgia, wanuna un’wana u ye laha a ku ri ni xigolonyana xa minkandziyiso ivi a ku: “A ndzi nge mi pfumeleli leswaku mi chumayela laha! Laha Georgia hi nghena kereke ya Orthodox.” Makwerhu loyi a yime ekusuhi ni xigolonyana, hi ndlela yo rhula u n’wi vutise loko a tshame a hlaya minkandziyiso ya hina. Wanuna loyi u hlamule a ku: “Doo, a ndzi si tshama ndzi yi hlaya.” Hi vutlhari makwerhu u ringanyete leswaku a rhanga a yi hlaya. Ndlela leyi a hlamuleke ha yona yi endle leswaku wanuna loyi a rhurisa mbilu ivi a teka minkandziyiso yin’wana. Endzhaku ka masiku yo hlaya, wanuna loyi u tlhelele eka makwerhu a ya kombela ku rivaleriwa hikwalaho ka ndlela leyi a ti khomeke ha yona enkarhini lowu nga hundza. U n’wi byele leswaku u hlayele mana wakwe la feke mahlo magazini wa hina. Havumbirhi va yi tsakerile swinene naswona a a lava wun’wana leswaku a ya wu hlaya. Sweswi u ya eka xigolonyana nkarhi na nkarhi leswaku a ya kuma timagazini leti ta ha ku humaka.

Ndlela Leyinene Yo Lulamisa Swiphiqo

Loko va ri karhi va chumayela eAzerbaijan, vamakwerhu vambirhi va landze jaha rin’wana leri a ri yime emahlweni ka muako kutani va ri chumayela. Ri hlamule ri ku: “Ku ta va ku ri xidyoho loko ndzo yingisela rungula ra n’wina.” Kutani ri humese mukwana enkwameni ivi ri ku: “Ndzi khomiwe hi ndlela yo biha naswona sweswi ndzi lava ku ya tirhisa mukwana lowu leswaku ndzi ta va ni ku rhula.”

Leswi swi va hlamarisile vamakwerhu kambe va te: “Ku dlaya i xidyoho.”

Hiloko jaha leri ri ku: “Ndzi fanele ndzi endla yini?” Va ri hlayele Varhoma 12:17-21 ivi va ri hlamusela leswaku ku rihisela i ka Xikwembu naswona a hi fanelanga hi ‘hluriwa hi swo biha, kambe hi fanele hi hambeta hi hlula swo biha hi leswinene.’ Va ri byele hi ndlela leyi ririmi ro rhula ri nga ni matimba ha yona naswona va tlhele va ri byela leswaku loko ro vavisa kumbe ku dlaya munhu a ri ta kingindziwa hi ripfalo. Hikwalaho ko tsakisiwa hi leswi ri swi tweke, jaha rolero ri fambile.

Endzhakunyana ka awara, ri tlhele ri hlangana ni vamakwerhu volavo hiloko ri ku: “Ndzi huma eka munhu loyi a ndzi lava ku n’wi dlaya. A ndzi n’wi vavisanga kambe hi lulamise xiphiqo xa hina. Ndzi tsakile hi leswi mi ndzi pfuneke leswaku ndzi nga ngheni ekhombyeni.” Vamakwerhu va ri hlamusele leswaku i Yehovha loyi a ri pfuneke.

Makwerhu Wa Xisati Loyi A Horile A Tsakisiwa Hi Swigolonyana Swa Minkandziyiso

Emalembeni lama hundzeke, makwerhu un’wana wa xisati wa le Norway a a ti hambanise ni nhlengeletano. Endzhaku ka loko ku sunguriwe ku tirhisiwa swigolonyana etindhawini ta mani na mani, a a hamba a swi vona loko a ya eswitolo.

Hambileswi a nga si tshama a ya laha Timbhoni a ti yima kona ni swigolonyana, a a vona maphepha lama kokaka mahlo lama fanisiweke minkandziyiso. Leswi swin’we ni xinghana ni ndlela leyi Timbhoni a a ti languteka ha yona swi endle leswaku a tsakela ku tlhelela eka Yehovha ni vanhu vakwe.

