Ezekiyeli

21 A mhaka ya Jehovha yi nota kambe ka mina, yi taku: 2 “N’wana wa munhu, hundzuluka u cuwuka Jerusalema, u kanelela a matshamu yo basa, ni ku phrofetela a tiko ga Izrayeli. 3 Byela a tiko ga Izrayeli, uku: ‘Jehovha i ngalo: “Ndza ku vhukela, ndzi ta hlomula a cipadha ca mina cikhwameni ca cona+ ndzi lovisa a vakululama ni vakubiha va nga cikari ka wena. 4 Kota lezvi ndzi to lovisa a vakululama ni vakubiha cikari ka wena, ndzi ta hlomula a cipadha ca mina cikhwameni ca cona ndzi vhukela a vanhu* vontlhe, kusukela dzongeni* kala n’walungu.* 5 A vanhu vontlhe va ta zvi tiva lezvaku mina, Jehovha, ndzi hlomulile a cipadha ca mina cikhwameni ca cona. Ci nga ta ha tlhela kambe.”’+

6 “Kanilezvi wena n’wana wa munhu, hefemuteka na u* rurumela hi kuchava, ina, hefemuteka na u karateka mahlweni kabye.+ 7 Loku va ku wutisa, vaku: ‘Hikuyini u hefemutekako?’, va hlamule, uku: ‘Ndzi hefemuteka hi kota ya mahungu yo kari.’ Hakuva hakunene ma tata, niku a timbilu tontlhe ti ta nyeka hi kuchava, ni mandla wontlhe ma ta mbhela ntamu. A moya wontlhe wu ta rereka, ni madzolo wontlhe ma ta choma mati.*+ ‘Hakunene ma tata — ma ta maheka’, ku wula Jehovha, a Hosi ya Hombe.”

8 A mhaka ya Jehovha yi nota kambe ka mina, yi taku: 9 “N’wana wa munhu, phrofeta uku: ‘Jehovha i ngalo: “Wula uku: ‘A cipadha! A cipadha+ ci lotilwe ci tlhela ci kutliwa. 10 Ci lotilwe kasi ci hlasela murengo; ci kutlilwe kasi ci phatima a ku fana ni lihati.’”’”

“Xana hi nga tsaki ke?”

“‘Ina ci* ta ala a nhonga ya n’wana wa mina,+ a ku khwatsi hi lezvi ci alako a tisinya tontlhe ke?

11 “‘Ndzi ci nyikele kasi ci kutliwa ni kuva ci tirisiwa. A cipadha leci ci lotilwe ci tlhela ci kutliwa, kasi ci vekiwa canjeni ga muhlaseli.+

12 “‘N’wana wa munhu, rila uba nyandha,+ hakuva ci tele a ku ta vhukela a vanhu va mina; ci tele a ku ta vhukela a tihosana tontlhe ta ka Izrayeli.+ Ti ta dawa hi cipadha zvin’we ni vanhu va mina. Hikwalaho, bana nyonga ya wena hi kukarateka. 13 Hakuva ku hlolilwe,+ zvi ta kuyini loku a cipadha ci ala a nhonga ke? Yi ta fuva’,+ ku wula Jehovha, a Hosi ya Hombe.

14 “Makunu wena, n’wana wa munhu, phrofeta u phakatela mandla u tlhela u phinda makhati manharu, uku: ‘A cipadha!’ Cipadha ci dayako, a cipadha ci chindzako murengo, leci ci va randzelako.+ 15 A timbilu tabye ti ta nyeka hi kuchava+ niku a votala va tawa tinyangweni ta dhoropa gabye; ndzi ta chindza murengo hi cipadha. Ina, ca phatima a ku khwatsi lihati niku ci kutlilwe kasi ku hihirita! 16 Wena cipadha co kariha, tsema uya cineneni! Hihirita uya cibhabheni! Yana ni kwihi lomu a wukari ga wena gi kongomiswako kona! 17 Minawu ndzi ta phakatela mandla ndzi xurisa a khulo ga mina.+ Hi mina, Jehovha, ndzi nga wula.”

