Kronekele wa wumbiri

20 Hi kufamba ka cikhati, a vaMowabhi+ ni vaAmoni+ zvin’we ni vaAmonime* vo kari va nota kasi ku talwa yimpi na Jehoxafati. 2 Hikwalaho, va no byela Jehoxafati, vaku: “Ku tile citshungu ca hombe kasi ci ta ku vhukela; cita hi le tlhatuko wa bimbi,* le Edhomi,+ niku zvezvi va le Hazazon-Tamari, ku nga le En-Gedhi.”+ 3 Hi kota ya lezvo, Jehoxafati i no chava, a se ti yimisela ku hlota Jehovha.+ Hikwalaho, i no laya a vaJudha vontlhe lezvaku va pfhunga.* 4 Andzhako ka lezvo, a vanhu va ka Judha va no hlengeletana kasi va ta wutisa Jehovha;+ va nota hi ka madhoropa wontlhe ya ka Judha kasi va ta wutisa Jehovha.

5 Jehoxafati i no yima mahlweni ka bandla ga Judha ni ga Jerusalema laha ndlwini ya Jehovha mahlweni ka tsendzele* wa wuswa, 6 aku:

“O Jehovha, Nungungulu wa vakokwani va hina, a hi wena Nungungulu matilweni?+ Kona a hi wena u fumako hehla ka mifumo yontlhe ya matiko ke?+ Canjeni ga wena, ku na ni ntamu ni wunhenha, niku i hava a nga ku vhukelako.+ 7 O Nungungulu wa hina, kasi a hi wena u nga hlongola a vaaki va tiko legi mahlweni ka vanhu va wena, a vaIzrayeli, u gumesa u gi nyikela kota tshomba ya pindzukelwa ka pswalo* wa munghana wa wena Abrahama ke?+ 8 Va no tshama ka gona, va akela a vito ga wena a wutshamu go basa,+ vaku: 9 ‘Loku hi telwa hi khombo, ku ngava hi cipadha, hi kulamulwa, hi ntungu kutani hi ndlala, a hi yimeni mahlweni ka yindlu leyi ni mahlweni ka wena (hakuva a vito ga wena gi lomu ka yindlu leyi)+ hi rila ka wena hi kombela ku vhuniwa hi kota ya khombo ga hina, niku wena hizwe, u hi ponisa.’+ 10 Makunu ku tile a vavanuna va vaAmoni, ni va vaMowabhi, ni va le tikweni ga zvitsunga ga Seyire,+ lava u nga kala ku vhumelela Izrayeli lezvaku a va dhumela a cikhati leci a nga huma hi tikweni ga Gibhite. Izrayeli i no va potsa a nga va lovisi.+ 11 Zvezvi va hi tlhelisela hi kuta va ta hi hlongola lomu tikweni ga wena legi u hi nyikileko kota tshomba.+ 12 O Nungungulu wa hina, u nga ta va lamula ke?+ Hakuva a hi na ntamu mahlweni ka citshungu leci ca hombe leci ci tako ci ta hi vhukela ne a hi zvi tivi a ku hi ta maha yini,+ kanilezvi a mahlo ya hina ma cuwukela wena.”+

13 Ka cikhati caleco, a vaJudha vontlhe va wa yimile mahlweni ka Jehovha zvin’we ni vanana vabye, ni vasati vabye, ni vana vabye.

14 Hi kulandzela, a moya wa Jehovha wu nota ka Jahaziyeli, a n’wana wa Zakariya, a n’wana wa Bhenaya, a n’wana wa Jeyeli, a n’wana wa Mataniya, a muLevhi wa vana va Asafa, na a hi cikari ka bandla. 15 I te ngalo: “Dembani ndleve n’wina n’wentlhe va le Judha, ni vaaki va Jerusalema, na wena hosi Jehoxafati! Jehovha i ngalo ka n’wina: ‘Mu nga chavi hambu ku tsemeka hlanha hi kota ya citshungu leci ca hombe, hakuva a yimpi leyi a hi ya n’wina kanilezvi ya Nungungulu.+ 16 A mandziko relelani mu ya va vhuka. Va ta ngha na va kandziha hi ndlela ya Zizi, na n’wina mu ta va kuma le magumo ka nkova lowu wu cuwukeneko ni Ciwula ca Jeruweli. 17 Zvi nga ta lava a ku mulwa a yimpi leyi. Ti longiseleni, mu yima+ mu wona a kuhanyisa ka Jehovha.*+ Wena Judha na wena Jerusalema, mu nga chavi hambu ku tsemeka hlanha.+ A mandziko humani mu ya va vhuka, Jehovha i tava na n’wina.’”+

18 Zvalezvo, Jehoxafati i no khizama awa lahasi hi nghohe, niku vontlhe a vaJudha ni vaaki va Jerusalema va no khizama mahlweni ka Jehovha kasi va khozela Jehovha. 19 Hi kulandzela, a vaLevhi lava va nga hi va pswalo wa va ka Kohate+ ni wa va ka Kora va no suka va yima va dhumisa Jehovha, a Nungungulu wa Izrayeli, hi gezu ga hombe nguvhu.+

20 Ka siku gi nga landzela, va no vindzuka vaya ciwuleni ca Tekowa.+ Laha va nga kari va suka, Jehoxafati i no suka a yima, aku: “N’wina va ka Judha ni vaaki va Jerusalema, ndzi ingiseleni! Kholwani ka Jehovha, a Nungungulu wa n’wina, kasi mu tiya.* Kholwani ka vaphrofeti vakwe,+ mu ta humelela.”

