Kronekele wa wumbiri

28 Ahaza+ i wa hi ni 20 wa malembe a cikhati leci a nga maha hosi, niku i no fuma a 16 wa malembe Jerusalema. A nga mahangi zvakululama mahlweni ka Jehovha a ku khwatsi hi lezvi Dhavhidha, a kokwani wakwe, a nga mahile.+ 2 Wutshan’wini ga lezvo, Ahaza i no famba hi tindlela ta tihosi ta ka Izrayeli,+ niku i zile a maha ni zvifananiso zva simbi*+ zva Bhaali. 3 Ahandle ka lezvo, i no maha miphahlo ya kuhiswa Nkoveni wa N’wana wa Hinome* a tlhela a hisa a vafana vakwe laha ndzilweni,+ a landzela mahanyela yo nyenyeza ya matiko+ lawa Jehovha a nga ma hlongolile mahlweni ka vaIzrayeli. 4 I no tlhela a simama ku maha miphahlo ni ku tuvikisa musi wa miphahlo lomu matshan’wini yo tlakuka,+ ni lomu ka zvitsungana, ni lahasi ka tisinya tontlhe to tlhuma.+

5 Hikwalaho, Jehovha, a Nungungulu wakwe, i no mu nyikela canjeni ga hosi ya Siriya.+ A vaSiriya va no mu hlula va tlhela va khoma vanhu vo tala kota tikhumbi va famba navo Dhamasku.+ I no tlhela a nyikelwa canjeni ga hosi ya Izrayeli leyi yi nga mu xanisa, yi daya vanhu vakwe vo tala. 6 Hakuva Peka,+ a n’wana wa Remaliya, i no daya 120 000 wa vavanuna le Judha hi siku gin’we — vontlhe va tinhenha — hakuva va wa tsikile Jehovha, a Nungungulu wa vakokwani vabye.+ 7 Zikri, a nhenha ya muEfrayime, i no daya Maaseya, a n’wana wa hosi, na Azrikamu, loyi a nga hi muwoneleli wa yindlu* ya hosi, na Elkana, loyi a nga kari a gamela hosi. 8 Ahandle ka lezvo, a vaIzrayeli va no khoma a 200 000 wa vamakabye vabye — a vavasati, ni vafana, ni vanhanyana; va no phanga ni zvilo zvo tala va famba nazvo Samariya.+

9 Kanilezvi a muphrofeti wo kari wa Jehovha a vitwako Odhedhi i wa hi seyo. I no huma a khinga a butho legi gi nga kari gi tlhela Samariya, aku: “Wonani! Jehovha, a Nungungulu wa vakokwani va n’wina, i wa zangarele Judha; hikwalaho, i no va nyikela canjeni ga n’wina.+ Kanilezvi mu no va daya hi zanga yi ngaza yi chikela ni le matilweni. 10 Makunu lezvi mu lava ku teka a vanhu va Judha ni va Jerusalema mu va maha malandza ya n’wina ya cinuna ni ya cisati.+ Xana n’wina a mu na nandzu mahlweni ka Jehovha, a Nungungulu wa n’wina ke? 11 Makunu ndzi ingiseni, mu tlhelisa lava mu va khomileko ka vamakabye va n’wina, hakuva a zanga ya Jehovha yi vhurako ya mu vhukela.”

