Kronekele wa wumbiri

9 Makunu a muzindza* wa le Xebha+ i nozwa mahungu xungetano hi Solomoni, hikwalaho i nota Jerusalema a ta ringa Solomoni hi zviwutiso zvo karata. I no famba ni malandza yakwe yo tala nguvhu, ni makameli ma nga rwele a mafura ya bhalsamu, ni ouro yo tala+ ni maribye ya lisima. I noya ka Solomoni a ya wulawula naye hi zvontlhe lezvi zvi nga hi mbilwini yakwe.+ 2 Solomoni i no hlamula a zviwutiso zvakwe zvontlhe. A ci kona ci nga mu karatela nguvhu* Solomoni a ku mu tlhamusela.

3 A cikhati leci a muzindza wa le Xebha a nga wona a wutlhari ga Solomoni,+ ni yindlu leyi a nga akile,+ 4 ni zvakuga zva meza yakwe,+ ni lezvi a malandza yakwe ma nga tshamisa zvona, ni lezvi va nga tirisa zvona lava va nga phamela lomu timezeni ni mabohela yabye, ni vacheteli vakwe va zvakunwa ni mabohela yabye, ni miphahlo ya kuhiswa leyi a nga yi nyikela hi kukhandzakanya ndlwini ya Jehovha,+ i no vhumala ni co wula.* 5 Hikwalaho, i no byela hosi, aku: “Lezvi ndzi nga zvizwa le tikweni ga mina xungetano hi mitiro* ya wena ni wutlhari ga wena lisine. 6 Kanilezvi a ndzi kholwangi lezvi ndzi nga zvizwa kala lezvi ndzi ngata ndzi ta zvi wona hi lawa ya mina.+ Phela lezvi ndzi nga byeliwa xungetano hi wutlhari ga wena ga hombe ne a hi khihlanya.+ Wa zvi hundza nguvhu lezvi ndzi nga zvizwa.+ 7 Va tsaka a vavanuna va wena, niku ma tsaka a malandza ya wena lawa contlhe cikhati ma nga mahlweni ka wena, mazwa a wutlhari ga wena! 8 I wa dhumiswe Jehovha, a Nungungulu wa wena, loyi a xaleleko hi wena, a ku veka citshan’wini cakwe ca wuhosi kota hosi vitweni ga Jehovha, a Nungungulu wa wena. Kota lezvi a Nungungulu wa wena a randzako Izrayeli+ ni lezvi a lavako lezvaku a tshama kala kupindzuka, i ku yimisile kota hosi ya Izrayeli kasi u fuma hi nongameto ni kululama.”

9 Andzhako ka lezvo, i no nyika hosi a 120 wa titalenta* ta ouro,+ ni mafura yo tala ya bhalsamu ni maribye ya lisima. A ka ha tshukangi ku nehiwa a mafura ya bhalsamu yo kota lawa a muzindza wa le Xebha a nga nyika hosi Solomoni.+

10 A ku tsika lezvo, a malandza ya Hiramu ni malandza ya Solomoni, lawa ma nga wuya ni ouro hi le Ofira,+ ma no wuya kambe ni mapulango ya ndzonvori ni maribye ya lisima.+ 11 A hosi yi no maha a zvikadha zva yindlu ya Jehovha+ ni zva yindlu* ya hosi+ hi mapulango ya ndzonvori, zvin’we ni zvitende ni zvichaya-chaya zva tingoti kasi zvi tirisiwa hi vayimbeleli.+ Ku wa nga se tshuka ku woniwa a mapulango yo kota lawo tikweni ga Judha.

12 Hosi Solomoni yenawu i no nyika a muzindza wa le Xebha zvontlhe lezvi a nga zvi lava ni ku zvi kombela, zvo tala a ku hundza* lezvi yena a nga tile nazvo a ta nyika hosi. Andzhako ka lezvo, i no suka a tlhela tikweni gakwe zvin’we ni malandza yakwe.+

13 A kubindza ka ouro leyi yi nga kari yita ka Solomoni hi lembe ku wa hi 666 wa titalenta ta ouro,+ 14 ahandle ka leyi yi nga tisiwa hi vaxavisi, ni vamahi va mabhindzu, ni tontlhe tihosi ta vaArabhiya, ni vagovhernadhori va tiko lava va nga kari va tisa a ouro ni prata ka Solomoni.+

