Papilo go sangula ka Va Le Korinte

10 Makunu ndzi lava ku mu zvi tiva, vamakabye, lezvaku vontlhe a vakokwani va hina va wa hi lahasi ka refu,+ vontlhe va tsemakanyile hi lomu bimbini,+ 2 vontlhe va bhabhatiselwe ka Mosi hi refu ni bimbi, 3 vontlhe va gile zvakuga zvalezvi zva zvin’we zva moya+ 4 niku vontlhe va nwile a mati yalawa ya man’we ya moya.+ Hakuva va wanwa ka ribye ga moya legi gi nga va pangalata; a ribye lego ku wa hi Kristu.+ 5 Hambulezvo, a kutala kabye a va mu tsakisangi Nungungulu, hikwalaho va no dawa lomu ciwuleni.+

6 Makunu a zvilo lezvi citlharihiso ka hina, kasi hi nga naveli a zvilo zvo biha, a ku khwatsi hi vona va nga zvi navela.+ 7 Ne mu ngavi vakhozeli va zvifananiso, a ku khwatsi hi lezvi a vokari cikari kabye va nga maha; kota lezvi ku tsalilweko ku ngalo: “A vanhu va no tshama hasi vaga ni kunwa, va gumesa va suka va hlakana.”+ 8 Ne hi nga maheni wubhayi* a ku khwatsi hi vokari vabye va nga maha wubhayi,* ku gumesa kufa a 23 000 wa vona hi siku gin’we.+ 9 Ne hi nga ringi Jehovha,*+ a ku khwatsi hi lezvi a vokari vabye va nga mu ringa va gumesa va dawa hi tinyoka.+ 10 Ne mu nga nguranguri, a ku khwatsi hi vokari vabye va nga ngurangura+ va gumesa va dawa hi mulovisi.+ 11 A zvilo lezvi zvi no va humelela kasi zviva cikombiso, zvi tlhela zvi tsaliwa kasi ku tlharihisa hina+ lava hi chikelelweko hi kugumesa ka tiko.

12 Hikwalaho, loyi a alakanyako lezvaku i yimile i wa ti wonele kasi a ngawi.+ 13 A mu se welwa hi ndzhingo ahandle ka leyi yi talako ku wela vanhu.+ Kanilezvi Nungungulu i tsumbekile, niku a nga ta mu tsika mu ringiwa a ku hundza a ntamu wa n’wina;+ kanilezvi loku a ndzhingo wuta, i ta mu vhululela ni ndlela ya kupona kasi mu zvi kota ku wu timisela.+

14 Hikwalaho, varandzekako, tsutsumani ku khozela zvifananiso.+ 15 Ndzi wulawula na n’wina kota vanhu va pimisako; lamulani ha n’wece lezvi ndzi wulako. 16 A kopo ya cikatekiso leyi hi yi katekisako, a hi ku hlengela nkhateni wa Kristu ke?+ A pawa leyi hi khemako, a hi ku hlengela mirini wa Kristu ke?+ 17 A pawa yin’we, hikwalaho hambu lezvi hina hi nga tala, hi miri wun’we,+ hakuva hontlheni higa a pawa yaleyi ya yin’we.

18 Cuwukani vaIzrayeli hi ka nyama: Lava va gako a miphahlo a va hlengeli ni alati ke?+ 19 Makunu, ndzi lava ku wula yini? A ku leci ci phahlelweko ka cifananiso cova nchumu, kutani ku a cifananiso cova nchumu ke? 20 Ahihi; kanilezvi ndzi wula lezvaku lezvi a vamatiko va zvi phahlelako va phahlela madhimoni, na ku nga hi Nungungulu;+ makunu mina a ndzi zvi lavi lezvaku n’wina mu hlengela ni madhimoni.+ 21 N’wina a mu zvi koti kunwa a kopo ya Jehovha* ni kopo ya madhimoni; a mu zvi koti kuga “mezeni ya Jehovha”*+ ni mezeni ya madhimoni. 22 Kona ‘a ho mu vhuxela ciluse Jehovha’* ke?+ Hi na ni ntamu wo hundza yena?

23 A zvilo zvontlhe zva vhumelelwa hi nayo,* kanilezvi a hi zvontlhe zvi vhunako. A zvilo zvontlhe zva vhumeleleka, kanilezvi a hi zvontlhe zvi akako.+ 24 A mun’we ni mun’wani i wa simame ku lava lezvi zvi to vhuna mun’wani munhu, na ku nga hi lezvi zvi to vhuna yena n’winyi.+

25 Ganani nyama yontlhe yi xavisiwako merkadho, mu nga wutisi nchumu hi kota ya livhalo la n’wina, 26 hakuva “a misava ni zvontlhe zvi nga ka yona zvi lumba Jehovha”.*+ 27 Loku a munhu a nga kholwiko a mu ramba lezvaku mu yaga zvakuga, na mu zvi lava kuya, ganani ni cihi a to mu nyika, mu nga wutisi nchumu hi kota ya livhalo la n’wina. 28 Kanilezvi loku a wokari a mu byela, aku: “A zvakuga lezvi zvi phahlelwe”, mu ngagi hi kota ya loyi a mu byelileko ni hi kota ya livhalo.+ 29 A ndzi wuli a livhalo la n’wina, kanilezvi ndzi wula leli la mun’wani munhu. Hakuva a kutlhatlheka ka mina ku wa ta lamulelwa yini hi livhalo la mun’wani munhu ke?+ 30 Loku ndzi bonga a cikhati leci ndzi gako, ndzi solelwa yini hi kota ya lezvi ndzi bongako ha zvona ke?+

31 Hikwalaho, kani moga, kani monwa, kani hi cihi leci mu ci mahako, mahani zvontlhe zviva wudzundzo ka Nungungulu.+ 32 Tsikani kuva cikhunguvanyiso ka vaJudha ni vaGreki ni ka bandla ga Nungungulu,+ 33 a ku fana ni lezvi minawu ndzi ti karatelako ku tsakisa vanhu vontlhe zvilweni zvontlhe, na ndzi nga ti laveli lezvi zvi vhunako mina basi,+ kanilezvi lezvi zvi vhunako votala, kasi vonawu va poniswa.+