Ezekiyeli
5 “Wena n’wana wa munhu, teka a cipadha co kariha u ci tirisa kota likari* la mutsemeti wa misisi. Tsema a misisi ya wena ni malevhu ya wena, u teka cikalo u yi peza, u yi avanyisa hi zvipandze. 2 U ta hisa cipandze ca wunharu ca yona ndzilweni lomu cikari ka dhoropa laha a masiku ya kurandzelwa ma to mbhela.+ Hi kulandzela, u ta tsemelela a cipandze leci cin’wani ca wunharu matlhelweni wontlhe ya dhoropa;+ a cipandze ca wunharu co gumesa, u ta ci xwanya moyeni. Mina ndzi ta hlomula a cipadha ci yi hlongolisela.+
3 “Teka misisi yi tsongwani cikari ka yona u yi bohela ka zvipetswa* zva nguwo ya wena. 4 U ta teka cin’wani cipandze ca yona u ci hoxela ndzilweni ciswa. A ndzilo lowu wu ta hangalaka ka yindlu yontlhe ya ka Izrayeli.+
5 “Jehovha, a Hosi ya Hombe, i ngalo: ‘Loyi hi Jerusalema. Ndzi mu vekile cikari ka matiko lawa ma mu randzeleko. 6 Kanilezvi i no hluwukela a zviboho zva mina zva kulamula ni zvileletelo zva mina, a maha kubiha ka hombe a ku hundza ni matiko lawa ma mu randzeleko.+ Hakuva va alile a zviboho zva mina zva kulamula ni ku famba milayweni ya mina.’
7 “Hikwalaho, Jehovha, a Hosi ya Hombe, i ngalo: ‘Lezvi mu hungukileko mu pala ni matiko lawa ma mu randzeleko, mu nga fambi milayweni ya mina ni ku hlayisa a zviboho zva mina zva kulamula, kanilezvi mu landzela a zviboho zva kulamula zva matiko lawa ma mu randzeleko,+ 8 Jehovha, a Hosi ya Hombe, i ngalo: “Ndza ku vhukela, wena dhoropa,+ mina ha ndzoce ndzi ta ku lamula kuwoneni ka matiko.+ 9 Ndzi ta maha ka wena a zvilo zva ku cima a ndzi se maha, niku ndzi nga ta ha tshuka ndzi zvi maha kambe, hi kota ya mitiro ya wena yontlhe yo nyenyeza.+
10 “‘“Hikwalaho, a vapapayi cikari ka wena va taga a vana vabye,+ ni vana va taga a vapapayi vabye. Ndzi ta lamula cikari ka wena ndzi tlhela ndzi hangalasa a misalela ya wena yontlhe matlhelweni wontlhe.”’*+
11 “‘Hikwalaho, a ku khwatsi hi lezvi ndzi hanyako’, ku wula Jehovha, a Hosi ya Hombe, ‘kota lezvi u bihisileko a wutshamu ga mina go basa hi zvifananiso zva wena zvontlhe zva manyala ni mitiro ya wena yontlhe yo nyenyeza,+ minawu ndzi ta ku ala.* A tihlo ga mina gi nga ta ku tsetsa ne ndzi nga ta ku zwela wusiwana.+ 12 A cipandze ca wunharu ca vanhu va wena va tafa hi ntungu* kutani ku lova cikari ka wena hi ndlala. A cin’wani cipandze ca wunharu ci ta dawa hi cipadha matlhelweni ya wena wontlhe.+ Ni cipandze ca wunharu leci co gumesa ndzi ta ci hangalasa matlhelweni wontlhe* ndzi tlhela ndzi hlomula cipadha ci va hlongolisela.+ 13 Makunu a zanga ya mina yi ta chikela magumo, ni khulo ga mina hehla kabye gi ta bohla, ndzi xalala.+ Va ta zvi tiva lezvaku mina, Jehovha, ndzi wulawulile hi kota ya lezvi ndzi londzako a ku khozelwa ndzoce,+ a cikhati leci ndzi to ngha ndzi mbhetile a ku chulula a khulo ga mina hehla kabye.
14 “‘Ndzi ta ku maha rumbi ni ciruko cikari ka matiko lawa ma ku randzeleko ni kuwoneni ka vontlhe va to hundza hi ka wena.+ 15 U tava ciruko, u chepetiwa,+ uva citlharihiso u tlhela u hlamaliwa hi matiko lawa ma ku randzeleko a cikhati leci ndzi to ku lamula hi zanga ni khulo ni kutsayisa ka hombe. Mina, Jehovha, ndzi wulile.
16 “‘Ndzi ta va phandela a tigalala ti dayako ta ndlala kasi ti va lovisa. A tigalala leti ndzi to mu phandela ti ta mu lovisa.+ Ndzi ta maha ndlala yi mu tshingela hi ku vhala zvakuga zvi nga ha ngheni.*+ 17 Ndzi ta rumela ndlala ka n’wina ni zvivandza zvo leva,+ zvona zvi ta khadamula a vana va n’wina. A ntungu ni kuhalatiwa ka nkhata zvi tava hehla ka n’wina niku ndzi ta mu nehela cipadha ci ta mu vhukela.+ Mina, Jehovha, ndzi wulile.’”