Nkatsakanyo Wa Tiko Ra Georgia

Tiko ra kona Georgia ri tiviwa hi tintshava ta rona letikulu ni gamboko leyi funengetaka tintshava, tin’wana ti kule timitara ta 4 500. Tiko ra Georgia ri avanyisiwe hi swiyenge swimbirhi leswikulu—xa le vuxeni ni xa le vupeladyambu, xin’wana ni xin’wana xi ni miganga ya xona yo hlayanyana leyi nga ni maxelo, mikhuva, vuyimbeleri, mincino ni swakudya swa xona n’wini.

Vanhu va kona Vo tala va vaakatiko lava endlaka 3,7 wa timiliyoni i va rixaka ra le Georgia.

Vukhongeri Nhlayo yo tala ya vanhu va nghena kereke leyi vuriwaka Orthodox Christian. Kwalomu ka tiphesente ta khume i Mamoslem.

Ririmi ra kona Ririmi ra le Georgia a ri yelani ni ra tindzimi leti vulavuriwaka ematikweni lama nga ekusuhi na rona. Matimu ma kombisa leswaku letere leri tolovelekeke ra le Georgia ri sunguriwe ku nga si fika Nguva ya hina leyi Tolovelekeke.

Ndlela yo tihanyisa Vanhu vo tala va tihanyisa hi ku rima. Sweswinyana, ku valangisa ku ve ntirho wa nkoka swinene eka ikhonomi ya le Georgia.

Maxelo Xiphemu xa le vuxeni bya tiko xi ni maxelo lamanene. Ribuwa leri nga eLwandle ra Ntima, evupeladyambu bya Georgia ra kufumela naswona mihandzu leyi fanaka ni malamula yi kula hi ku hatlisa.

Swakudya swa kona Swakudya swin’wana ni swin’wana leswi swi dyiwaka eGeorgia ku va ku ri ni xinkwa. Xinkwa xa xintu xi bakiwa hi ovhene leyi endliweke hi vumba. Swakudya leswi dyiwaka ngopfu i xiculu lexi cheriweke swipayisisi. Se i khale ku ri karhi ku endliwa vhinyo. Ya virisiwa kutani yi hlayisiwa eka makhuwana lamakulu. Mindyangu yo tala yi byala madiriva kutani yi tiendlela vhinyo. Georgia i tiko leri nga ni mixaka yo hambanahambana ya madiriva ya kwalomu ka 500.