18 A mhaka ya Jehovha yi nota kambe ka mina, yi taku: 19 “Wena, n’wana wa munhu, tsala a tindlela timbiri leti a cipadha ca hosi ya Bhabhuloni ci tota hi tona. Hi wumbiri ga tona ti ta sukela tikweni gin’we niku ku wa yimisiwe cikombiso* laha a ndlela yi to phaka kona yiya madhoropeni mambiri. 20 Komba ndlela ya ku a cipadha ci famba hi yona ci ya dhumela Rabha+ wa vaAmoni, ni yin’wani ya ku ci famba hi yona ci ya dhumela a dhoropa gi bhiyelweko ga Jerusalema,+ le Judha. 21 Hakuva a hosi ya Bhabhuloni yi nyima yi vhumba laha a tindlela ti avanako kona, laha a tindlela timbiri ti phakanako kona. I juja a mipaxa, a wutisa a zvifananiso zvakwe,* a hlola civindzi. 22 A hlamulo wa ku vhumba canjeni gakwe ga cinene wu xungeta a Jerusalema. I fanele ku longisela michini ya ku bhoxa hi yona, a laya lezvaku ku hihiritwa, aba huwa ya yimpi, a yimisa michini ya ku bhoxa hi yona lomu tinyangweni, a yimisa rampa ya ku dhumela hi yona a tlhela a aka muro wa kurandzela.+ 23 Kanilezvi zvi ta wonekisa ku khwatsi a kuvhumba loko mawunwa matihlweni ya lava* va nga hlambanyile kabye.+ Hambulezvo, i alakanya a nandzu wabye niku i ta va khoma.+

24 “Hikwalaho, Jehovha, a Hosi ya Hombe, i ngalo: ‘Mu mahile lezvaku a nandzu wa n’wina wu alakanyiwa hi ku kombekisa a zvihambunyeto zva n’wina, ni ku wonekelisa a zviwonho zva n’wina mitirweni ya n’wina yontlhe. Lezvi makunu mu alakanyilweko, mu ta khomiwa hi kani.’*

25 “Kanilezvi a siku ga wena gi chikele, wena hosana yo biha ya Izrayeli, yi bayiselweko ku dawa.+ Ci chikele a cikhati ca kutsayiswa ka wena ko gumesa. 26 Jehovha, a Hosi ya Hombe, i ngalo: ‘Tlhatlha turbhanti,* u susa cidlodlo.*+ A zvilo zvi nga ta ha tshuka zvi fanile ni kale.+ Tlakusa loyi a tsongahatilweko,+ u tsongahata loyi a tlakusilweko.+ 27 A rumbi! A rumbi! Ndzi ta ci maha rumbi! Ci nga tava ca munhu kala ku chikela loyi a nga ni fanelo hi nayo;+ hi yena ndzi to mu nyika.’+

28 “Makunu wena, n’wana wa munhu, phrofeta, uku: ‘Lezvi hi lezvi Jehovha, a Hosi ya Hombe, a wulako xungetano hi vaAmoni ni zviruko zvabye.’ Wula uku: ‘A cipadha! A cipadha ci hlomulilwe kasi ku hihirita; ci kutlilwe kasi ku khadamula niku ca phatima a ku fana ni lihati. 29 Hambu lezvi ku wonilweko a miwoniso ya mawunwa ni ku vhumba ko hemba xungetano hi wena, u ta tsulekelwa hehla ka lava va delweko,* a vavanuna vo biha lava va chikelelweko hi siku, a cikhati ca kutsayiswa kabye ko gumesa. 30 Tlhelisa cipadha cikhwameni ca cona. Ndzi ta ku lamula wutshan’wini legi u vangelweko ka gona, a tikweni legi u tumbulukeleko ka gona. 31 Ndzi ta chulula a zanga ya mina hehla ka wena. Ndzi ta ku pupuxela a ndzilo wa khulo ga mina, ndzi ku nyikela mandleni ya vavanuna va xapi, a titlhari ta kulovisa.+ 32 U tava tihunyi ndzilweni;+ a nkhata wa wena wu ta halatiwa tikweni, u nga ta ha alakanyiwa kambe, hakuva mina Jehovha ndzi zvi wulile.’”