Zakariya
13 “Hi siku lego, ku ta keliwa hlowo ya yindlu ya Dhavhidha ni ya vahanyi va Jerusalema kasi va hlazviwa ciwonho ni kungahlazveki.+
2 “Hi siku lego”, ku wula Jehovha wa mabutho, “ndzi ta fuvisa a mavito ya zvifananiso lomu tikweni;+ zvi nga ta ha alakanyiwa kambe. Ndzi ta hlongola vaphrofeti+ ni moya wu nga hlazvekangiko lomu tikweni. 3 Loku a munhu a phrofeta kambe, a papayi wakwe ni mamani wakwe, lava va mu pswalileko, va ta mu byela lezvi: ‘U nga ta hanya, hakuva u hembile hi vito ga Jehovha.’ A papayi wakwe ni mamani wakwe, lava va nga mu pswala, va ta mu tlhava hi kota ya kuphrofeta kakwe.+
4 “Hi siku lego, a muphrofeti mun’we ni mun’wani i tawa tingana hi muwoniso wakwe laha a phrofetako; a nga ta ha boha a nguwo yakwe ya woya+ kasi ku kanganyisa. 5 I taku: ‘Mina a ndzi muphrofeti, ndzi murimi hakuva ndzi xavilwe hi munhu kota khumbi na ndza ha hi n’wanana.’ 6 Loku a wokari a mu wutisa ku: ‘Zvilondza zva yini lezvi laha cikari ka makatla ya wena?’,* i taku: ‘Ndzi bayisilwe lomu ndlwini ya vanghana va mina.’”*
7 “Wena cipadha, khindlimuka u vhukela a murisi wa mina,+
U vhukela a munghana wa mina”, ku wula Jehovha wa mabutho.
“Bana murisi,+ ni ntlhambi* wu wa hangalake;+
Ndzi ta nawuluta a canja ga mina ndzi vhukela lava va nga vhuniko nchumu.”
8 “Lomu tikweni gontlhe”, ku wula Jehovha,
“A zvipandze zvimbiri zvi ta tsemiwa zvi lova;*
Ku sala cipandze ca wunharu.
9 Ndzi ta hundzisa a cipandze ca wunharu hi laha ndzilweni;
Ndzi ta va basisa a ku fana ni lezvi yi basisiwako zvona a prata,
Ndzi va hlola a ku fana ni lezvi yi hlolisiwako zvona a ouro.+
Va ta khongela vitweni ga mina,
Mina ndzi va hlamula.
Ndzi taku: ‘Vona vanhu va mina’,+
Na vona va taku: ‘Jehovha i Nungungulu wa hina.’”