21 Andzhako ka ku Jehoxafati bhulile ni vanhu va zwana, i no yimisa a vavanuna kasi va yimbelela+ ka Jehovha ni ku mu dhumisa na va bohile tinguwo to basa laha va nga kari va famba na va landzelwa hi vavanuna va hlomileko, vaku: “Bongani Jehovha, hakuva a lirandzo lakwe li nga mbheliko li simama kala kupindzuka.”+

22 A cikhati leci va nga sangula ku yimbelela hi kutsaka va dhumisa, Jehovha i no maha lezvaku a vaAmoni, ni vaMowabhi, ni lava va le tikweni ga zvitsunga ga Seyire, lava va nga kari va vhukela vaJudha, valwa hi civona va dayana.+ 23 A vaAmoni ni vaMowabhi va no jikela a vahanyi va le tikweni ga zvitsunga ga Seyire+ kasi va va hihirita ni ku va lovisa va ku bhi; laha va nga mbheta a vahanyi va Seyire, va no hlaselana ha voce.+

24 Kanilezvi laha a vaJudha va nga chikela likhokholeni la murindzeli* la le ciwuleni,+ va cuwuka a citshungu, va no wona a zvirumbi na zvi mbambamele lahasi;+ ku wa nga ponangi ne munhu mun’we. 25 Hikwalaho, Jehoxafati ni vanhu vakwe va noya va ya teka muphango kabye. Cikari kabye, va noya va ya kuma a zvilo zvo tala, ni tinguwo, ni zvilo zva lisima lezvi va nga va tlhatlhela laha ka kuza va nga ha zvi koti ni ku rwala.+ Va mbhetile a masiku manharu na va rwalela lezvi va nga phanga hakuva zvi wa tele nguvhu. 26 Hi siku ga wumune, va no hlengeletana nkoveni wa Bheraka, va dhumisa Jehovha laho. Hi cigelo leco, a wutshamu lego va no gi chula ku i nkova wa Bheraka*+ — kala ni nyamutlha lezvi.

27 Andzhako ka lezvo, a vavanuna vontlhe va le Judha ni va le Jerusalema va no tlhela Jerusalema hi kutsaka na va rangelwa hi Jehoxafati, hakuva Jehovha i wa va mahile va tsaka hi kota ya lezvi va nga hlula a valala vabye.+ 28 Hikwalaho, va no nghena Jerusalema na va hi ni zvichaya-chaya zva tingoti, ni zvitende,+ ni mimpundzu,+ niku va noya ndlwini ya Jehovha.+ 29 A mifumo yontlhe ya matiko yi no chava Nungungulu laha yi ngazwa lezvaku Jehovha i lwile ni valala va vaIzrayeli.+ 30 Hi kota ya lezvo, a mufumo wa Jehoxafati wu nova ni kurula, niku Nungungulu wakwe i no simama ku mu nyika kuhumula matlhelweni wontlhe.+

31 Jehoxafati i no simama ku fumela Judha. I wa hi ni 35 wa malembe a cikhati leci a nga maha hosi, niku i no fuma a 25 wa malembe Jerusalema. A vito ga mamani wakwe ku wa hi Azubha, a nhanyana wa Xilhi.+ 32 I no simama ku famba ndleleni ya Asa, a papayi wakwe.+ A nga hambukangi ka yona, niku i no maha zvakululama mahlweni ka Jehovha.+ 33 Hambulezvo, a matshamu yo tlakuka a ma susiwangi+ niku a vanhu va wa nga se longisela a timbilu tabye kasi ku hlota a Nungungulu wa vakokwani vabye.+

34 A man’wani matimu ya Jehoxafati, kusukela kusanguleni kala magumo, ma tsalilwe cikari ka timhaka ti tsalilweko hi Jehu,+ a n’wana wa Hanani, leti ti patsilweko Bhukwini ga Tihosi ta ka Izrayeli.+ 35 Andzhako ka lezvo, Jehoxafati, a hosi ya ka Judha, i no maha wuxaka na Ahaziya, a hosi ya Izrayeli, loyi a nga kari a maha zvakubiha.+ 36 Va no tira zvin’we va maha zvitimela* zva kuya Tarxixi,+ va zvi mahela le Eziyoni-Gebhera.+ 37 Hambulezvo, Eliyezeri, a n’wana wa Dhodhavhahu wa le Merexa, i no phrofeta a timhaka to vhukela Jehoxafati, aku: “Kota lezvi u nga maha wuxaka na Ahaziya, Jehovha i ta hahlula a mitiro ya wena.”+ Hikwalaho, a zvitimela* zvi no pandzekela;+ a zva ha yangi Tarxixi.