Kronekele wa wumbiri

34 Josiya+ i wa hi ni 8 wa malembe a cikhati leci a nga maha hosi, niku i no fuma 31 wa malembe Jerusalema.+ 2 I no maha zvakululama mahlweni ka Jehovha a tlhela a famba tindleleni ta Dhavhidha, a kokwani wakwe; a nga hambukangi aya cineneni kutani cibhabheni.

3 Hi lembe ga wu 8 ga kufuma kakwe, na a ha hi jaha, Josiya i no sangula ku hlota a Nungungulu wa kokwani wakwe Dhavhidha;+ hi lembe ga wu 12, i no sangula ku basisa Judha ni Jerusalema,+ a susa a matshamu yo tlakuka,+ ni tisinya to basa,* ni zvifananiso zvi kehlilweko,+ ni zvifananiso zva simbi.* 4 Ahandle ka lezvo, va no khungumulela a maalati ya Bhaali mahlweni kakwe, niku i no fayetela a maalati yo hisela ka wona libani lawa ma nga hi hehla ka wona. I no tlhela a pandzelela a tisinya to basa, ni zvifananiso zvo kehliwa, ni zvifananiso zva simbi.* I no zvi fayetela zvi maha mapa, a ma xwanyela lomu zvilahleni zva lava va nga kari va zvi mahela miphahlo.+ 5 I no hisa a marambu ya vapristi hehla ka maalati yabye.+ Hi ndlela leyo, i no basisa Judha ni Jerusalema.

6 Dhoropeni ga va ka Manase, ni ga va ka Efrayime,+ ni ga va ka Simeyoni, kala dhoropeni ga va ka Naftali, ka marumbi lawa ma nga hi matlhelweni ya wona, 7 i no khungumulela maalati, a fayetela tisinya to basa ni zvifananiso zvi kehlilweko+ zvi maha mapa; i no fayetela a maalati wontlhe yo hisela ka wona libani lomu tikweni gontlhe ga Izrayeli,+ a gumesa a tlhela Jerusalema.

8 Hi lembe ga wu 18 ga kufuma kakwe, andzhako ka ku basisa tiko ni tempeli,* i no ruma Xafani,+ a n’wana wa Azaliya, na Maaseya, a hosana ya dhoropa, na Jowa, a n’wana wa Jowahaza, a matsalani, kasi va ya lungisa a yindlu ya Jehovha, a Nungungulu wakwe.+ 9 Va noya ka Hilkiya, a mupristi wa hombe, va ya mu nyika mali leyi yi nga nehilwe lomu ndlwini ya Nungungulu, leyi a vaLevhi lava va nga tira kota vagadhi va tinyangwa va yi hlengisileko ka va ka Manase, ni ka va ka Efrayime, ni ka vontlhe a vaIzrayeli+ lava van’wani, zvin’we ni ka va ka Judha, ni ka va ka Bhenjamini, ni ka vahanyi va Jerusalema. 10 Va no yi nyikela ka lava va nga rangela a ntiro ndlwini ya Jehovha. Lava va nga tira lomu ndlwini ya Jehovha va no aketa ni ku lungisa hi yona a yindlu. 11 Va no yi nyikela ka vavatli ni ka vaaki kasi va xava a maribye ma tsemilweko ni mapulango ya ku hiketela hi wona ni ya ku maha hi wona minaneko kasi ku aka tiyindlu leti a tihosi ta ka Judha ti nga ti tsikile ti hohloka.+

12 A vavanuna lava va no tira hi kutsumbeka.+ Jahate na Obhadhiya, a va ka Merari,+ na Zakariya na Mexulamu, a va ka Kohate,+ va nga hi vaLevhi, va wa yimisilwe kota vawoneleli vabye. Ni vaLevhi vontlhe, lava va nga hi ni wutlhari go yimbelela,+ 13 va wa rangela vatiri* niku va wa wonelela vontlhe lava va nga maha mitiro yo hambanahambana; a vaLevhi vo kari va wa hi vamatsalani, ni tihosana, ni vagadhi va tinyangwa.+

14 Laha va nga kari va teka a mali leyi yi nga nehilwe lomu ndlwini ya Jehovha,+ mupristi Hilkiya i no thumba a bhuku ga Nayo wa Jehovha+ lowu a nga wu nyikile hi canja ga Mosi.+ 15 Hikwalaho, Hilkiya i no byela Xafani, a matsalani, aku: “Ndzi thumbile a bhuku ga Nayo lomu ndlwini ya Jehovha.” Zvalezvo Hilkiya i no teka bhuku lego a nyika Xafani. 16 Makunu Xafani i no famba ni bhuku ka hosi, a yaku ka yona: “A malandza ya wena ma maha zvontlhe ma nyikilweko ku maha. 17 Ma chululile a mali leyi yi nga hi lomu ndlwini ya Jehovha ma nyika a vavanuna lava va yimisilweko ni lava va tirako.” 18 Xafani, a matsalani, i no engeta a byela hosi, aku: “Ndzi nyikilwe bhuku hi mupristi Hilkiya.”+ Xafani i no sangula ku gi lera mahlweni ka hosi.+

