“Xikwembu Hi Xona Lexi Hambeteke Xi Swi Kurisa.”—1 Kor. 3:6.

HI 1991 tiko ra Georgia ri sungule ku tifuma, ku nga lembe leri mfumo wa Soviet Union wu tshikeke ku fuma. Kambe ku cinca ka tipolitiki ni mpfilumpfilu wa tiko swi endle leswaku swiyimo swa vutomi swi ya swi tika swinene. Genadi Gudadze, loyi a a ri mulanguteri wa muganga eka malembe wolawo, u vula leswaku vanhu a va heta siku hinkwaro va folele xinkwa.

Hi nkarhi wolowo a swi tolovelekile leswaku Timbhoni ti chumayela rungula ra Bibele eka mintlawa ya vanhu lava a va fole layini. Genadi u ri: “Hi nkarhi wolowo wo tika, a swi tikomba onge vanhu hinkwavo a va wu tsakela ntiyiso. Hi kume swikombelo swa madzana leswi a swi ri ni tiadirese ta vanhu lava a va lava ku dyondzeriwa Bibele.”

Loko nhlangano wun’wana ni wun’wana wu hela, vakulu a va hlaya nxaxamelo wa mavito ni tiadirese ta vanhu lava kombeleke ku endzeriwa. Vahuweleri a va lulamisa swiyimo swa vona leswaku va tlhelela eka vanhu volavo.

Makwerhu Levani Sabashvili, loyi a a ri nkulu eTbilisi u tsundzuka vatekani van’wana lava kombeleke ku endzeriwa. U ri: “Tiadirese hinkwato a ti tekiwa hi vahuweleri vo hambanahambana, kambe a nga kona ni un’we loyi a lava ku endzela vatekani lava. A va tshama ekule naswona vo tala va hina se a hi ri ni tidyondzo to tala ta Bibele.”

Endzhaku ka tin’hweti ti nga ri tingani, vatekani volavo va tlhele va rhumela xikombelo. Va tlhele va rhumela xikombelo xa vanharhu, lexi eka xona a ku ri ni papila leri a va kombela Timbhoni leswaku ti tshama ti basile engatini. (Mint. 20:26, 27) Levani u ri: “A ku ri nguva ya Lembe Lerintshwa naswona a hi papalata ku endzela vanhu hi nkarhi wolowo. Kambe hi swi xiyile leswaku sweswi a hi fanele hi va endzela.”

Roini na Nana Grigalashvili, vatekani lava a va lava ku tiva swo tala hi Xikwembu, a va twa onge vo lorha loko mixo wun’wana ku fika Levani ni makwerhu un’wana ekaya ka vona. Va nambe va sungula dyondzo ya Bibele. Roini na Nana sweswi se i maphayona ya nkarhi hinkwawo ku katsa ni vana va vona.

Matshalatshala Lama Endliweke Leswaku Ku Fikeleriwa Lava Tsakelaka

Tanihi leswi a ku ri vanhu lava tlangelaka, hi ku tirhandzela, lava amukeleke ntiyiso va nyikele hi nkarhi, matimba ni hi rifuwo ra vona leswaku va ta chumayela mahungu lamanene eka vanhu van’wana. Ku nga khathariseki vutihlamuleri bya vona bya ndyangu, Badri na Marina Kopaliani hi van’wana va vanhu lava yeke eswimitanini leswi nga ekule leswaku va ya pfuna vanhu lava tsakelaka.

Hi mahelovhiki, Badri na Marina ku katsa ni majaha ya vona, Gocha na Levani a va hlela maendzo yo ya exifundzheni xa le Dusheti, ku nga ndhawu yo saseka ya tintshava leyi nga en’walungwini wa Tbilisi. Leswaku va ya eswimitanini leswi nga ekule, minkarhi yin’wana a va famba tikhilomitara ta kwalomu ka 150 hi magondzo lama gombonyokeke.

