Kronekele wa wumbiri

29 Hezekiya+ i mahile hosi na a hi ni 25 wa malembe niku i no fuma a 29 wa malembe Jerusalema. A vito ga mamani wakwe ku wa hi Abhija, a nhanyana wa Zakariya.+ 2 I no simama ku maha zvakululama mahlweni ka Jehovha+ a ku fana ni lezvi Dhavhidha, a kokwani wakwe, a nga mahile.+ 3 Hi lembe go sangula ga kufuma kakwe, ka hweti yo sangula, i no vhulula tivati ta yindlu ya Jehovha a ti lungisa.+ 4 Andzhako ka lezvo, i no vitanisa a vapristi ni vaLevhi a ta va tsombanisa laha prasa* hi tlhelo ga mutsuwuka-gambo. 5 I te ngalo kabye: “Ndzi ingiseleni, n’wina vaLevhi. Makunu ti basiseni,+ mu basisa ni yindlu ya Jehovha, a Nungungulu wa vakokwani va n’wina, mu tlhela mu susa lezvi zvi nga hlazvekangiko wutshan’wini go basa.+ 6 Hakuva a vapapayi va hina a va tsumbekangi niku va mahile zvakubiha mahlweni ka Jehovha, a Nungungulu wa hina.+ Va no mu tsika, va jikisa tinghohe tabye ti nga ha cuwuki a tabhernakeli ga Jehovha va tlhela va mu fularela.+ 7 Va vhalile ni tivati ta ligumbagumba+ va tlhela va tima a tikandiya.+ Va nyimile a ku hisa libani+ ni ku mu mahela a miphahlo ya kuhiswa+ a Nungungulu wa Izrayeli lomu wutshan’wini go basa. 8 Hikwalaho, a zanga ya Jehovha yi nota hehla ka Judha ni Jerusalema+ laha ka kuza a va maha vava nchumu wo tshisa, ni wo hlamalisa, ni wa ku loku munhu a ku wu cu aba noti,* kota lezvi mu zvi wonako hi matihlo ya n’wina.+ 9 Hi ndlela leyo, a vakokwani va hina va no dawa hi cipadha,+ a vafana va hina, ni vanhanyana va hina, ni vasati va hina, va yisiwa wukhumbini.+ 10 Makunu a kuxuva ka mbilu ya mina ku maha civhumelwano na Jehovha, a Nungungulu wa Izrayeli,+ kasi a zanga yakwe yi vhurako yi suka ka hina. 11 Vana vanga, leci a hi cikhati ca ku kondla mawoko,* hakuva Jehovha i mu hlawulile kasi mu yima mahlweni kakwe mu mu tirela kota malandza yakwe+ mu tlhela mu maha miphahlo yakwe ya kuhiswa.”+

12 Hikwalaho, a vaLevhi lava va no sangula ku tira. Ka va ka Kohate:+ Mahate, a n’wana wa Amasayi, na Joyeli, a n’wana wa Azariya; ka va ka Merari:+ Kixi, a n’wana wa Abdhi, na Azariya, a n’wana wa Jehalelela; ka va ka Gerxoni:+ Jowa, a n’wana wa Zima, na Edheni, a n’wana wa Jowa; 13 ka vana va Elizafane: Ximri na Jeweli; ka vana va Asafa:+ Zakariya na Mataniya; 14 ka vana va Hemani:+ Jehiyeli na Ximeyi; ka vana va Jedhutuni:+ Xemaya na Uziyeli. 15 Hi kulandzela, va no tsombanisa a vamakabye vabye, va ti basisa va tlhela va ya basisa a yindlu ya Jehovha kota lezvi a hosi yi nga layile hi kuya hi gezu ga Jehovha.+ 16 Hi kulandzela, a vapristi va no nghena lomu ndlwini ya Jehovha kasi va yi basisa, va humesa a zvilo zvontlhe zvi nga hlazvekangiko va nga zvi kuma lomu tempeleni ya Jehovha va famba nazvo tsendzeleni*+ wa yindlu ya Jehovha. A vaLevhi va no zvi teka va famba nazvo handle, nkoveni wa Kidroni.+ 17 Hikwalaho, va no sangula ku basisa hi siku go sangula ka hweti yo sangula niku hi siku ga wu 8 ka hweti yaleyo va no chikela laha ligumbagumbeni la Jehovha.+ Va no basisa a yindlu ya Jehovha hi 8 wa masiku niku hi siku ga wu 16 ka hweti yo sangula va no mbheta.

18 Andzhako ka lezvo, va noya ka hosi Hezekiya va yaku: “Hi basisile a yindlu yontlhe ya Jehovha, ni alati ga munyikelo wa kuhiswa,+ ni zvontlhe a zvibya zva gona,+ ni meza ya tipawa ta munyikelo,+ ni zvontlhe a zvibya zva yona. 19 A zvibya zvontlhe lezvi hosi Ahaza a nga zvi susa a cikhati leci a nga kari a fuma, laha a nga kala ku tsumbeka,+ hi zvi longisele hi zvi basisa+ niku zvi laha mahlweni ka alati ga Jehovha.”