U tlhele a xiya mfungho wa website ya hina ya jw.org, ivi a nghena eka yona. U tsakisiwe hi loko a vona ndlela leyi swi olovaka ha yona ku kuma adirese ya Holo ya Mfumo ya kwalaho swin’we ni nkarhi lowu minhlangano yi khomiwaka ha wona. U kope yin’wana ya minkandziyiso a tlhela a ya eholweni hambileswi a khomiwa hi rhumbyana. U fike a amukeriwa hi ndlela leyinene naswona vakulu va hlele leswaku a dyondza Bibele ni makwerhu un’wana wa xisati. Hi ku hatlisa u ve ni vanghana evandlheni naswona u tlhele a va ni vuxaka lebyinene na Xikwembu. Sweswi nkarhi ni nkarhi wa hlamula eminhlanganweni, u va kona ensin’wini naswona wa tsaka hi leswi a nga tlhela a va ni vuxaka lebyinene na Yehovha.

U Chumayele Vadyondzikulorhi eBazini Ra Xikolo

Loko va ri ebazini ra xikolo le Norway, Ronja la nga ni malembe ya 15 u burisane ni vafana vanharhu malunghana ni dyondzo ya ku tihundzukela ka swilo. Vafana lava a va nga swi xiximi leswi a pfumela eka swona kutani va endle leswaku a titwa a nga ntshunxekanga. Leswi se a ku ri khale a nga si vulavula hi mhaka leyi, u kombele mana wakwe leswaku a n’wi pfuna a kuma rungula leri khomekaka malunghana ni leswaku ku ni Muvumbi.

Loko va ri ebazini hi siku leri landzeleke, Ronja u tirhise rungula leri a ri lunghiseleleke. Hambiswiritano, vafana lava va hlekule ripfumelo leri a ri na rona eka Yehovha. Un’wana wa vona u huwelele a ku: “Laha bazini a nga kona la pfumelaka eka Yehovha! Sweswi ndzi lava mi yimisa mavoko. I mani loyi a pfumelaka eka dyondzo ya ku tihundzukela ka swilo naswona i mani la pfumelaka eka Yehovha?” Ronja u hlamarile loko xifanyetana xin’wana lexi a xi tshame ekusuhi na yena xi yimisa voko ivi xi ku: “Mina ndzi pfumela eka Yehovha!” Vana van’wana vambirhi na vona va te: “Na hina!” Bulo ra Ronja ni vadyondzikulorhi ri twe ni hi vanhu van’wana naswona van’wana va tshembe rungula rakwe!

Wanuna La Nga Kotiki Ku Tsala Ni Ku Hlaya A Kuma Buku

Siku rin’wana vavanuna vambirhi lava vulavulaka Xiarabic lava humaka eSyria va ye ehofisini ya rhavi ya le Denmark. Va fike va byela vamakwerhu va xisati lava a va ri laha vanhu va fikelaka kona leswaku va lava Timbhoni ta Yehovha. Loko vamakwerhu lava va va byela leswaku hi yona ndhawu leyi va yi lavaka, vavanuna lava a va tsake ngopfu. Xana a va yi kume kwihi adirese? A va kombe vatirhi va le layiburari ya kwalaho xifaniso lexi a xi ri eka foni ya vona. Xifaniso xa kona a xi ri xa tluka ra vakandziyisi ra buku leyi nge Xana Bibele Yi Dyondzisa Yini Hakunene? Kutani vatirhi lava va kote ku nyika vavanuna lava adirese ya hofisi ya rhavi.

Vavanuna lava vambirhi a va nga swi koti ku vulavula Xidenixi. Kutani ku vitaniwe makwerhu loyi a a vulavula Xiarabic laha a va ri kona. A swi ri erivaleni leswaku un’wana wa vavanuna lava a a tsakela ku dyondza swo tala hi Bibele. Makwerhu loyi u teke vuxokoxoko byakwe ivi a n’wi tshembisa leswaku u ta n’wi endzela hi xihatla naswona u ta ta ni makwerhu loyi a vulavulaka Xiarabic.

Loko va endzela wanuna loyi ekaya rakwe, vamakwerhu va fike va kuma leswaku a nga si tshama a endzela hi Timbhoni ta Yehovha. U va byele leswaku u kume buku ebokisini rakwe ra poso hambileswi a ku nga tsariwanga vito ku kombisa leswaku i ya munhu la vulavulaka Xiarabic. Hikwalaho ka leswi a nga kotiki ku tsala ni ku hlaya, u kombele munghana wakwe leswaku a n’wi hlayela buku leyi naswona va yi hete hi masiku manharhu. Leswi a swi tweke swi n’wi tiyisekisile leswaku u kume ntiyiso.

