Tihosi ta wumbiri
16 Hi lembe ga wu 17 ga Peka, a n’wana wa Remaliya, Ahaza,+ a n’wana wa Jothamu, a hosi ya Judha, i no maha hosi. 2 Ahaza i wa hi ni 20 wa malembe a cikhati leci a nga maha hosi, niku i no fuma a 16 wa malembe Jerusalema. A nga mahangi zvakululama mahlweni ka Jehovha, a Nungungulu wakwe, a ku khwatsi hi lezvi Dhavhidha, a kokwani wakwe, a nga mahile.+ 3 Kanilezvi, i no famba hi ndlela ya tihosi ta Izrayeli,+ niku i zile a hundzisa a n’wana wakwe hi lomu ndzilweni,+ a landzela mahanyela yo nyenyeza ya matiko+ lawa Jehovha a nga ma hlongolile mahlweni ka vaIzrayeli. 4 I no tlhela a simama ku maha miphahlo ni ku tuvikisa musi wa miphahlo lomu matshan’wini yo tlakuka,+ ni lomu ka zvitsungana, ni lahasi ka tisinya tontlhe to tlhuma.+
5 Kuve ka cikhati caleco, laha Rezini, a hosi ya Siriya, na Peka, a n’wana wa Remaliya, a hosi ya Izrayeli, va ngata va talwa ni Jerusalema.+ Va no randzela Ahaza kanilezvi a va zvi kotangi ku teka dhoropa. 6 Ka cikhati leco, Rezini, a hosi ya Siriya, i no tlhelisa Elate+ ka Edhomi. Andzhako ka lezvo, i no hlongola vaJudha* le Elate. A vaEdhomi va no nghena Elate niku va hanya kona kala ni nyamutlha lezvi. 7 Hikwalaho, Ahaza i no rumela zvirun’wa ka Tiglate-Pilesera,+ a hosi ya Asiriya, aku: “Mina ndzi nandza ga wena ni n’wana wa wena. Kandziha u ta ndzi tlhatlhisa canjeni ga hosi ya Siriya ni canjeni ga hosi ya Izrayeli lava va ndzi dhumelako.” 8 Makunu Ahaza i no teka a prata ni ouro leyi yi nga hi lomu ndlwini ya Jehovha ni lomu titshombeni ta yindlu* ya hosi a zvi rumela ka hosi ya Asiriya, a mu xava hi zvona.+ 9 A hosi ya Asiriya yi no hlamula cikombelo cakwe, yi kandziha yiya Dhamasku yi ya gi teka yi khoma vanhu va kona yi va yisa wukhumbini le Kira+ yi tlhela yi daya Rezini.+
10 Makunu hosi Ahaza i no ya tlhangana na Tiglate-Pilesera, a hosi ya Asiriya, le Dhamasku. A cikhati leci a nga wona a alati legi gi nga hi Dhamasku, hosi Ahaza i no rumela mufananiso wa alati ka mupristi Urija, a mu komba lezvi gi nga tshamisile zvona ni lezvi gi nga mahisilwe zvona.+ 11 Mupristi Urija+ i no aka a alati+ na a landza zvileletelo zvontlhe lezvi hosi Ahaza a nga rumele hi le Dhamasku. Mupristi Urija i no mbheta ku aka alati hosi Ahaza na a nga se wuya hi Dhamasku. 12 A cikhati leci a hosi yi nga wuya hi Dhamasku yi ta wona a alati, yi no tshinela yi maha minyikelo hehla ka gona.+ 13 I no simama ku maha minyikelo yakwe ya kuhiswa hehla ka gona ni minyikelo yakwe ya tindzhoho. I no tlhela a chulula hehla ka gona a minyikelo yakwe ya zvakunwa ni ku n’watsekela hehla ka gona a nkhata wa miphahlo yakwe ya kuhlengela.* 14 Makunu i no susa a alati ga kobre+ legi gi nga hi mahlweni ka Jehovha laha wutshan’wini ga gona mahlweni ka yindlu, cikari ka alati gakwe ni yindlu ya Jehovha, a ya gi veka tlhelweni ga n’walungu* ga alati gakwe. 15 Hosi Ahaza i no leletela mupristi Urija,+ aku: “Mahela laha ka alati legi ga hombe+ a munyikelo wa kuhiswa wa ni mixo, ni munyikelo wa tindzhoho wa ni gambo,+ ni munyikelo wa kuhiswa wa hosi, ni munyikelo wa yona wa tindzhoho, zvin’we ni minyikelo ya kuhiswa, ni minyikelo ya tindzhoho, ni minyikelo ya zvakunwa ya vanhu vontlhe. Tlhela u n’watsekela hehla ka gona a nkhata wontlhe wa minyikelo ya kuhiswa ni nkhata wontlhe wa yin’wani miphahlo. Xungetano hi alati ga kobre, ndza ha ta wona ku ndzi ta maha yini hi gona.” 16 Mupristi Urija i no maha zvontlhe lezvi hosi Ahaza a nga mu leletela.+
17 Ahandle ka lezvo, hosi Ahaza i no tsemelela a makwadru ya lomu matlhelweni ka zvikarinyana+ a tlhela a suselela a tibasiya ta zvona.+ I no rula a Bimbi legi gi nga tlhatekilwe hehla ka madhuna ya tihomu ya kobre+ a gi veka ka wutshamu go bambatelwa hi maribye.+ 18 Hi kota ya hosi ya Asiriya, i no susa lomu ndlwini ya Jehovha a wutshamu gi nga fulelwe legi gi nga akilwe lomu ndlwini kasi gi tirisiwa hi sabhadho a tlhela a vhala a nyangwa ya lahandle yi nga tirisiwa hi hosi.
19 A man’wani matimu ya Ahaza, lezvi a nga maha, ma tsalilwe bhukwini ga matimu ya zvikhati zva tihosi ta Judha.+ 20 Hi kugumesa, Ahaza i no etlela, a humula ni vakokwani vakwe, a lahliwa zvin’we ni vakokwani vakwe Dhoropeni ga Dhavhidha; na Hezekiya,*+ a n’wana wakwe, i no maha hosi cikhundleni cakwe.