Siku rin’wana, wansati un’wana u rhambe Badri ni nsati wakwe laha a a tirha kona. Badri u ri: “Hi tikume hi ri ekamareni lerikulu laha a ku ri ni vanhu va kwalomu ka 50 lava a va hi rindzerile! Eku sunguleni, swi ndzi hlamarisile, kambe endzhaku ko loko ndzi khongele eka Yehovha, ndzi sungule ku bula hi tindzimana leti nga eka Matewu 24 leti vulavulaka hi swikombiso swa masiku ya makumu. Un’wana loyi na yena swi n’wi hlamariseke u vutise a ku, ‘Ha yini vaprista va hina va nga hi byeli swilo leswi?’”

Xitsundzuxo Lexi Endleke Leswaku Vo Tala Va Tsakela

Xitsundzuxo xa rifu ra Yesu xi endle leswaku vanhu vo tala lava tsakelaka va le Georgia va kuma nkarhi wo twa ntiyiso. Hi xikombiso, hi 1990, Xitsundzuxo lexi a xi khomeriwe ekaya ra Makwerhu wa xisati Ia Badridze eTbilisi xi endle leswaku vaakelani va sungula ku tsakela swinene.

Makwerhu wa xisati Badridze u pfule kaya rakwe leswaku ku khomeriwa Xitsundzuxo eka rona. Hi ku pfuniwa hi vana vakwe, u humese nhundzu hinkwayo leyi a yi ri ekamareni ro hungasela eka rona. Kambe a a ta swi kuma kwihi switulu leswi eneleke leswi vaendzi vakwe a va ta tshama eka swona? EGeorgia a swi tolovelekile leswaku mindyangu yi lomba matafula ni switulu loko vanhu va hlanganile. Tanihi leswi a lombeke switulu ntsena, vini va switolo a va tshamela ku vutisa va ku: “Xana a wu lavi na matafula? Xana mi ta dyela eka yini?”

Vanhu hinkwavo lava veke kona eXitsundzuxweni xa rifu ra Yesu va swi kotile ku nghena hinkwavo ekamareni leri Makwerhu wa xisati Badridze a ri lunghiselerile. Lexi hlamarisaka, ku ve ni vanhu va 200! Hi yona mhaka leyi endleke leswaku vaakelani vo tala va vutisa swivutiso malunghana ni Timbhoni ta Yehovha!

Xitsundzuxo Lexi Nga Rivalekiki

Hi 1992, ku hirhiwe tiholo letikulu leti eka tona a ku ta khomeriwa Xitsundzuxo eswiphen’wini swo hambanahambana swa tiko. Davit Samkharadze, loyi a a tshama eGori, u tsundzuka loko mulanguteri wa muganga a n’wi vutisa hi malunghiselelo ya vona ya Xitsundzuxo.

Loko a xiya leswaku vahuweleri a va hlele ku ya hlangana ekaya ra makwerhu, u va vutise a ku: “Xana a yi kona holo leyikulu laha tikweni? Ha yini mi nga hirhi yona?” Tanihi leswi holo yoleyo a yi nghenisa vanhu vo tlula 1 000, ni leswi nhlayo ya vahuweleri va kwalaho a yi tlula 100, a va vona swi nga bohi ku hirha holo yoleyo leyikulu.

Mulanguteri wa muganga u ringanyete leswi: “Loko muhuweleri ha un’we o rhamba vanhu va khume, holo hinkwayo yi ta tala.” Hambileswi eku sunguleni xitsundzuxo xakwe a xi vonaka onge a xi nge koteki, vahuweleri va tirhe hi matimba leswaku va xi landzela. Lexi va hlamariseke ni ku tlhela xi va tsakisa swinene, a ku ri ni vanhu vo tlula 1 036 eXitsundzuxweni!a

Maphayona Lama Hisekaka Ma Ya Chumayela eTindhawini Tin’wana

Hi 1992, a ka ha ri ni swifundzha swin’wana eGeorgia laha vanhu va Yehovha a va nga si tshama va chumayela rungula ra le Bibeleni. Xana tindhawu leti a ti ta chumayeriwa njhani hi nkarhi lowu xiyimo xa ikhonomi xa tiko a xi nga ri exiyin’weni lexinene?

