Vanhu Lava Lavisiseke Ntiyiso

EKU sunguleni ka va-1920, Swichudeni swa Bibele swi endle matshalatshala leswaku swi fikelela vanhu lava a va lavisisa ntiyiso eGeorgia. Hi 1924, ku pfuriwe hofisi eBeirut le Lebanon, leswaku yi ta kongomisa ntirho wo chumayela etindhawini leti a ti katsa Armenia, Georgia, Syria na Turkey.

Hambileswi se a ku haxiwe mbewu ya ntiyiso eGeorgia, hi nkarhi wolowo a ku va nga ni mihandzu leyi vonakaka. (Mat. 13:33) Hambiswiritano, hi ku famba ka nkarhi, rungula ra Mfumo se a ri chumayeriwa hinkwako naswona leswi swi endle leswaku vanhu vo tala eGeorgia va cinca vutomi bya vona.

A A Lava Vululami

Vaso Kveniashvili a ha ri muntshwa loko ku tlhekeka nyimpi ya vumbirhi ya misava. Hikwalaho ka leswi tiko ra Georgia a ri ri xiphemu xa Soviet Union, tata wakwe u tekiwile leswaku a ya va eka vuthu ra Soviet. Hi nkarhi wolowo mana wa Vaso a file. Leswi Vaso a ku ri yena lonkulu, u sungule ku yiva leswaku a ta kota ku tikhathalela swin’we ni vamakwenu wakwe.

U joyine ntlawa wa vugevenga ivi endzhaku a katseka eka leswi a wu swi endla. Loko a hlamusela u ri, “A ndzi vona onge vugevenga byi ni vululami ku tlula ku titshega hi hulumendhe.” Kambe hi ku hatlisa Vaso u swi xiyile leswaku nchumu lowu a a wu lava a nga ta wu kuma eka mfumo wa vanhu. U ri: “A ndzi lava nchumu lowu nga ni vululami.”

Vaso u hetelele a khomiwile hikwalaho ka vugevenga byakwe naswona u yisiwe ekampeni ya vuhlonga ya le Siberia. Loko a ri kwalaho, u hlangane ni Mbhoni ya Yehovha leyi a yi khotsiwile hikwalaho ka ripfumelo ra yona. Loko a hlamusela u ri: “Eku heteleleni, se a ndzi kume leswi a ndzi swi lava, hambileswi a hi nga ri na minkandziyiso ndzi endle leswi ndzi nga swi kotaka leswaku ndzi dyondza leswi makwerhu loyi a ndzi byela swona.”

Loko Vaso a ntshunxiwa hi 1964, u tlhelele eGeorgia kutani a fika a lava Timbhoni ta Yehovha. Hi nkarhi wolowo, a ha ya emahlweni a vulavula ni munhu loyi a khotsiwe na yena hi ku tirhisa mapapila. Lexi vavaka, hileswaku munghana wakwe u file naswona Vaso hi nkarhi wolowo a nga ha swi kotanga ku ti hlanganisa ni Timbhoni. U boheke ku rindza malembe ya kwalomu ka 20 a nga si tlhela a hlangana na tona. Hi ta tlhela hi twa swo tala hi yena.

Ku Tiyisela Swi Ve Ni Vuyelo Lebyinene

Swi ve ni vuyelo lebyinene ku va Valentina Miminoshvili nhwanyana wa le Georgia a yisiwe ekampeni ya nxaniso ya Manazi. Loko a ri kwalaho u hlangane ni Timbhoni ta Yehovha ro sungula. Lexi n’wi tsakiseke swinene a ku ri ripfumelo ra tona leri tiyeke. U tsakisiwe swinene hileswi ti n’wi dyondziseke swona ku suka eBibeleni.

Loko a tlhelela ekaya endzhaku ka nyimpi, Valentina u sungule ku byela van’wana ntiyiso lowu a wu kumeke. Kambe loko valawuri va kwalaho va swi xiyile leswi a swi endla va n’wi gweve malembe ya khume ekampeni ya nxaniso ya le Russia. Loko a ri kwalaho u tlhele a hlangana ni Timbhoni ta Yehovha naswona endzhakunyana u khuvuriwile.

