Lisimu
Ka muchuli. Lisimu la Dhavhidha.
64 O Nungungulu, zwana a gezu ga mina laha ndzi ku khongotelako.+
Hlayisa a wutomi ga mina ka nala loyi a chavisako.
2 Ndzi vhikele ka zvikungo zva vakubiha lezvi va zvi xuxako cihundleni+
Ni ka citshungu ca vamahi va kubiha.
3 Va lota a tirimi tabye a ku khwatsi cipadha;
Va phanda a magezu yabye ya tihanyi a ku khwatsi mipaxa,
4 Kasi va fula loyi a nga hava nandzu na va hi lomu va fihlalako kona;
Va mu fula hi citshuketi, na va nga chavi nchumu.
5 Va womelela ka maalakanyo yabye ya kubiha;*
Va bhula hi lezvi va to yi fihlisa zvona a mitlhamu yabye,
Vaku: “Himani a to yi wona?”+
6 Va hlota tindlela tiswa ta ku maha zvakubiha;
Va xuxa a mano yabye ya kubiha cihundleni;+
A maalakanyo ya mbilu ya mun’we ni mun’wani wabye a ma na kupimiwa.
7 Kanilezvi Nungungulu i ta va fula;+
Va ta bayisiwa hi paxa hi citshuketi.
8 Va ta wisiwa hi lirimi la vona venyi;+
Vontlhe lava va to zvi wona va ta ninginisa tihloko tabye.
9 Makunu a vanhu vontlhe va ta chava,
Va huwelela lezvi Nungungulu a zvi mahileko;
Va ta zwisisa a mitiro yakwe.+