Tamazi Biblaia, loyi a a tshama evupeladyambu bya Georgia hi nkarhi wolowo, u ri: “Mulanguteri wa muganga u hlangane ni van’wana va hina leswaku hi ta bula hi leswi hi nga swi endlaka. A hi nga tivi swo tala malunghana ni lunghiselelo ra maphayona yo hlawuleka. Kambe a hi swi tiva leswaku mahungu lamanene ma fanele ma chumayeriwa hi xihatla.” (2 Tim. 4:2) Eku heteleleni, ku hlawuriwe maphayona ya 16 kutani ma rhumeriwa etindhawini to hambanahambana etikweni hinkwaro.—Vona mepe lowu fambisanaka ni xihloko lexi.

Hi May 1992, ku khomiwe nhlangano lowu tekeke tiawara tinharhu eTbilisi leswaku ku khutaziwa maphayona lawa a ma averiwe ku ya tirha etindhawini toleto ku ringana tin’hweti ta ntlhanu. N’hweti yin’wana ni yin’wana, vakulu a va ma endzela ni ku ma khutaza leswaku ma tshama ma ri ni vuxaka lebyinene ni Xikwembu ni ku tlhela va ma pfuna hi swilaveko swa wona swa nyama.

Manea Aduashvili na Nazy Zhvania, maphayona mambirhi ya xisati, va rhumeriwe edorobeni ra Ozurgeti. Manea, loyi hi nkarhi wolowo a a ri ni malembe ya 60, u ri: “A hi swi tiva leswaku ku ni munhu loyi a tsakelaka loyi a tshama ekusuhi ni le Ozurgeti. Kutani loko ha ha ku fika, hi hlele ku n’wi endzela. Loko hi fika ekaya ra wansati yoloye, a hi rindzile naswona a rhambe ni van’wana va 30. Hi sungule tidyondzo to tala ta Bibele siku rero.”

Eka tin’hweti leti landzeleke, tidyondzo toleto a ta ha ya emahlweni ti hiseka. Endzhaku ka tin’hweti ta ntlhanu, swichudeni swo ringana 12 a swi lunghekele ku khuvuriwa!

Ku Tinyiketela Ka Vona Ku Ve Ni Vuyelo Lebyinene

Vamakwerhu vambirhi lava nga maphayona, Pavle Abdushelishvili na Paata Morbedadze, va rhumeriwe eTsageri. Ndhawu leyi yi le kusuhi ni xifundzha lexi yi namarhelaka swinene mindhavuko ya khale leyi fambisanaka ni tidyondzo ta Vujagana.

Loko xixika xi lava ku sungula, xiavelo xa maphayona xa tin’hweti ta ntlhanu a xi ri ekusuhi ni ku hela naswona Paata u komberiwe ku ya pfuneta eka ntirho wa vuhundzuluxeri endhawini yin’wana. Kutani Pavle a fanele a teka xiboho. Wa hlamusela: “A ndzi swi tiva leswaku swi ta ndzi tikela swinene ku heta xixika ndzi ri eTsageri. Kambe tidyondzo ta hina ta Bibele a ta ha lava ku pfuniwa, kutani ndzi hlawule ku tshama.”

Pavle u ri: “Ndzi tshame ni ndyangu wun’wana wa kwalaho. Minkarhi yo tala, a ndzi tshama ndzi ri eku chumayeleni. Nimadyambu a ndzi tshama ni ndyangu wolowo ekamareni ro wisela eka rona leri a ri ri exithezini xo sungula, kutani hi orha ndzilo eka xitofu lexi tirhisaka tihunyi. Kambe loko nkarhi wa leswaku ndzi tlhelela ekamareni ra mina wu fika, a ndzi ambala xihuku kutani ndzi funengela nkumba lowukulu.”

Loko vakulu va endzela Pavle hi ximun’wana, swichudeni swa 11 swi fanelekele ku va vahuweleri lava nga khuvuriwangiki. Hi ku hatlisa, hinkwavo va khuvuriwile.