20 Hosi Hezekiya i no vindzuka nguvhu a tsombanisa a tihosana ta dhoropa va kandziha vaya ndlwini ya Jehovha. 21 Va no neha a 7 wa madhuna ya tihomu, ni 7 wa tiyivhu ta vamatsune, ni 7 wa tiyivhana ta vamatsune, ni 7 wa timhongo kota munyikelo wa ciwonho wa mufumo, ni wa wutshamu go basa, ni wa Judha.+ Hikwalaho, i no byela a vapristi, a vana va Aroni, lezvaku va zvi nyikela laha alatini ga Jehovha. 22 Va no daya a tihomu,+ niku a vapristi va no teka a nkhata wa kona va wu n’watsekela laha alatini.+ Hi kulandzela, va no daya tiyivhu ta vamatsune va n’watsekela a nkhata wa kona laha ka alati, va tlhela va daya a tiyivhana ta vamatsune va n’watsekela a nkhata wa kona laha ka alati. 23 Andzhako ka lezvo, va no tisa a timhongo ta munyikelo wa ciwonho mahlweni ka hosi ni ka bandla va ta tlhateka a mandla yabye hehla ka tona. 24 A vapristi va no daya a timhongo leto, a nkhata wa kona va maha hi wona a munyikelo wa ciwonho laha alatini, kasi va maha a muphahlo wa ku kombela kutsetselelwa zviwonho zva vaIzrayeli vontlhe, hakuva a hosi yi wa te a munyikelo wa kuhiswa ni munyikelo wa ciwonho yi fanele ku mahelwa a vaIzrayeli vontlhe.

25 Ka cikhati caleco, Hezekiya i wa yimisile a vaLevhi laha ndlwini ya Jehovha na va hi ni tingomana, ni zvichaya-chaya zva tingoti, ni zvitende,+ hi ku landza a zvileletelo zva Dhavhidha,+ ni zva Gadhi,+ a muwoni wa hosi, ni zva muphrofeti Natani,+ hakuva a zvileletelo lezvo zvi wata hi ka Jehovha hi ku tirisa a vaphrofeti vakwe. 26 Hikwalaho, a vaLevhi va wa yimile na va hi ni zvichaya-chaya zva Dhavhidha, a vapristi na va hi ni mimpundzu.+

27 Andzhako ka lezvo, Hezekiya i no laya lezvaku ku nyikelwa a muphahlo wa kuhiswa laha alatini.+ A cikhati leci a munyikelo wa kuhiswa wu nga sangula ku nyikelwa, ku no sangula ku yimbelelwa a lisimu la Jehovha na ku biwa a mimpundzu yi nga landzela a zvibya zva ku chaya hi zvona zva Dhavhidha, a hosi ya Izrayeli. 28 A cikhati leci ku nga kari ku yimbelelwa a lisimu na ku biwa mimpundzu, a bandla gontlhe gi no korama — zvontlhe lezvi zvi simamile kala ku mbhela a munyikelo wa kuhiswa. 29 Zvalezvi va nga mbheta ku nyikela munyikelo, a hosi ni vontlhe lava yi nga hi navo va no korama, va khizama. 30 Makunu hosi Hezekiya ni tihosana va no byela a vaLevhi lezvaku va dhumisa Jehovha hi tisimu ta Dhavhidha+ ni ta Asafa,+ a muwoni. Hikwalaho, va no dhumisa na va tsakile nguvhu niku va no korama, va khizama.

31 Andzhako ka lezvo, Hezekiya i te ngalo: “Makunu kota lezvi mu hambanisilweko ni lava van’wani* kasi mu tirela Jehovha, tanani, mu neha a miphahlo ni minyikelo ya kubonga ndlwini ya Jehovha.” Hikwalaho, a bandla gontlhe gi no sangula a ku neha miphahlo ni minyikelo ya kubonga niku ni wihi loyi a mbilu yakwe yi nga xuva ku nyikela i no tisa a minyikelo ya kuhiswa.+ 32 A ntsengo wa lezvi zvi nehilweko hi bandla kota munyikelo wa kuhiswa wu wa hi 70 wa tihomu, ni 100 wa tiyivhu ta vamatsune, ni 200 wa tiyivhana ta vamatsune — zvontlhe lezvi kota munyikelo wa kuhiswa ka Jehovha+ — 33 ni ntsengo wa lezvi zvi nehilweko kota minyikelo yo basa wu wa hi 600 wa tihomu ni 3000 wa tiyivhu. 34 Kanilezvi ku wa nga hi na vapristi vo enela kasi ku yewulela a zvihari zva minyikelo ya kuhiswa. Hikwalaho, a vamakabye vabye, a vaLevhi,+ va no va vhuna kala va mbheta ntiro, ni kala a vapristi va ti basisa,+ hakuva a vaLevhi va wa khatala* nguvhu hi ku ti basisa a ku hundza vapristi. 35 Ahandle ka lezvo, ku wa hi ni minyikelo yo tala ya kuhiswa,+ a ku patsa ni zvipandze zvo nona zva miphahlo ya kuhlengela,*+ ni minyikelo ya zvakunwa yi nyikelwako zvin’we ni minyikelo ya kuhiswa.+ Hi ndlela leyo, a ntiro wa yindlu ya Jehovha wu no vhuxetela. 36 Hikwalaho, Hezekiya ni vanhu vontlhe va no tsaka hi kota ya lezvi a Nungungulu wa lisine a nga mahele vanhu,+ hakuva zvontlhe lezvi zvi wa mahekile hi citshuketi.