19 Zvalezvi a hosi yi ngazwa a timhaka ta Nayo, yi no handzula a tinguwo ta yona.+ 20 Andzhako ka lezvo, a hosi yi no leletela Hilkiya, na Ahikamu,+ a n’wana wa Xafani, na Abdhoni, a n’wana wa Mika, na Xafani, a matsalani, na Asaya, a nandza ga hosi, yiku: 21 “Fambani mu ya ndzi wutisela ka Jehovha, mu tlhela mu wutisela ni vanhu lava va seleko Izrayeli ni Judha hi timhaka ta bhuku legi gi thumbilweko, hakuva a zanga ya Jehovha leyi yi to chululiwa hehla ka hina ya hombe hi kota ya lezvi a vakokwani va hina va nga kala ku ingisa a gezu ga Jehovha ni ku hlayisa lezvi zvi tsalilweko lomu ka bhuku legi.”+

22 Hikwalaho, Hilkiya zvin’we ni lava va nga rumilwe hi hosi, va noya ka Huldha, a muphrofeti wa cisati.+ I wa hi sati wa Xaluma, a n’wana wa Tikvha, a n’wana wa Harhasa, a muhlayisi wa yindlu ya tinguwo, a nga hanya Dhoropeni Giswa* ga Jerusalema; va no wulawula naye kwaseyo.+ 23 I te ngalo kabye: “Jehovha, a Nungungulu wa Izrayeli, i ngalo: ‘Byelani a wanuna loyi a nga mu ruma a kuta ka mina, muku: 24 “Jehovha i ngalo: ‘Ndzi ta neha a khombo wutshan’wini legi ni ka vahanyi va gona,+ zvi nga zviruko zvontlhe lezvi zvi nga tsaliwa lomu ka bhuku+ legi va gi lerileko mahlweni ka hosi ya Judha. 25 Kota lezvi va ndzi tsikileko+ va ya tuvikisa musi wa miphahlo ka van’wani vanungungulu hi ku fela ku ndzi zangarisa+ hi mitiro yontlhe ya mandla yabye, a zanga ya mina yi ta chululiwa wutshan’wini legi niku yi nga ta timelwa.’”+ 26 Kanilezvi ka hosi ya ka Judha, leyi yi nga mu ruma a ku ta wutisa ka Jehovha, mu ta yi byela lezvi: “Jehovha, a Nungungulu wa Izrayeli, i ngalo: ‘Xungetano hi magezu lawa u nga mazwa,+ 27 kota lezvi u olovisileko a mbilu ya wena u tlhela u ti koramisa mahlweni ka Nungungulu laha u ngazwa a magezu yakwe xungetano hi wutshamu legi ni vahanyi va gona, ni lezvi u ti koramisileko mahlweni ka mina u handzula tinguwo ta wena u tlhela u rila mahlweni ka mina, minawu ndzi ku zwile,+ ku wula Jehovha. 28 Hi kota ya lezvo, ndzi ta ku hlengeleta ka vakokwani va wena,* u lahliwa cilahleni ca wena hi kurula; a mahlo ya wena ma nga ta wona a khombo gontlhe legi ndzi to gi neha ka wutshamu legi ni ka vahanyi va gona.’”’”+

Andzhako ka lezvo, va no tlhelisa hlamulo ka hosi. 29 Hikwalaho, a hosi yi no rumela gezu yi vitanisa a madhota wontlhe ya Judha ni ya Jerusalema.+ 30 Hi kulandzela, a hosi yi no kandziha yiya ndlwini ya Jehovha ni vontlhe a vavanuna va ka Judha, ni vahanyi va Jerusalema, ni vapristi, ni vaLevhi — vontlhe vanhu, a vahombe ni vatsongwani. Yi no va lerela a magezu wontlhe ya bhuku ga civhumelwano legi gi nga thumbilwe lomu ndlwini ya Jehovha.+ 31 A hosi yi no yima wutshan’wini ga yona yi maha* civhumelwano+ mahlweni ka Jehovha ca lezvaku yi ta landzela Jehovha, yi hlayisa a zvileletelo zvakwe, ni zvikhumbuxeto zvakwe, ni milayo yakwe hi mbilu ya yona yontlhe ni muhefemulo*+ wa yona wontlhe, hi ku hlayisa timhaka ta civhumelwano leti ti tsalilweko lomu bhukwini legi.+ 32 A ku tsika lezvo, i no maha lezvaku vontlhe lava va nga hi Jerusalema ni lomu tikweni ga Bhenjamini va vhumelelana ni civhumelwano leco. A vahanyi va Jerusalema va no maha lezvi zvi nga wuliwa ka civhumelwano ca Nungungulu, a Nungungulu wa vakokwani vabye.+ 33 Andzhako ka lezvo, Josiya i no susa zvilo* zvontlhe zvo nyenyeza tikweni gontlhe legi gi nga lumba vaIzrayeli+ a gumesa a kuca vontlhe lomu Izrayeli lezvaku va tirela Jehovha, a Nungungulu wabye. Wutomini gakwe gontlhe,* a va tsikangi a ku landzela Jehovha, a Nungungulu wa vakokwani vabye.