Endzhaku ka loko a ntshunxiwile ekampeni hi 1967, Valentina u rhurhele evupeladyambu bya Georgia laha a tlheleke a sungula ntirho wakwe wo chumayela exihundleni. A a nga swi xiyi leswaku siku rin’wana xikhongelo xakwe lexi humaka embilwini xi ta hlamuriwa.

Yehovha U Hlamule Swikhongelo Swakwe

Hi 1962, Makwerhu Antonina Gudadze u suke eSiberia a rhurhela eGeorgia loko nuna wakwe loyi a nga riki Mbhoni a tlhelele etikweni ra rikwavo. Loko a ha ri eSiberia, Antonina u dyondzisiwe ntiyiso hi Timbhoni leti a ti ri evuhlongeni. Leswi se a a tshama eKhashuri le vuxa bya Georgia, u kume leswaku a ku nga ri na Timbhoni.

Loko Antonina a tsundzuka ndlela leyi Yehovha a hlamuleke swikhongelo swakwe ha yona u ri: “Siku rin’wana manana u ndzi rhumele nhundzu ku suka eSiberia naswona endzeni ka yona ndzi kume minkandziyiso leyi sekeriweke eBibeleni yi fihliwile. A ndzi hamba ndzi yi kuma hi ndlela yoleyo ku ringana malembe ya tsevu. Nkarhi na nkarhi a ndzi nkhensa Yehovha hikwalaho ka nkongomiso, xikhutazo ni nkhathalelo wakwe.”

Hambiswiritano, Antonina a a ri yexe. U ri: “A ndzi tshama ndzi ri karhi ndzi kombela Yehovha leswaku a ndzi hlanganisa ni vamakwerhu. Siku rin’wana ku fike vavasati vambirhi exitolo lexi a ndzi tirha eka xona. Va fike va ndzi vutisa va ku: ‘Xana hi wena Antonina?’ Hikwalaho ko n’wayitela ka vona ndzi nambe ndzi swi xiya leswaku i vamakwerhu. Hi vukarhanile ivi hi rila swinene.”

Valentina Miminoshvili a a ri wun’wana wa vamakwerhu lava. Mawaku ndlela leyi Antonina a a tsake ha yona loko a kuma leswaku minhlangano a yi khomeriwa evupeladyambu bya Georgia! A a ya eminhlanganweni kan’we hi n’hweti hambileswi laha a yi khomeriwa kona a boheka ku famba tikhilomitara to tlula 300 ku suka ekaya rakwe.

Vanhu Va Le Vupeladyambu Bya Georgia Va Kume Ntiyiso

Hi va-1960, Timbhoni tin’wana leti a ti xanisiwa hi valawuri etindhawini tin’wana ta Soviet Union ti rhurhele etindhawini leti swiyimo a swi antswa. Vladimir Gladyuk loyi a ri muntshwa la hisekaka a ri wun’wana wa vamakwerhu lava. Hi 1969, u suke eUkraine a rhurhela edorobeni ra Zugdidi le vupeladyambu bya Georgia.

Eku sunguleni lava a va ye eGeorgia a va fambisa minhlangano hi Xirhaxiya. Hambiswiritano, loko se ku ri ni vanhu vo tala va le Georgia lava a va tshamela ku va kona eminhlanganweni, ku endliwe malunghiselelo ya leswaku minhlangano yi hamba yi khomiwa hi Xigeorgia. Ntirho wo chumayela wu tswale mihandzu lerova hi August 1970 ku khuvuriwe vanhu va 12 va kwalaho.

Hi ximun’wana xa 1972, Vladimir ni ndyangu wakwe va rhurhele edorobeni ra Sokhumi leri nga evupeladyambu eribuweni ra Lwandle ra Ntima. Loko Vladimir a hlamusela u ri: “A hi titwa hi enerisekile hi ndlela leyi Yehovha a endla leswaku hi n’wi tiva ku antswa ha yona naswona a hi n’wi nkhensa hikwalaho ka leswi a hi katekisa. Vandlha ri kule hi ku hatlisa.” Hi ximun’wana xolexo ku khomiwe Xitsundzuxo ro sungula eSokhumi naswona ku ve ni vanhu va 45.

