Amosi
3 “Zwanani a mhaka leyi Jehovha a yi wulileko xungetano hi n’wina, n’wina vanhu va ka Izrayeli, xungetano hi ngango wontlhe lowu ndzi wu humesileko tikweni ga Gibhite:
2 ‘Cikari ka mingango yontlhe ya laha misaveni, hi n’wina n’wece ndzi mu tivi-leko.+
Hikwalaho, mu ta ti hlamulela ka mina hi kota ya zvigoho zva n’wina zvontlhe.+
3 Xana a vanhu vambiri va nga longoloka ahandle ka loku va zwanene ku tlhangana ke?*
4 A nghala yi nga bhonga lomu khwatini na yi nga hi na nchumu wa ku khoma ke?
A cinghalana* ci nga bhonga wutshan’wini ga cona na ci nga khomangi nchumu?
5 A cinyanyani ci nga phasiwa lahasi ko kala ku nga dembiwangi ntlhamu ke?
Kona a ntlhamu wa wachuka na wu nga phasangi nchumu ke?
6 Loku ku biwa linanga* lomu dhoropeni, a vanhu a va rurumeli ke?
Loku ku humelela khombo lomu dhoropeni, a hi Jehovha a nga maha cokari ke?
7 Hakuva Jehovha, a Hosi ya Hombe, a nga ta maha nchumu
Na a nga rangangi hi ku tivisa a cihundla cakwe ka malandza yakwe, a vaphrofeti.+
8 A nghala yi bhongile!+ Himani a to kala ku chava?
Jehovha, a Hosi ya Hombe, i wulawulile! Himani a to kala ku phrofeta?’+
9 ‘Huwelelani a timhaka leti ka tikhokhola* ti tiyisilweko khwatsi ta le Axdhodhe
Ni ka tikhokhola ti tiyisilweko khwatsi ta le tikweni ga Gibhite,
Muku: “Tlhanganani zvitsungeni zva Samariya;+
Wonani a gujeguje cikari kakwe
Ni wukanganyisi cikari kakwe.+
10 Hakuva a va zvi tivi ku maha zvo lulama”, ku wula Jehovha,
“Lava va hlengeletelako tihanyi ni kulovisa tikhokholeni* tabye ti tiyisilweko khwatsi.”’
11 Hikwalaho, Jehovha, a Hosi ya Hombe, i ngalo:
‘A nala i ta randzela tiko,+
A wutla a ntamu wa wena;
Niku a tikhokhola* ta wena ti tiyisilweko khwatsi ti ta phangiwa.’+
12 Jehovha i ngalo:
‘A ku fana ni lezvi a murisi a wutlako a minenge yimbiri kutani cipandze ca ndleve ya yivhu non’wini wa nghala,
Hi zvalezvi a vanhu va ka Izrayeli va to wutliswa zvona,
Lava zvezvi va tshamako le Samariya lomu ka mibhedhi yo chandza ni ka masofa ya manene.’*+
13 ‘Zwanani mu tlharihisa* a yindlu ya ka Jakobe’, ku wula Jehovha, a Hosi ya Hombe, a Nungungulu wa mabutho.
14 ‘Hakuva a siku legi Izrayeli a to ti hlamulela ka mina hi kota ya zvimaho zvakwe zvontlhe zva wuhluwuki,+
Ndzi ta londza kambe lezvaku va ti hlamulela hi kota ya maalati ya Bheteli;+
A timhondzo ta alati ti ta tsemiwa tiwa laha misaveni.+
15 Ndzi ta hahlula a yindlu ya nguva ya cirami ni ya nguva ya cimumu.’