Samuweli wa wumbiri
1 Andzhako ka kufa ka Sawule, laha Dhavhidha a nga wuyile hi le ko hlula* a vaAmaleki, i no tshama masiku mambiri le Ziklagi.+ 2 Hi siku ga wunharu, ku nota wanuna hi le wugovelweni ga Sawule na a hi ni tinguwo to handzuka ni misava lomu hlokweni yakwe. I no tshinela ka Dhavhidha awa lahasi, a khizama.
3 Dhavhidha i no mu wutisa, aku: “Uta hi kwihi?” A hlamula aku: “Ndzi hulukile hi le wugovelweni ga vaIzrayeli.” 4 Dhavhidha aku: “Zvini zvi nga maheka? Ndzi byele.” Yena aku: “A vanhu va tsutsumile le yimpini niku ku delwe vanhu vo tala. Hambu Sawule ni n’wana wakwe Jonatani va file.”+ 5 Makunu Dhavhidha i no wutisa jaha legi gi nga mu tela ni mahungu, aku: “U zvi tivisa kuyini ku Sawule ni n’wana wakwe Jonatani va file?” 6 A jaha lego gi no hlamula giku: “Zvi kotlene na ndzi hi Citsungeni ca Gilbhowa,+ ndzi se wona Sawule na a khigele laha ka tlhari gakwe, a tikareta ni vakhileli va mahaxi na va tshinela kusuhani kakwe.+ 7 A cikhati leci a nga hundzuluka a ndzi wona, i no ndzi vitana. Mina ndziku: ‘Hi mina loyi!’ 8 I no ndzi wutisa, aku: ‘Hi wena mani?’ Ndziku: ‘Ndzi muAmaleki.’+ 9 A gumesa aku: ‘Tshinela u ndzi daya hakuva ndzizwa kubayisa ka hombe, hambulezvo ndza ha hanya.’* 10 Hikwalaho, ndzi no tshinela kakwe ndzi mu daya+ hakuva ndzi wa zvi tiva lezvaku lezvi a nga bayisiswa zvona a nga ta hanya. Andzhako ka lezvo, ndzi no teka a cidlodlo* ci nga hi hlokweni yakwe ni pulsera gi nga hi wokweni gakwe, ndzita nazvo laha ka hosi ya mina.”
11 Hi kota ye lezvo, Dhavhidha i no handzula a tinguwo takwe, ni vavanuna vontlhe lava a nga hi navo va no maha zvalezvo. 12 Va noba tinyandha, va rila, va tlhela va pfhunga*+ kala ni gambo hi kota ya Sawule, ni n’wana wakwe Jonatani, ni vanhu va Jehovha, ni yindlu ya ka Izrayeli,+ hakuva va wa delwe hi cipadha.
13 Dhavhidha i no wutisa a jaha legi gi nga mu tela ni mahungu, aku: “Uta hi kwihi?” Giku: “Ndzi n’wana wa muluveli, wa muAmaleki.” 14 Dhavhidha aku kakwe: “Hikuyini u nga kala ku chava a ku tlakusa a canja ga wena u daya a totilweko wa Jehovha?”+ 15 Makunu Dhavhidha i no vitana a gin’we ga majaha yakwe, aku: “Tshinela u mu daya.” Hikwalaho, gi no mu tlhava afa.+ 16 Dhavhidha aku kakwe: “A nkhata wa wena a wuve hlokweni ya wena n’winyi, hakuva u ti konile hi nomu wa wena, uku: ‘Hi mina ndzi nga daya a totilweko wa Jehovha.’”+
17 Dhavhidha i no yimbelela a lisimu la cirilo, a rila Sawule ni n’wana wakwe Jonatani,+ 18 a tlhela a wula lezvaku a va ka Judha va fanele ku gondzisiwa a lisimu leli laku: “Wura”, li tsalilweko ka bhuku ga Jaxari,+ laku:
19 “Yowe, a kusaseka ka wena Izrayeli ku n’walele hehla ka zvitsunga zva wena.+
Hi nga wonani lezvi a tinhenha ti nga wisa zvona!
20 Mu nga zvi wuli le Gati,+
Ne mu nga zvi huweleli lomu maruweni ya Axkeloni,
Hakuva a vanhanyana va vaFilistiya va nga tsaka;
Ni vanhanyana va vavanuna lava vo kala ku mahiwa wukwera* va nga kulungela hi kutsaka.
21 N’wina zvitsunga zva Gilbhowa,+
Ku ngavi ni ndzhokati kutani vhula ka n’wina,
Ne masimu ma humesako a minyikelo yo basa,+
Hakuva a citlhangu ca tinhenha ci nyenyezisilwe,
A citlhangu ca Sawule a ca ha totiwangi hi mafura.
22 Ka nkhata wa lava va delweko, ni ka mafura ya tinhenha,
A wura ga Jonatani gi wa nga tlheli ndzhako,+
Ni cipadha ca Sawule ci wa nga wuyi mahala.+
23 Sawule na Jonatani+ va wa randzeka va tlhela va xalalisa wutomini gabye,
Ni kufeni a va hambanisiwangi.+
24 N’wina vanhanyana va Izrayeli rilelani Sawule,
Loyi a nga mu bohisa a tinguwo to pswhuka ti sasekiselweko,
Loyi a nga sasekisela a tinguwo ta n’wina hi ouro.
25 Hi nga wonani lezvi a tinhenha ti nga wisa zvona yimpini!
Jonatani i file hehla ka zvitsunga zva wena!+
26 Ndzi bayisekile nguvhu hi wena makabye wa mina, Jonatani;
Ndzi wa ku randza nguvhu!+
A lirandzo la wena li wa ndzi tsakisa a ku hundza ni lirandzo la vavasati.+
27 Hi nga wonani lezvi a tinhenha ti nga wisa zvona,
Ni matlhari ya yimpi ma fuvile!”