Zakariya
10 “Kombelani vhula ka Jehovha hi nguva ya vhula yo gumesa.
Hi Jehovha a mahako a marefu ya cingulo,
Loyi a va chululelako a tivhula a vanhu,+
A va nyika mihandzu vontlhe lomu masin’wini.
2 Hakuva a zvifananiso zva terafime* zvi wulawula kukhohlisa;
Ni vavhumbi va wona a miwoniso ya mawunwa.
Va wulawula hi miloro yi nga vhuniko nchumu,
Va zama ku chavelela van’wani mahala.
Hikwalaho, va ta pepetseka a ku fana ni tiyivhu.
Va ta xaniseka hakuva a ku na murisi.
3 A zanga ya mina yi vhurela a varisi;
Ndzi ta tsayisa a varangeli va tihanyi,*
Hakuva Jehovha wa mabutho i alakanyile ntlhambi wakwe,+ a yindlu ya ka Judha;
I va mahile va ku khwatsi i haxi gakwe go ngangamela le yimpini.
4 Hi ka yena ku huma hosana,*
Hi ka yena ku huma a mufumeli wa ku vhunetela,*
Hi ka yena ku huma a wura ga yimpi;
Hi ka yena ku huma vawoneleli, vontlhe na va hi zvin’we.
5 Va ta fana ni masochwa
Ma kandzihetelako madhaka ya maruwa le yimpini.
6 Ndzi ta kulisa yindlu ya ka Judha,
Ndzi ponisa a yindlu ya ka Josefa.+
Ndzi ta va wuyisa,
Hakuva ndzi ta va mahela wuxinji;+
Va ta ku khwatsi cima a ndzi se tshuka ndzi va tsika;+
Hakuva hi mina Jehovha, a Nungungulu wabye, niku ndzi ta va hlamula.
7 Lava va ka Efrayime va ta ku khwatsi musochwa wa nhenha;
A timbilu tabye ti ta tsaka a ku khwatsi hi loku va nwile vhinyo.+
A vana vabye va ta zvi wona va tsaka,
Ni timbilu tabye ti ta tsakela Jehovha.+
8 ‘Ndzi ta va bela noti, ndzi va tlhanganisa.
Hakuva ndzi ta va tlhatlhisa+ niku va ta tala,
Va simama ku tala.
9 Hambu loku ndzi va hangalasa a ku khwatsi timbewu cikari ka matiko,
Va ta ndzi alakanya hi ka matshamu ya le kule;
Zvin’we ni vana vabye va tava ni ntamu, va wuya.
10 Ndzi ta va wuyisa hi le tikweni ga Gibhite,
Ndzi va hlengeleta hi le Asiriya;+
Ndzi ta va tisa tikweni ga Gileyadhe+ ni Lebhanoni;
Va ta vhumala ni ka ku tshama kona.+
11 I ta tsemakanya bimbi a gi vangela kukarateka;
A kueta kontlhe ka congo wa Nilo ku tapswha.
A matshandza ya Asiriya ma ta koramiswa,
Ni nhonga ya wuhosi ya Gibhite yi ta susiwa.+