Jeremiya

35 A mhaka ya Jehovha yi nota ka Jeremiya, masikwini ya Jehoyakimu,+ a n’wana wa Josiya, a hosi ya Judha, yi taku: 2 “Famba ndlwini ya va ka Rekabe+ u ya wulawula navo u va neha ndlwini ya Jehovha, ka yin’we ya tisala to gela kona, u va nyika vhinyo kasi vanwa.”

3 Hikwalaho, ndzi no teka Jaazaniya, a n’wana wa Jeremiya, a n’wana wa Habhaziniya, ni vamakabye vakwe, ni vontlhe a vana vakwe, ni yindlu yontlhe ya va ka Rekabe 4 ndzi va nghenisa ndlwini ya Jehovha, lomu saleni yo gela kona ya vana va Hanani, a n’wana wa Igdhaliya, a munhu wa Nungungulu wa lisine, leyi yi nga gamekene ni sala yo gela kona ya tihosana yi nga hi hehla ka sala yo gela kona ya Maaseya, a n’wana wa Xaluma, a murindzeli wa nyangwa. 5 Ndzi no veka tikopo ni magombe ma teleko hi vhinyo mahlweni ka vavanuna va yindlu ya ka Rekabe, ndziku kabye: “Nwanani vhinyo.”

6 Kanilezvi va te: “Hi nga tanwa vhinyo, hakuva Jehonadhabha,*+ a n’wana wa Rekabe, a kokwani wa hina, i hi layile ku: ‘Mu nga tshuki munwa vhinyo, n’wina ni vana va n’wina. 7 Mu nga aki yindlu ne ku byala timbewu. Mu nga byali civhina* ne hambu kuva naco. Kanilezvi contlhe cikhati tshamani lomu matendeni, kasi mu hanya masiku yo leha ka tiko legi mu luvelako ka gona.’ 8 Hikwalaho, a hi tsiki ku ingisa a gezu ga Jehonadhabha, a n’wana wa kokwani wa hina Rekabe, ka zvontlhe lezvi a nga hi laya zvaku hi nga tshuki hinwa vhinyo, hina, ni vasati va hina, ni vafana va hina, ni vanhanyana va hina. 9 A hi aki tiyindlu kasi ku tshama kona ne a hi na zvivhina* kutani masimu hambu timbewu. 10 Hi simama ku hanya lomu matendeni hi ingisa zvontlhe lezvi Jehonadhabha,* a kokwani wa hina, a nga hi laya. 11 Kanilezvi a cikhati leci Nebhukadnezare,* a hosi ya Bhabhuloni, a ngata a ta dhumela tiko,+ hi te: ‘A hi sukeni hi nghena lomu Jerusalema kasi hi pona a butho ga vaKaldheya ni ga vaSiriya.’ Makunu zvezvi hi hanya lomu Jerusalema.”

12 A mhaka ya Jehovha yi nota ka Jeremiya, yi taku: 13 “Jehovha wa mabutho, a Nungungulu wa Izrayeli, i ngalo: ‘Famba u ya byela a vanhu va ka Judha ni vahanyi va Jerusalema, uku: “A mu layiwangi hi kuphindaphinda kasi mu ingisa a magezu ya mina ke?”,+ ku wula Jehovha. 14 “Jehonadhabha, a n’wana wa Rekabe, i layile a pswalo wakwe lezvaku wu nganwi vhinyo, niku kala nyamutlha va ha hlayisa a magezu yakwe ya kunganwi vhinyo hakuva va ingisa a cileletelo ca kokwani wabye,+ kanilezvi mina ndzi wulawulile na n’wina hi kuphindaphinda* hambulezvo a mu ndzi ingisi.+ 15 Ndzi no simama ku mu rumelela a malandza ya mina wontlhe, a vaphrofeti, ndzi va rumela hi kuphindaphinda,*+ ndziku: ‘Hundzulukani, a mun’we ni mun’wani tindleleni takwe ta kubiha+ mu maha lezvi zvi lulamileko! Mu nga landzeli a vanungungulu van’wani mu va tirela. Loku mu maha lezvo mu ta simama mu hanya tikweni legi ndzi nyikileko n’wina ni vakokwani va n’wina.’+ Kanilezvi n’wina a mu dembangi a tindleve ta n’wina kutani ku ndzi ingisa. 16 A pswalo wa Jehonadhabha, a n’wana wa Rekabe, wa hlayisa a cileletelo leci a kokwani wabye a va nyikileko,+ kanilezvi a vanhu lava a va ndzi ingisi.”’”

17 “Hikwalaho, Jehovha, a Nungungulu wa mabutho, a Nungungulu wa Izrayeli, i ngalo: ‘Ndzi ta neha hehla ka Judha ni hehla ka vontlhe vahanyi va Jerusalema a khombo gontlhe legi ndzi va tlharihisileko hi gona,+ hakuva ndzi wulawulile navo kanilezvi a va ndzi ingisangi; ndzi no simama ku va vitana kanilezvi a va ndzi hlamulangi.’”+

18 Jeremiya i no byela a yindlu ya va ka Rekabe, aku: “Jehovha wa mabutho, a Nungungulu wa Izrayeli, i ngalo: ‘Kota lezvi mu ingisileko a cileletelo ca kokwani wa n’wina Jehonadhabha, mu simama ku hlayisa zvontlhe lezvi a mu layileko, mu zvi mahisa zvalezvi a mu layisileko zvona, 19 Jehovha wa mabutho, a Nungungulu wa Izrayeli, i ngalo: “Ku nga ta tshuka ku vhumaleka a munhu wa pswalo wa Jehonadhabha,* a n’wana wa Rekabe, wa ku yima mahlweni ka mina a ndzi tirela.”’”