Kronekele wo sangula

21 Makunu Sathani* i no vhukela Izrayeli, a kucetela Dhavhidha lezvaku a hlaya vaIzrayeli.+ 2 Hikwalaho, Dhavhidha i no byela Jowabe+ ni tihosana ta vanhu, aku: “Fambani mu ya hlaya a vaIzrayeli kusukela Bherexebha kala Dhani,+ mu ndzi wuyela ni mubiko kasi ndzi fela ku tiva a ntsengo wabye.” 3 Kanilezvi Jowabe i te: “Ngha Jehovha a andzisa a vanhu vakwe hi 100 wa makhati! Hosi yanga, kasi vontlhe lava a hi malandza ya hosi ya mina ke? Hikuyini a hosi ya mina yi lavako ku maha lezvi ke? Hikuyini yi lavako ku neha nandzu ka Izrayeli?”

4 Kanilezvi a gezu ga hosi gi nova ni ntamu a ku hundza legi Jowabe. Hikwalaho, Jowabe i no suka a fambafamba lomu Izrayeli, a gumesa a tlhela Jerusalema.+ 5 Jowabe i no hendleleta ka Dhavhidha a ntsengo wa vanhu lava va nga tsalelwe. Vontlhe a vaIzrayeli va wa hi 1 100 000 wa vavanuna va hlomileko zvipadha. Ka lixaka la ka Judha ku wa hi ni 470 000 wa vavanuna va hlomileko zvipadha.+ 6 Kanilezvi a va ka Levhi ni va ka Bhenjamini a va tsalelwangi cikari kabye,+ hakuva a cileletelo ca hosi ci wa hi cinyenyeko ka Jowabe.+

7 Lezvi zvi no mu swira nguvhu a Nungungulu wa lisine, hikwalaho i no hlasela Izrayeli. 8 Dhavhidha i no byela a Nungungulu wa lisine, aku: “Ndzi wonhile+ nguvhu hi ku maha lezvi. Makunu tsetselela a cigoho ca nandza ga wena+ hakuva ndzi mahile a wupumbu ga hombe nguvhu.”+ 9 Jehovha i no wulawula na Gadhi,+ a muwoni wa Dhavhidha, aku: 10 “Famba u ya byela Dhavhidha, uku: ‘Jehovha i ngalo: “Ndza ku nyika mawonela manharu. Hlawula legi ndzi faneleko ku gi neha ka wena.”’” 11 Hikwalaho, Gadhi i noya ka Dhavhidha a yaku kakwe: “Jehovha i ngalo: ‘Hlawula leci u ci lavako: 12 Ku ngava malembe manharu ya ndlala,+ kutani tihweti tinharu na mu hluliwa hi valala va n’wina lezvo na mu hlaselwa hi cipadha ca valala va n’wina,+ kutani masiku manharu na mu tsayisiwa hi cipadha ca Jehovha, ku nga ntungu lomu tikweni,+ laha a ngilozi ya Jehovha yi nehako kulovisa+ lomu tikweni gontlhe ga Izrayeli.’ Makunu pimisa u ndzi byela lezvi ndzi faneleko a kuya ndzi ya hlamula Loyi a ndzi rumileko.” 13 Hikwalaho, Dhavhidha i no byela Gadhi, aku: “Ndza karateka nguvhu hi mhaka leyi. I chukwana ndzi wela canjeni ga Jehovha, hakuva a wuxinji gakwe ga hombe nguvhu;+ kanilezvi u nga ndzi tsiki ndzi wela canjeni ga munhu.”+

14 Hi kulandzela, Jehovha i no rumela ntungu+ lomu tikweni ga Izrayeli. Hikwalaho, ku nofa a 70 000 wa vanhu va ka Izrayeli.+ 15 Ahandle ka lezvo, a Nungungulu wa lisine i no rumela a ngilozi kasi yi ya lovisa Jerusalema. Kanilezvi laha yi nga lava ku maha lezvo, Jehovha i no zvi wona, a ti laya hi khombo lego,+ a byela a ngilozi leyi yi nga kari yi hlasela, aku: “Zvi ringene!+ Makunu tlhelisa a canja ga wena!” A ngilozi ya Jehovha yi wa yimile kusuhani ni wutshamu go hulela kona timbewu ga Ornani,+ a muJebhusi.+