15 Hosi Solomoni i no maha a 200 wa zvitlhangu zva hombe zva ouro yi jutilweko+ (a citlhangu cin’we ni cin’wani ci tekile a 600 wa maxekeli* ya ouro yi jutilweko)+ 16 ni 300 wa zvitlhangu zva zvitsongwani* zva ouro yi jutilweko (a citlhangu cin’we ni cin’wani ci tekile a tipondo* tinharu ta ouro). Andzhako ka lezvo, a hosi yi no zvi veka lomu Ndlwini ya Khwati ga Lebhanoni.+

17 A hosi yi no maha ni citshamu ca hombe ca wuhosi hi matino ya tindlovhu yi ci nameketela ouro ya yinene.+ 18 Ku wa hi ni 6 wa zvikadha kala laha ka citshamu ca wuhosi, ni cikhegetelo ca mikondzo ca ouro ci lunganyetilweko ni citshamu ca wuhosi; lomu matlhelweni ya cona ya mambiri ku wa hi ni mawoko ni tinghala timbiri+ ti nga yimile lomu matlhelweni ya mawoko. 19 Ku wa hi ni 12 wa tinghala+ ti nga yimile lomu ka zvikadha lezvo zva 6, a yin’we ni yin’wani na yi yimile hi le magumo ka zvikadha lezvo zva 6. A ku na wun’wani mufumo wu nga mahile a zvilo zvo kota lezvo. 20 A zvibya zvontlhe zva hosi Solomoni zva kunwa hi zvona zvi wa hi zva ouro, niku a zvibya zvontlhe zva Yindlu ya Khwati ga Lebhanoni zvi wa hi zva ouro ya yinene. Ku wa nga hi na nchumu wo mahiwa hi prata, hakuva masikwini ya Solomoni a prata yi wa nga woniwi kota nchumu.+ 21 A zvitimela* zva hosi zvi waya Tarxixi+ ni malandza ya Hiramu.+ Ndzeni ka malembe manharu, a zvitimela zva Tarxixi zvi wata khati gin’we na zvi rwele ouro, ni prata, ni matino ya tindlovhu,+ ni tifenhe, ni mapavhawu.

22 Hikwalaho, hosi Solomoni i wa hundza a tihosi tontlhe leti tin’wani ta misava hi titshomba ni wutlhari.+ 23 A tihosi ta misava yontlhe ti wa lava ku wonana na* Solomoni kasi tizwa a wutlhari legi a Nungungulu wa lisine a nga gi chelile mbilwini yakwe.+ 24 Tontlhe ti wa mu tela ni zvinyikiwo — a zvibya zva prata, ni zva ouro, ni tinguwo,+ ni matlhari, ni mafura ya bhalsamu, ni mahaxi, ni mamula — niku lezvo zvi wa maheka lembe ni lembe. 25 Solomoni i wa hi ni 4000 wa maranga ya mahaxi, ni tikareta, ni 12 000 wa mahaxi.*+ I no zvi veka madhoropeni ya tikareta, kusuhani ni hosi le Jerusalema.+ 26 Solomoni i no fuma hehla ka tihosi tontlhe kusukela le Congweni* zviya tikweni ga vaFilistiya kala mbhinganweni wa Gibhite.+ 27 A hosi yi no maha lezvaku kuva ni prata Jerusalema yo talisa ku khwatsi maribye, ni mapulango ya sedhare yo talisa ku khwatsi mikuwu ya le Xefela.+ 28 Va wa neha a mahaxi ka Solomoni hi Gibhite+ ni hi ka wontlhe matiko lawa man’wani.

29 A man’wani matimu ya Solomoni,+ kusukela kusanguleni kala magumo, ma tsalilwe cikari ka timhaka ti tsalilweko hi muphrofeti Natani,+ ni ka ciphrofeto ca Ahija,+ a muXiloni, ni ka miwoniso yi tsalilweko hi Idho,+ a muwoni, xungetano hi Jerobhowamu,+ a n’wana wa Nebhate. 30 Solomoni i no fuma Jerusalema hehla ka Izrayeli yentlhe hi 40 wa malembe. 31 Hi kugumesa, Solomoni i no etlela, a humula ni vakokwani vakwe. Hikwalaho, va no mu lahla Dhoropeni ga Dhavhidha, a papayi wakwe,+ niku a n’wana wakwe Rehobhowamu i no maha hosi cikhundleni cakwe.+