Joba
32 Makunu a vavanuna lava va vanharu va no nyima ku zama ku hlamula Joba, hakuva i wa kholwa lezvaku i lulamile.*+ 2 Kanilezvi Elihu, a n’wana wa Bharakeli, a muBhuzi,+ wa ngango wa Aramu, i wa zangarile nguvhu. A zanga yakwe yi no vhurela Joba hi lezvi a nga zama ku ti maha wo lulama a ku hundza Nungungulu.+ 3 I wa zangarisilwe nguvhu kambe hi vanghana vanharu va Joba hi lezvi va nga vhumalile zvo hlamula kanilezvi vaku Nungungulu i bihile.+ 4 Elihu i wa rindzele kasi ku hlamula Joba, hakuva va wa hi tinhondzo kakwe.+ 5 A cikhati leci Elihu a nga wona lezvaku a vavanuna lava va vanharu a va na ca ku hlamula, a zanga yakwe yi no vhura. 6 Makunu Elihu, a n’wana wa Bharakeli, a muBhuzi, i no sangula a ku wulawula, aku:
Hikwalaho, ndzi no kombisa cichavo ndzi miyela,+
A ndzi tiyangi a ku mu byela lezvi ndzi zvi tivako.
7 Ndzi te ngalo ka mina n’winyi: ‘A tanga* yi wa wulawule,
Ni kutala ka malembe ku wa huwelele wutlhari.’
8 Kanilezvi i moya lowu wu nga ka vanhu,
A kuhefemula ka Loyi wa Ntamu Wontlhe, ku va nyikako a kuzwisisa.+
10 Hikwalaho, ndzi ngalo: ‘Ndzi ingisele.
Minawu ndzi ta ku byela lezvi ndzi zvi tivako.’
11 Ndzi wa rindzela ku mu wulawula;
Ndzi tshamile ndzi ingisela a kupima ka n’wina+
Laha mu nga hlota co wula.+
12 Ndzi dembile ndleve ndzi mu ingisela,
Kanilezvi i hava ni mun’we wa n’wina a zvi kotileko ku komba ku Joba i phazamile,*
Kutani a hlamulileko a magezu yakwe.
13 Hikwalaho, mu nga wuli, muku: ‘Hi kumile wutlhari;
Hi Nungungulu a mu komamisako, a hi munhu.’
14 Joba a nga vhukelangi mina hi magezu,
Hikwalaho, ndzi nga ta mu hlamulisa a ku khwatsi hi lezvi n’wina mu nga mu hlamulisa zvona.
15 Va te kaye, a va ha hi na mihlamulo;
A va ha hi na co wula.
16 Ndza rindzela, kanilezvi a va ha wulawuli;
Va nyimile va ku pswhe, na va nga hi na hlamulo.
17 Hikwalaho, minawu ndzi ta hlamula;
Minawu ndzi ta wula lezvi ndzi zvi tivako,
18 Hakuva ndzi tele hi magezu;
A moya wu nga ndzeni ka mina wa ndzi susumeta ku wulawula.
19 Ndzeni ka mina ndzi fana ni vhinyo yi vhumalako ka ku hefemula hi kona,
A ku khwatsi tinghotso ta tiswa ti longileko ku phuxuka.+
20 Ndzi tsikeni ndzi wulawula ndzi ta kuma ku pepa!
Ndzi ta vhulula a nomu wa mina ndzi hlamula.