Kronekele wa wumbiri

36 Andzhako ka lezvo, a vanhu va tiko va no teka Jehoahaza,+ a n’wana wa Josiya, va mu maha hosi Jerusalema cikhundleni ca papayi wakwe.+ 2 Jehoahaza i wa hi ni 23 wa malembe a cikhati leci a nga maha hosi, niku i no fuma tihweti tinharu Jerusalema. 3 Hambulezvo, a hosi ya Gibhite yi no susa Jehoahaza cikhundleni cakwe Jerusalema, yi gumesa yi hakhelisa tiko a ndzuvo* wa 100 wa titalenta* ta prata ni talenta yin’we ya ouro.+ 4 Ahandle ka lezvo, a hosi ya Gibhite yi no yimisa Eliyakimu, a makabye wa Jehoahaza, lezvaku ava hosi ya Judha ni ya Jerusalema, yi gumesa yi mu cica vito yiku hi Jehoyakimu; kanilezvi Neko+ i no teka Jehoahaza, a makabye wa Jehoyakimu, a famba naye Gibhite.+

5 Jehoyakimu+ i wa hi ni 25 wa malembe a cikhati leci a nga maha hosi, niku i no fuma a 11 wa malembe Jerusalema. I no simama ku maha zvakubiha mahlweni ka Jehovha, a Nungungulu wakwe.+ 6 Nebhukadnezare,+ a hosi ya Bhabhuloni, i nota kakwe kasi ku ta mu boha hi machini mambiri ya kobre lezvaku a mu teka a famba naye Bhabhuloni.+ 7 Nebhukadnezare i no teka a zvibya zvo kari zva yindlu ya Jehovha a famba nazvo Bhabhuloni a ya zvi veka mutini wakwe wa wuhosi le Bhabhuloni.+ 8 A man’wani matimu ya Jehoyakimu, a zvilo zvo nyenyeza lezvi a zvi mahileko, ni zvontlhe a zvilo zvo biha xungetano hi yena, ma tsaliwe Bhukwini ga Tihosi ta ka Izrayeli ni ta ka Judha; a n’wana wakwe Jehoyakina, i no maha hosi cikhundleni cakwe.+

9 Jehoyakina+ i wa hi ni 18 wa malembe a cikhati leci a nga maha hosi, niku i no fuma a tihweti tinharu ni 10 wa masiku Jerusalema. I no simama ku maha zvakubiha mahlweni ka Jehovha.+ 10 Kusanguleni ka lembe,* hosi Nebhukadnezare i no rumela vanhu va ya mu khoma va mu neha Bhabhuloni+ zvin’we ni zvilo zva lisima zva yindlu ya Jehovha.+ Nebhukadnezare i no yimisa Zedhekiya, a makabye wa papayi wa Jehoyakina, kota hosi ya Judha ni ya Jerusalema.+

11 Zedhekiya+ i wa hi ni 21 wa malembe a cikhati leci a nga maha hosi, niku i no fuma a 11 wa malembe Jerusalema.+ 12 I no simama ku maha zvakubiha mahlweni ka Jehovha, a Nungungulu wakwe. A nga ti koramisangi mahlweni ka muphrofeti Jeremiya,+ loyi a nga wulawula hi kulaya ka Jehovha. 13 A ku tsika lezvo, i no hluwukela hosi Nebhukadnezare,+ loyi a nga mu mahisile cihlambanyo hi vito ga Nungungulu; i no nonohisa nhamu yakwe ni mbilu yakwe, a ala ku tlhela ka Jehovha, a Nungungulu wa Izrayeli. 14 A tihosana tontlhe ta vapristi zvin’we ni vanhu va wo engetela kungatsumbeki, va maha zvilo zvontlhe zvo nyenyeza lezvi zvi nga mahiwa hi matiko va tlhela va nyenyezisa a yindlu ya Jehovha+ leyi a nga yi basisile le Jerusalema.

15 Jehovha, a Nungungulu wa vakokwani vabye, i no simama ku va tlharihisa hi ku tirisa zvirun’wa zvakwe, a va tlharihisa hi kuphindaphinda, hakuva i wa va zwela wusiwana a vanhu vakwe ni wutshamu gakwe. 16 Kanilezvi va no simama ku tseketsela a zvirun’wa zva Nungungulu wa lisine,+ va chepeta a magezu yakwe+ va tlhela va poyila a vaphrofeti vakwe+ kala a zanga ya Jehovha yita hehla ka vanhu vakwe,+ niku ku wa nga ha hi na muri.

17 Hikwalaho, i no rumela a hosi ya vaKaldheya+ yi ya va vhukela yi daya a majaha yabye hi cipadha+ lomu wutshan’wini gabye go basa;+ a yi ma zwelangi wusiwana a majaha kutani vanhwana,* ni zvikhosana kutani lava vo babya.+ Nungungulu i no nyikela zvontlhe canjeni ga yona.+ 18 A zvibya zvontlhe zva yindlu ya Nungungulu wa lisine, lezvi zva hombe ni lezvi zva zvitsongwani, a ku patsa ni titshomba ta yindlu ya Jehovha, ni titshomba ta hosi ni ta tihosana, zvontlhe yi no famba nazvo Bhabhuloni.+ 19 I no hisa a yindlu ya Nungungulu wa lisine,+ a khungumula muro wa Jerusalema,+ a hisa hi ndzilo tontlhe tikhokhola* ti tiyisilweko khwatsi a tlhela a lovisa zvilo zvontlhe zva lisima.+ 20 I no khoma lava va nga ponile ku dawa hi cipadha a famba navo Bhabhuloni;+ va no maha malandza ya yena+ ni ya vana va yena kala ka cikhati leci a mufumo wa Persia wu nga sangula ku fuma,+ 21 kasi ku tatiseka a mhaka ya Jehovha yi wulilweko hi Jeremiya,+ kala a tiko gi hakhela a masabhadho ya gona.+ A masiku wontlhe lawa a tiko gi nga tshama na gi nga hi na vaaki, gi wa hlayisa a sabhadho kala ku mbhela a 70 wa malembe.+

22 Hi lembe go sangula ga kufuma ka Khurusi,+ a hosi ya Persia, kasi ku tatiseka a mhaka ya Jehovha yi wulilweko hi Jeremiya,+ Jehovha i no vhuxa a moya wa Khurusi, a hosi ya Persia, lezvaku a huwelela mahungu mufun’weni wakwe wontlhe, lawa a nga tlhela a ma tsala,+ aku: 23 “Khurusi, a hosi ya Persia, i ngalo: ‘Jehovha, a Nungungulu wa matilo, i ndzi nyikile a mifumo yontlhe ya misava+ niku i ndzi rumile ku ndzi mu akela yindlu le Jerusalema, tikweni ga Judha.+ Ni wihi a nga cikari ka n’wina na a lumba vanhu vakwe, ngha Jehovha, a Nungungulu wakwe, ava zvin’we naye niku i wa kandzihe aya seyo.’”+