“Ndzi Yingiserisise Hi Mbilu Hinkwayo”

Babutsa Jejelava loyi sweswi a nga ni malembe ya kwalomu ka 90, a ri wun’wana wa vanhu lava hatleke va amukela ntiyiso eSokhumi eku sunguleni ka 1973. U ri: “Siku rin’wana ndzi vone vavasati va mune lava a va bula hi mhaka yo tsakisa. Ndzi xiye leswaku vambirhi a ku ri tinani kasi lavan’wana vambirhi a ku ri Timbhoni ta Yehovha.” Makwerhu un’wana a ku ri nsati wa Vladimir Gladyuk ku nga Lyuba naswona loyi u n’wana a ku ri Itta Sudarenko phayona leri a ri hiseka swinene loyi a humaka eUkraine.

Babutsa u tsundzuka ndlela leyi a titweke ha yona loko a twa bulo leri a va ri vulavula u ri: “Ndzi yingiserisise hi mbilu hinkwayo.” Loko a twa leswaku Xikwembu xi ni vito, u hatle a ya laha a va bula kona kutani a va vutisa loko a ta swi kota ku ri vona ku suka eBibeleni. U vutise swivutiso swo tala lerova bulo ri heta tiawara tinharhu.

Leswi Babutsa a a anakanya leswaku a nge he tlheli a ti vona Timbhoni, u ti vutise a ku: “Xana mi ta famba mi ndzi siya laha?”

Makwerhu u hlamule a ku: “A hi nge ku siyi. Hi ta tlhela hi vuya Mugqivela lowu taka.”

Mugqivela wu fikile naswona Babutsa a a tsakile swinene hikwalaho ka leswi vamakwerhu lavambirhi va vuyeke! Va nambe va sungula dyondzo ya Bibele. Loko dyondzo yi ri ekusuhi ni ku hela, Babutsa u tlhele a ti vutisa loko a ta tlhela a hlangana ni Timbhoni. U te: ‘Ndzi kume vanhu lava. Sweswi ndzi fanele ndzi tiyiseka leswaku ndzi nga hambani na vona.’

Babutsa u te ni kungu. Wa hlamusela: “A ndzi swi tiva leswaku Lyuba u catile, kutani ndzi vutise Itta loko na yena a catile. Itta u vule leswaku a nga na nuna. Kutani ndzi n’wi byele ndzi ku, ‘rhurhela endlwini ya mina!’ Ku ni mibedo yimbirhi naswona ku ni rivoni exikarhi ka yona. Hi nga veka Bibele ehansi ka rona kutani hi bula hi Bibele nivusiku!’” Itta u pfumerile kutani a rhurhela endlwini ya Babutsa.

Loko Babutsa a tsundzuka nkarhi wolowo u ri: “Minkarhi yin’wana a ndzi nga etleli nivusiku ndzi ri karhi ndzi anakanyisisa hi leswi ndzi swi dyondzeke. Loko hi ku hatlisa ndzi va ni xivutiso, a ndzi pfuxa Itta ndzi ku: ‘Teka Bibele ya wena. Ndzi ni xivutiso!’ Itta a a ta hlamula a ri karhi a ti pfinyinga mahlo a ku, ‘Swi lulamile.’ A a ta pfula Bibele ivi a ndzi komba nhlamulo.” Endzhaku ka masiku manharhu Itta a fikile, Babutsa se a a chumayela mahungu lamanene!

Babutsa a ri ni munghana loyi a a vuriwa Natela Chargeishvili. Babutsa u ri: “A ndzi anakanya leswaku rifuwo ri ta endla leswaku a nga wu tsakeli ntiyiso, kambe a ndzi hoxisile. Eka bulo ra hina ro sungula, u nambe amukela ntiyiso.” Hi ku hatlisa, havumbirhi bya vona a va byela vanghana, lava tirhaka na vona ni vaakelani hi ntshembo wa vona.