12 Hi kota ya lezvo, a varangeli vo kari va ka Efrayime, ku nga Azariya, a n’wana wa Jehohanani, na Bherekiya, a n’wana wa Mexilemote, na Jehizkiya, a n’wana wa Xaluma, na Amasa, a n’wana wa Hadlayi, va no vhukela lava va nga kari va wuya hi yimpini, 13 vaku kabye: “Mu nga nghenisi vanhu va khomilweko lomu, hakuva zvi nga hi kumisa nandzu mahlweni ka Jehovha. Lezvi mu lavako ku maha zvi ta engetela a zviwonho zva hina ni nandzu wa hina, hakuva a nandzu wa hina wu sina wu hi wa hombe, niku ku na ni zanga yi vhurako yi vhukela Izrayeli.” 14 Hikwalaho, a masochwa ma hlomileko ma no nyikela lava va nga khomilwe ni muphango+ ka tihosana ni ka bandla gontlhe. 15 Hi kulandzela, a vavanuna lava va nga yimisilwe hi mavito va no teka lava va nga khomilwe va va nyika tinguwo ta muphango vontlhe lava va nga hi zvimbyiri. Hikwalaho, va no va bohisa, va va nyika masandalia, ni zvakuga, ni zvakunwa, ni mafura yo tola. Ahandle ka lezvo, lava va nga rerekile va no va khilelisa timbongola va famba navo ka vamakabye vabye Jeriko, dhoropeni ga micindzu. Andzhako ka lezvo, va no tlhela Samariya.

16 Ka cikhati caleco, hosi Ahaza i no kombela civhuno ka tihosi ta Asiriya.+ 17 A vaEdhomi va no engeta va dhumela Judha, va khoma vanhu va famba navo. 18 A vaFilistiya+ vonawu va no dhumela a madhoropa ya Xefela+ ni Negebhe, le Judha, va teka Bhet-Xemexe,+ ni Ayijaloni,+ ni Gedherote, ni Soko ni zvidhoropana zva kona, ni Timna+ ni zvidhoropana zva kona, ni Gimzo ni zvidhoropana zva kona, va gumesa va tshama lomo. 19 Jehovha i no tsongahata Judha hi kota ya Ahaza, a hosi ya ka Izrayeli, hakuva i wa tsikile Judha a ti hanyela gakwe, zvi mu yisa ka kungatsumbeki ka hombe mahlweni ka Jehovha.

20 Hi kugumesa, Tilgate-Pilnesera,+ a hosi ya Asiriya, i nota a ta mu vhukela a mu vangela kukarateka+ wutshan’wini ga ku mu tiyisa. 21 Ahaza i wa phangile a zvilo zva yindlu ya Jehovha, ni zva yindlu* ya hosi,+ ni zva tiyindlu ta tihosana, a nyika hosi ya Asiriya kota cinyikiwo, kanilezvi a zvi mu vhunangi nchumu. 22 Kukaratekeni kakwe, hosi Ahaza i no simama ku kungatsumbeki mahlweni ka Jehovha. 23 I no sangula ku maha miphahlo ka vanungungulu va Dhamasku+ lava va nga mu hlulile,+ na aku: “Kota lezvi a vanungungulu va tihosi ta Siriya va ti vhunako, ndzi ta va mahela miphahlo kasi va ndzi vhunawo.”+ Kanilezvi va no hambukisa yena ni vaIzrayeli vontlhe. 24 Ahandle ka lezvo, Ahaza i no hlengeleta a zvibya zva yindlu ya Nungungulu wa lisine; i no gumesa a pandzelela a zvibya zva yindlu ya Nungungulu wa lisine,+ a vhala a tivati ta yindlu ya Jehovha+ a tlhela a ti mahela maalati ka makhona wontlhe ya Jerusalema. 25 Ka madhoropa wontlhe ya Judha, i no ti akela matshamu ma tlakukileko kasi a mahela kona a miphahlo ya kuhiswa ka van’wani vanungungulu,+ a zangarisa Jehovha, a Nungungulu wa vakokwani vakwe.

26 A man’wani matimu yakwe, zvontlhe lezvi a nga zvi maha kusukela kusanguleni kala magumo, ma tsaliwe Bhukwini ga Tihosi ta ka Judha ni ta ka Izrayeli.+ 27 Hi kugumesa, Ahaza i no etlela, a humula ni vakokwani vakwe; va no mu lahla dhoropeni, a Jerusalema, hakuva a va fambangi naye zvilahleni zva tihosi ta ka Izrayeli.+ Hezekiya, a n’wana wakwe, i no maha hosi cikhundleni cakwe.