Zakariya

12 Ciphrofeto:

2 “Ndzi ta maha Jerusalema ava kopo* leyi yi dhedherekisako a matiko wontlhe lawa ma mu randzeleko; Judha i ta randzelwa niku Jerusalema yenawu.+ 3 Hi siku lego, ndzi ta maha Jerusalema ava ribye go bindza ka mifumo yontlhe. Hakunene vontlhe lava va gi tlakulako va ta bayisiwa nguvhu.+ A matiko wontlhe ya misava ma ta hlengeletiwa ma mu vhukela.+ 4 Hi siku lego”, ku wula Jehovha, “ndzi taba mahaxi wontlhe hi kuchava, ni vakhileli va wona ndzi ta vaba hi lihlanyi. A tihlo ga mina gi nga ta suka ndlwini ya ka Judha, kanilezvi ndzi taba a mahaxi wontlhe ya matiko hi wukhumu. 5 A tihosana ta ka Judha ti ta wulawula timbilwini ta tona, tiku: ‘A vahanyi va Jerusalema i ntamu wa mina hi Jehovha wa mabutho, a Nungungulu wabye.’+ 6 Hi siku lego, ndzi ta maha a tihosana ta ka Judha ti ku khwatsi makhala ya ndzilo cikari ka tihunyi, ti tlhela ti ku khwatsi cikungusa ca ndzilo cikari ka tinyandza ta timbewu.+ Ti ta hisa matiko wontlhe ma ti randzeleko, cineneni ni cibhabheni;+ ni Jerusalema i ta tlhela ava ni vahanyi wutshan’wini gakwe, le Jerusalema.+

7 “Jehovha i ta ponisa a matenda ya ka Judha a kusangula, kasi a kusaseka* ka yindlu ya Dhavhidha ni kusaseka* ka vahanyi va Jerusalema ku ngavi ka hombe nguvhu a ku hundza Judha. 8 Hi siku lego, Jehovha i ta vhikela a vahanyi va Jerusalema;+ hi siku lego, loyi a to ti phinganyeta* cikari kabye i ta fana na Dhavhidha, ni yindlu ya Dhavhidha yi ta fana na Nungungulu, yi ku khwatsi i ngilozi ya Jehovha leyi yi rangako phambeni kabye.+ 9 Hi siku lego, hakunene ndzi ta hihirita a matiko wontlhe lawa ma tako ma ta vhukela Jerusalema.+

10 “Ndzi ta chulula a moya wa wuxinji ni wa kukhongotela hehla ka yindlu ya Dhavhidha ni ka vahanyi va Jerusalema. Va ta cuwuka loyi va mu tlhavileko,+ va mu rilela a ku khwatsi hi loku va rilela a n’wana a pswalilweko yece; va ta karateka nguvhu a ku khwatsi hi loku va karatekela a n’wana wa matewula. 11 Hi siku lego, ku tava ni huwa ya hombe le Jerusalema a ku fana ni huwa ya le Hadhadrimoni, Nkoveni wa Megidho.+ 12 A tiko gi ta rila, a ngango ni ngango wu ta rila woce: A ngango wa yindlu ya Dhavhidha wu ta rila woce, ni vavasati va kona va rila voce; a ngango wa yindlu ya Natani+ wu ta rila woce, ni vavasati va kona va rila voce; 13 a ngango wa yindlu ya Levhi+ wu ta rila woce, ni vavasati va kona va rila voce; a ngango wa ka Ximeyi+ wu ta rila woce, ni vavasati va kona va rila voce; 14 ni mingango yontlhe leyi yi seleko, a wun’we ni wun’we wu ta rila woce, ni vavasati va kona kambe va rila voce.