Papilo go sangula ka Va Le Korinte

1 Pawule, loyi a vitanelweko kuva mupostoli+ wa Kristu Jesu hi kurandza ka Nungungulu, na Sostene, a makabye wa hina, 2 ka bandla ga Nungungulu legi gi nga le Korinte,+ n’wina lava mu basisilweko ka Kristu Jesu,+ mu vitanelweko kuva vobasa, zvin’we ni vontlhe lava va khongelako vitweni ga Hosi ya hina Jesu Kristu matshan’wini wontlhe,+ yi nga Hosi yabye ni ya hina:

3 A tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu, a zvive na n’wina.

4 Ndza bonga Nungungulu wa mina contlhe cikhati ha n’wina, hi kota ya tipswalo leti Nungungulu a mu nyikileko ka Kristu Jesu; 5 hakuva zvilweni zvontlhe, mu ganyisilwe kakwe, hi tlhelo ga wutlhari gontlhe ga kuwulawula ni wutivi gontlhe,+ 6 a ku khwatsi hi lezvi a wukustumunyu xungetano hi Kristu+ gi tiyisilweko cikari ka n’wina, 7 kasi mu nga kiyelelwi hi cinyikiwo ne ni cin’we, laha mu rindzelako hi mahlo yo pswhuka a kuwonekeliswa ka Hosi ya hina Jesu Kristu.+ 8 I ta mu tiyisa kala kugumeseni kasi mu ngavi na cisolo sikwini ga Hosi ya hina Jesu Kristu.+ 9 Nungungulu i tsumbekile,+ loyi a mu vitanileko lezvaku mu tava zvin’we* ni N’wana wakwe Jesu Kristu, a Hosi ya hina.

10 Makunu ndza mu khongotela, vamakabye, hi vito ga Hosi ya hina Jesu Kristu lezvaku n’wentlhe mu wulawula cilo cin’we, ni lezvaku ku ngavi na kuhambana cikari ka n’wina,+ kanilezvi mu bohana hi kumbhelela kupimeni kun’we ni ka maalakanyo man’we.+ 11 Hakuva a vokari va ngango wa Klowe va ndzi byelile lezvaku ku na ni kungazwanani cikari ka n’wina, vamakabye va mina. 12 Ndzi wulawula hi lezvi mu wulako zvaku: “Mina ndzi wa Pawule”, “Mina ndzi wa Apolosi”,+ “Mina ndzi wa Khefasi”,* “Mina ndzi wa Kristu”. 13 Kasi Kristu i no avanyeka ke? Loyi a nga dawa mhandzeni hi kota ya n’wina kova Pawule ke? Kutani mu no bhabhatiswa hi vito ga Pawule? 14 Ndza mu bonga Nungungulu hi lezvi ndzi nga kala ku bhabhatisa munhu cikari ka n’wina, saseka Krispusi+ na Gayusi,+ 15 kasi ku ngavi na loyi a wulako lezvaku i bhabhatiselwe vitweni ga mina. 16 Ina, ndzi bhabhatisile kambe ni va ka Stefanasi.+ Kanilezvi n’wina van’wani a ndzi zvi tivi ku i kona ndzi nga mu bhabhatisa. 17 Hakuva Kristu a nga ndzi rumangi ku famba ndzi bhabhatisa, kanilezvi i ndzi rumile ku famba ndzi kanela mahungu ya manene;+ na ndzi nga kaneli hi wutlhari ga magezu kasi a mhandze ya hlomulo* ya Kristu yi ngavi leyi yi nga vhuniko nchumu.

18 Hakuva a ku wulawula hi mhandze ya hlomulo* wupumbu ka lava va lovako,+ kanilezvi ka hina lava hi ponisiwako i ntamu wa Nungungulu.+ 19 Hakuva ku tsalilwe ku ngalo: “Ndzi ta fuvisa a wutlhari ga titlhari, ndzi ala a wutivi ga lava vo tiva.”+ 20 Yi kwihi a tlhari? I kwihi a mutsali?* Ti kwihi a titlhari ta filozofiya ta tiko legi?* Xana Nungungulu a nga mahangi a wutlhari ga tiko legi giva wupumbu ke? 21 Hakuva kota lezvi Nungungulu a tlharihileko, a tiko gi no tsandzeka ku mu tiva+ hi wutlhari ga gona.+ Hikwalaho, Nungungulu i no xalaliswa hi ku ponisa lava va kholwako hi wupumbu+ ga lezvi zvi kanelwako.

22 Hakuva a vaJudha va kombela zviwoniso,+ a vaGreki va hlota wutlhari; 23 kanilezvi hina hi kanela hi Kristu loyi a delweko laha mhandzeni, loyi a nga cikhunguvanyiso ka vaJudha, ni wupumbu ka matiko.+ 24 Hambulezvo, ka lava va vitanilweko, a vaJudha ni vaGreki, Kristu i ntamu wa Nungungulu ni wutlhari ga Nungungulu.+ 25 Hakuva a cilo ca wupumbu ca Nungungulu ci tlharihile ku hundza vanhu, ni cilo ca gome ca Nungungulu ci na ni ntamu ku hundza vanhu.+

26 Wonani hi kuvitaniwa ka n’wina, vamakabye, lezvaku a nga vitanangi a votala va tlharihileko hi ka nyama,*+ ne votala va ntamu hambu votala va humako mingangweni ya wuhosi,*+ 27 kanilezvi Nungungulu i hlawulile a zvilo zva wupumbu zva tiko kasi a va wisa tingana lava vo tlhariha, niku Nungungulu i hlawulile a zvilo zva gome zva tiko kasi a zvi wisa tingana lezvi zva ntamu.+ 28 Nungungulu i hlawulile a zvilo zvi nga nyawuliko zva tiko, lezvi zvi chepetiwako, ni lezvi zvi nga hiko nchumu kasi a fuvisa lezvi zvi nga zva nchumu,+ 29 kasi ku ngavi na munhu* a ti kulisako mahlweni ka Nungungulu. 30 Kanilezvi n’wina mu ka Kristu Jesu hi kota ya yena. Ka hina, Kristu wutlhari ga Nungungulu, ni kululama,+ ni kubasiswa,+ ni kutlhatlhiswa hi hakhelo ya kutlhatlhisa,+ 31 kasi ku maheka lezvi zvi tsalilweko, zvaku: “Loyi a ti kulisako i wa ti kulise hi Jehovha.”*+