16 A cikhati leci Dhavhidha a nga tlakusa mahlo, i no wona a ngilozi ya Jehovha na yi yimile cikari ka misava ni matilo, na yi khomile cipadha+ yi nga ci tlakusile ci xungeta Jerusalema. Makunu Dhavhidha ni madhota va no tekela kuwa lahasi hi tinghohe tabye,+ na va bohile tisakwa.+ 17 Dhavhidha aku ngalo ka Nungungulu wa lisine: “Kasi a hi mina ndzi nga laya lezvaku ku hlayiwa vanhu ke? Hi mina ndzi nga wonha, niku hi mina ndzi nga maha zvahava.+ Kanilezvi a tiyivhu leti zvini ti nga maha? O Jehovha, Nungungulu wa mina, a canja ga wena a give hehla ka mina ni ka yindlu ya papayi wa mina, kanilezvi u nga tisi khombo legi ka vanhu va wena.”+

18 Hi kulandzela, a ngilozi ya Jehovha yi no byela Gadhi+ kasi a ya byela Dhavhidha lezvaku a kandziha a ya mu akela alati Jehovha ka wutshamu go hulela kona timbewu ga Ornani, a muJebhusi.+ 19 Hikwalaho, Dhavhidha i no kandziha a ya maha lezvi a gezu ga Jehovha gi wulileko hi nomu wa muphrofeti Gadhi. 20 Zvalezvo, Ornani i no hundzuluka a wona ngilozi; a vafana vakwe va mune, lava va nga hi zvin’we naye, va no fihlala. Ornani i wa kari a hula trigo. 21 A cikhati leci Dhavhidha a nga chikela kakwe, Ornani i no cuwuka a wona Dhavhidha; zvalezvo i no tekela ku huma lomu ka wutshamu go hulela kona timbewu a ya khizama mahlweni ka Dhavhidha a korama lahasi hi nghohe. 22 Dhavhidha i no byela Ornani, aku: “Ndzi xavisele* a wutshamu go hulela kona timbewu kasi ndzi mu akela alati Jehovha. Ndzi xavisele hi mali yi gi ringanako kasi a ntungu lowu wu mbhetako vanhu wu nyima.”+ 23 Kanilezvi Ornani i te ngalo ka Dhavhidha: “Teka gi maha ga wena. A hosi ya mina yi wa mahe lezvi zvi nga zvinene matihlweni ya yona. Hi leti a tihomu kasi u maha hi tona a munyikelo wa kuhiswa, ni citlhata ca ku hula timbewu+ kasi u maha tihunyi, ni trigo kasi u maha a munyikelo wa tindzhoho. Ndza ku nyika zvontlhe.”

24 Hambulezvo, hosi Dhavhidha i no byela Ornani, aku: “Ahihi, ndzi fanele kuya hi ku gi xava hi mali yi gi ringanako, hakuva ndzi nga ta teka a zvilo zva wena ndzi nyika Jehovha kutani ku maha muphahlo wa kuhiswa na ndzi nga hakhelangi nchumu.”+ 25 Hikwalaho, Dhavhidha i no nyika Ornani a 600 wa maxekeli* ya ouro kasi ku xava wutshamu lego. 26 Dhavhidha i no mu akela alati+ Jehovha ka wutshamu lego, a maha miphahlo ya kuhiswa ni miphahlo ya kuhlengela. I no khongela ka Jehovha, yena a mu hlamula hi ku rumela ndzilo+ hi le matilweni wuta laha alatini ga munyikelo wa kuhiswa. 27 Andzhako ka lezvo, Jehovha i no laya ngilozi+ lezvaku yi tlhelisa cipadha ca yona lomu cikhwameni. 28 Laha Dhavhidha a nga wona lezvaku Jehovha i mu hlamulile laha wutshan’wini go hulela kona timbewu ga Ornani, a muJebhusi, i no simama ku mahela kona a miphahlo. 29 Ka cikhati leco, a tabhernakeli ga Jehovha, legi Mosi a nga mahile le ciwuleni, ni alati ga munyikelo wa kuhiswa zvi wa hi wutshan’wini go tlakuka le Gibheyoni.+ 30 Kanilezvi Dhavhidha i wa nga tiyi kuya a ya wutisa Nungungulu ka gona, hakuva i wa chava a cipadha ca ngilozi ya Jehovha.