Papilo go sangula ka Va Le Korinte

16 Makunu xungetano hi hlengo lowu wu mahelwako vobasa,+ landzelani a zvileletelo lezvi ndzi nyikileko a mabandla ya le Galatiya. 2 Hi siku go sangula ga vhiki ni vhiki, a mun’we ni mun’wani wa n’wina i wa khwekete zvokari, hi kuya hi lezvi a nga nazvo, kasi ku nga mahiwi mihlengo a cikhati leci ndzi to chikela. 3 Kanilezvi a cikhati leci ndzi to chikela seyo, ndzi ta ruma a vavanuna lava mu to va pasisa mapapilweni ya n’wina+ lezvaku va heleketa a cinyikiwo ca n’wina ca cinene Jerusalema. 4 Hambulezvo, loku zvi lava ku minawu ndzi famba, va ta famba na mina.

5 Kanilezvi ndzi tata ka n’wina loku ndzi hundzile hi Makedhoniya, hakuva ndzi ta hundza hi Makedhoniya,+ 6 niku kuzvilava ndzi ta tshama na n’wina a masiku yo kari, hambu ku kala ku hundza a nguva ya cirami kasi mu ndzi heleketanyana lomu ndzi yako kona. 7 Hakuva a ndzi xuvi ku mu wona zva cipswhati, kota lezvi ndzi tsumbako ku ndzi ta tshama na n’wina a cikhati co kari,+ loku Jehovha* a zvi randza. 8 Kanilezvi ndza ha ta tshama Efesusi+ kala ku chikela a Mubuzo wa Pentekosta, 9 hakuva ndzi vhululekelwe hi nyangwa ya hombe ya ntiro,+ kanilezvi ku na ni vakaneti vo tala.

10 Loku Timote+ a chikela, mahani lezvaku a nga chavi nchumu loku a hi cikari ka n’wina, hakuva i tira a ntiro wa Jehovha*+ a ku fana na mina. 11 Hikwalaho, ku ngavi ni munhu a mu kanyisako. Mu heleketeni hi kurula lipfhumbeni lakwe kasi ata ka mina, hakuva mina ni vamakabye hi mu rindzele.

12 Makunu xungetano hi Apolosi,+ a makabye wa hina, ndzi mu khongotele nguvhu lezvaku ata ka n’wina ni vamakabye. I wa nga zvi lavi kuta ka n’wina zvezvi, kanilezvi i tata loku ava ni cikhati.

13 Khindlimukani,+ mu tiya mu ku nde kukholweni,+ mu maha cinuna,*+ muva ni ntamu.+ 14 Zvontlhe lezvi mu mahako zvi maheni hi lirandzo.+

15 Makunu ndza mu khongotela, vamakabye: Ma zvi tiva lezvaku a va ngango wa Stefanasi hi vona mihandzu yo sangula le Akaya, ni lezvaku va ti nyikele kasi va tirela vobasa. 16 Ngha n’winawu mu simama ku ti koramisa ka vanhu vo khwatsi hi lavo ni ka vontlhe lava va hlengelako ni ku tira hi kutikarata.+ 17 Kanilezvi ndza tsaka hi kuvakona ka Stefanasi,+ na Fortunatusi, na Akayikusi, hakuva va mu vhaletile lezvi mu kalako mu nga hi kona laha. 18 Hakuva va tangalisile a moya wa mina ni wa n’winawu. Hikwalaho, va nyikeni lisima a vanhu vo kota lavo.

19 A mabandla ya le Azia ma mu rungula. Akwila na Priska zvin’we ni bandla legi gi nga laha mutini wabye+ va mu rungula nguvhu Hosini. 20 A vamakabye vontlhe va mu rungula. Losanani hi kupswopswana ko basa.

21 Hi lawa a marungula ya mina, Pawule, hi canja ga mina wutsumbu.

22 Loku a hi kona munhu a kalako a nga randzi Hosi, i wa rukatelwe. Hosi ya hina, tana! 23 A tipswalo ta Hosi Jesu ti wave zvin’we na n’wina. 24 Ngha a lirandzo la mina liva na n’wina n’wentlhe mu nga ka Kristu Jesu.