Ku va a ri muhlapfa naswona a ri ekule ni vandyangu wakwe swi n’wi tikerile swinene kambe u kume nchavelelo eBibeleni. Loko vamakwerhu va n’wi endzela ro sungula u va vutise a ku: “Ha yini mi nga ndzi endzelanga khale? A ndzi ri ni xivundza.” U ya emahlweni a dyondza ni vamakwerhu naswona u tsakisiwa hi leswi a nga eku swi dyondzeni.

A A Ri Ni Gome Kambe Sweswi Se U Tsakile

Dmitry a a ri mininjhere ya khampani leyi xavisaka fole eUkraine, kambe loko se a xiye ndlela leyi fole ri va vavisaka ha yona vanhu u tshike ntirho wakwe lowu a wu holela kahle. Ku nga si hela tinh’weti tinharhu, mana wakwe ni mana wa nsati wakwe va file. Swi n’wi tseme nhlana ku feriwa hi vanhu lava, lava a va rhandza. A a ri ni ntshembo wa leswaku u ta kuma tinhlamulo ta swivutiso swakwe ekerekeni leyi a nghena yona kambe a swi va nga tano. Munghana wakwe u n’wi byele leswaku ku va xirho xa Orthodox swi vula ku va “u ambala xihambano ntsena kambe a wu eneriseki hi nchumu.” Leyi hi yona ndlela leyi Dmitry a titwa ha yona. U xiye leswaku a nga tivi nchumu hi Xikwembu kumbe hi Bibele. Leswi a a ri ni gome, u sungule ku khongela leswaku a kuma mpfuno. Kutani u tsundzuke leswaku u tshame a twa leswaku ku ni Timbhoni ta Yehovha. U kume website ya hina eka Internet naswona u tsakisiwe swinene hi rungula ra yona ro tala leri vulavulaka hi Bibele. Kutani u lave Holo ya Mfumo ya le kusuhi. Loko a fika laha ku pakiwaka timovha, makwerhu u n’wi amukerile ivi a n’wi vutisa loko ku ri ni leswi a lavaka a n’wi pfuna hi swona. Dmitry u te: “Ndzi lava ku dyondzeriwa Bibele.” Sweswi se u ni tinh’weti ta tsevu a ri karhi a dyondza, u va kona eminhlanganweni nkarhi na nkarhi naswona u tlhela a hlamula.

Ku Tlhelela Eka Lava Tsakelaka Hi Ku Tirhisa Swipapilana

Paul na Faith lava tshamaka eBritain va ve ni bulo ro tsakisa ni wansati un’wana la vuriwaka Susan naswona va hlele leswaku va ta tlhela va n’wi endzela. Loko va tlhelela va kume leswaku Susan a a nga ri kona ekaya. Hi ku tirhisa ndzetelo lowu a wu vulavula hi swipapilana lowu a wu kumeka eka Vutirheli Bya Hina Bya Mfumo bya November 2014, Paul na Faith va siye xipapilana lexi a xi kombisa leswaku va ta tlhela va n’wi endzela hi siku leri landzelaka. Loko va tlhelela, swi va hlamarisile ku fika va kuma xipapilana enyangweni wa Susan. U va byele leswaku a ye eku xaveni ka swilo swa mucato wa n’wana wakwe. Paul na Faith va tlhele va n’wi siyela xipapilana lexi a xi vula leswaku va ta tlhela va vuya vhiki leri landzelaka. Hi siku rolero, Susan a a va rindzerile naswona va nambe va sungula dyondzo hi ku tirhisa buku leyi nge Leswi Bibele Yi Swi Dyondzisaka.

Hikwalaho ka leswi mucato wa n’wana wakwe a wu ri ekusuhi, Susan u kombele leswaku va nga ti eka riendzo leri landzelaka. Loko Paul na Faith va tlhelela nakambe, va kume leswaku a ku na munhu kutani va siya xipapilana xin’wana lexi a xi ri ni ni nomboro ya vona ya riqingho. A va tsakile loko va kuma rungula leri humaka eka Susan ri vula leswaku u kombela ku rivaleriwa hikwalaho ka leswi va nga n’wi kumangiki kambe a ri exirhapeni a ri karhi a vulavula ni muakelani wakwe. Ku sukela kwalaho, Susan u tsakela ku dyondza Bibele nkarhi na nkarhi naswona sweswinyana u ye eminhlanganweni ro sungula.

