Ezekiyeli

22 A mhaka ya Jehovha yi nota kambe ka mina, yi taku: 2 “Wena, n’wana wa munhu, u longile a ku kanela mahungu ya kulamula hehla ka* dhoropa ga nandzu wa nkhata+ ni ku gi tivisa a zvilo zva gona zvontlhe zvo nyenyeza ke?+ 3 Wula, uku: ‘Jehovha, a Hosi ya Hombe, i ngalo: “Wena dhoropa u halatako nkhata+ cikari ka wena, wena loyi a cikhati ca wena ci chikelako,+ u mahako a zvifananiso zva manyala* kasi ku ti nyenyezisa,+ 4 u na ni nandzu hi kota ya nkhata lowu u halatileko,+ niku a zvifananiso zva wena zva manyala zvi ku nyenyezisile.+ U hatlisisile a kugumesa ka masiku ya wena, ni kugumesa ka malembe ya wena ku chikele. Hi cigelo leco, ndzi ta ku maha ciruko ka mifumo, ni cihlekiso ka matiko wontlhe.+ 5 A matiko ya laha kusuhani ni ya le kule ma ta ku chepeta,+ wena loyi a vito ga wena gi nyenyezileko, u teleko hi gujeguje. 6 Hi nga wona! A hosana yin’we ni yin’wani ya ka Izrayeli yi nga cikari ka wena yi tirisa a ntamu wa yona kasi ku halata nkhata.+ 7 Cikari ka wena, va chepeta a papayi wabye ni mamani wabye.+ Va kalavela a muluveli, va xanisa a n’wanana a nga hiko na papayi* ni noni.”’”*+

8 “‘U chepeta a matshamu ya mina yo basa ni ku nyenyezisa a masabhadho ya mina.+ 9 Cikari ka wena, ku na ni vahlevi va lambeleko ku halata nkhata.+ Cikari ka wena, vaga miphahlo lomu zvitsungeni va tlhela vava ni mahanyela ya tingana cikari ka wena.+ 10 Cikari ka wena, va funungula a wumbyiri ga papayi wabye,*+ ni ku etlela ni wasati a nga hlazvekangiko hi lezvi a nga lomu ka ku wona masiku yakwe.+ 11 Cikari ka wena, a wanuna mun’we i maha zvilo zvo nyenyeza ni sati wa muakelani wakwe,+ a mun’wani i mu susa lisima a katamwane wakwe hi ku mu maha zvilo zva tingana,+ ni mun’wani i xakela a makabye wakwe, a nga nhanyana wa papayi wakwe.+ 12 Cikari ka wena, va vhumela ku xavelelwa kasi va halata nkhata.+ U pembisa hi ku fela majuro+ kutani ku fela ku bhindzula u tlhela u phanga mali ka vaakelani va wena.+ Ina, u ndzi rivele hi kumbhelela’, ku wula Jehovha, a Hosi ya Hombe.

13 “‘Wa zvi wona! Ndzi phakatela mandla hi kuswireka hi kota ya bhindzu ga wena go biha ni kuhalatwa ka nkhata cikari ka wena. 14 Xana wa ha tava ni hlanha,* kona a mandla ya wena ma ha tava ni ntamu ka masiku lawa ndzi to ku vhukela ke?+ Hi mina Jehovha ha ndzoce ndzi nga wula niku ndzi ta zvi maha. 15 Ndzi ta ku xwanya cikari ka mifumo, ndzi ku hangalasa cikari ka matiko.+ Ndzi ta fuvisa a kungahlazveki ka wena.+ 16 U ta wisiwa tingana mahlweni ka matiko niku u ta zvi tiva lezvaku hi mina Jehovha.’”+

17 A mhaka ya Jehovha yi nota kambe ka mina, yi taku: 18 “N’wana wa munhu, a yindlu ya ka Izrayeli yi hundzukile yiva manyelo* mahlweni ka mina. Vona vontlhe i kobre, ni estanyo, ni simbi, ni muthovhu lomu ka ndzhimbo.* Va hundzukile vava manyelo ya prata.+

19 “Hikwalaho, Jehovha, a Hosi ya Hombe, i ngalo: ‘Kota lezvi n’wina n’wentlhe mu mahileko manyelo* ma nga vhuniko nchumu,+ ndza mu hlengeleta lomu ndzeni ka Jerusalema. 20 A ku khwatsi hi lezvi a prata, ni kobre, ni simbi, ni muthovhu, ni estanyo zvi cheliwako lomu ka ndzhimbo, va buvhetela ndzilo hehla ka zvona zvi fela ku nyeka, ndzi ta mu hlengeleta zangeni ya mina ni khulweni ga mina, ndzi mu buvheta mu fela ku nyeka.+ 21 Ndzi ta mu hlengeleta ndzi mu pupuxela ndzilo wa khulo ga mina,+ niku mu ta nyeka ndzeni kakwe.+ 22 A ku khwatsi hi lezvi a prata yi nyekako lomu ka ndzhimbo, n’winawu mu ta nyeka ndzeni kakwe. Mu ta zvi tiva lezvaku mina Jehovha ndzi chululile a khulo ga mina hehla ka n’wina.’”

23 A mhaka ya Jehovha yi nota kambe ka mina, yi taku: 24 “N’wana wa munhu, mu byele, uku: ‘Wena u tiko legi gi to kala ku basiswa ne ku nelwa hi vhula sikwini ga zanga. 25 A vaphrofeti vakwe va xuxile cikungo co biha ndzeni kakwe,+ a ku khwatsi i nghala yi bhongabhongako na yi pfhemula leci yi khomileko.+ Va khadamula vanhu.* Va wutla titshomba ni zvilo zva lisima. Va andzisa a ntsengo wa tinoni* ndzeni kakwe. 26 A vapristi vakwe va hambunyeta a nayo wa mina+ ni ku simama ku nyenyezisa a matshamu ya mina yo basa.+ A va hambanisi a zvilo zvo basa ni zvilo zva nyalidede,+ ne hambu ku gondzisa vanhu a kuhambana ku nga kona cikari ka zvilo zvo hlazveka ni lezvi zvi nga hlazvekangiko.+ Va ala ku hlayisa a masabhadho ya mina niku ndza nyenyeziswa cikari kabye. 27 A tihosana takwe cikari kakwe ti fana ni mahlolwa ma pfhemulako leci ma khomileko; ti halata nkhata ni ku daya vanhu* hi ku fela a bhindzu go biha.+ 28 Kanilezvi a vaphrofeti vakwe va pendile a mitiro yakwe hi mhemba.* Va wona a miwoniso yo hemba va tlhela va vhumba mawunwa,+ vaku: “Lezvi hi lezvi Jehovha, a Hosi ya Hombe, a wulako”, kuveni Jehovha a nga wulangi nchumu. 29 A vanhu va tiko legi va kanganyisa ni ku yiva zvavambe,+ va xanisa a muvhumali ni cisiwana va tlhela va kanganyisa a muluveli ni ku mu alela a nongameto.’

30 “‘Ndzi lavetele munhu cikari kabye wa ku fela ku lungisa a muro wa maribye kutani ku yima mahlweni ka mina hi laha vangeni ga muro na a yimela tiko kasi gi nga loviswi,+ kanilezvi a ndzi kumangi ne mun’we. 31 Hikwalaho, ndzi ta chulula a zanga ya mina hehla kabye ndzi va lovisa hi ndzilo wa khulo ga mina. Ndzi ta neha a mawuyawuya ya ndlela yabye hehla ka hloko yabye’, ku wula Jehovha, a Hosi ya Hombe.”