Paul na Faith va swi hisekela ku siyela vanhu swipapilana leswaku va burisana va vona. Va ri: “Ku ni vanhu vo hlaya lava va hlayeke swipapilana leswi hi va siyeleke swona. Swa tsakisa!”

Ripfumelo Leri A A Ri Na Rona Ri Khumbe Muongori Wakwe

Hi August 2014, makwerhu un’wana a ri exibedlhele eHungary hikwalaho ka leswi a ri ni vuvabyi bya ku va mahahu yakwe ma nga tirhi kahle. Lexi twisaka ku vava endzhakunyana u file. Malunghana na Tünde loyi a n’wi pfuna, nsati wa makwerhu loyi u tsale leswi:

“Hi ximumu xa 2015, ndzi ye eka Nhlengeletano ya Xifundzha leyi nge ‘Tekelela Yesu!’ ni n’wana wa mina wa jaha. Hi siku ro hetelela, a hi ri laha ku pakiwaka kona timovha hi ri karhi hi lunghekela ku muka, loko wansati un’wana a fika eka mina a veka tibege takwe ehansi a ndzi vukarha ivi a sungula ku rila. A ku ri muongori loyi a khathaleleke nuna wa mina eka lembe leri nga hundza loko a ha ri exibedlhele. U ndzi hlamusele leswaku nkarhi ni nkarhi loko va sungula ku tirha, muongori un’wana ni un’wana a a fanele a khathalela muvabyi un’we. Nkarhi hinkwawo a khongelela leswaku a averiwa ku ya khathalela nuna wa mina. A swi endleka minkarhi yo tala!

Tünde u ndzi byele leswaku ndlela leyinene leyi nuna wa mina a tikhome ha yona leyi a yi fambisana ni ripfumelo rakwe swin’we ni ndlela leyi a a wu hlamusela ha yona ntshembo wakwe, swi endle leswaku a lava ku sungula ku dyondza Bibele ni Timbhoni ta Yehovha.

Sweswi Tünde se u dyondza Bibele naswona u wu langutele hi mahlongati nkarhi lowu a nga ta amukela nuna wa mina loko a pfuxiwa. U lava ku n’wi byela leswaku matikhomelo yakwe swin’we ni ripfumelo leri a ri na rona ri n’wi pfune leswaku a dyondza hi Yehovha ni hi switshembiso swakwe swo tsakisa.”

Ku Chumayela eTimovheni

Hikwalaho ka leswi vanhu a va toyatoya naswona a ku pfariwe tindhawu tin’wana, mindzilakano yin’wana exikarhi ka tiko ra Greece na Bulgaria a yi pfariwile, leswi swi endleke leswaku ku va ni timovha to tala leti a ti fole layini. Vandlha ra kwalaho ra le Bulgaria ri tirhise nkarhi lowu leswaku ri nyika vanhu lava a va ri etimovheni minkandziyiso leyi sekeriweke eBibeleni leswaku va yi hlaya. Vamakwerhu va ye emindzilakaneni va ri ni minkandziyiso ya tindzimi ta 12. Vachayeri vo tala va tilori a va karhele kambe a va swi tsakela ku vulavula. Vamakwerhu va va yingiserile, va va nyika ntshembo ni ku va khutaza. Muchayeri un’wana u va vutise a ku: “Xana mi Timbhoni ta Yehovha?” Endzhaku ka loko va n’wi hlamurile u tlhele a ku: “A ndzi swi vona, phela i Timbhoni ta Yehovha ntsena leti chumayelaka ku fana na n’wina.” Muchayeri un’wana wa le Austria u te: “Mi kumeka hinkwako! Khomisani sweswo! Yanani emahlweni mi chavelela vanhu ni ku va nyika ntshembo.” Un’wana u te: “A ndzi si tshama ndzi navela ku hlaya minkandziyiso ya n’wina. Kambe sweswi ndzi ta swi tsakela ku yi hlaya.” Muchayeri un’wana u ririle loko vamakwerhu va n’wi chumayela. U va byele leswaku se swi ni malembe a ri Mbhoni. Vamakwerhu va n’wi khutaze leswaku a nga hlayi ntsena minkandziyiso kambe a endla matshalatshala ya leswaku a va kona evandlheni.