Isaya
17 A ciphrofeto ca ku vhukela Dhamasku:+
“Hi nga wonani! Dhamasku a nga ta hava dhoropa,
I tava nhulu ya maribye.+
2 A madhoropa ya Arowera+ ma ta tsikiwa;
Ma tava wutshamu ga ku etlela mitlhambi,
Na ku nga hi na wa ku yi dzukisa.
3 A madhoropa ma vhikelweko khwatsi ma ta nyamalala le Efrayime,+
Ni mufumo wu ta nyamalala le Dhamasku;+
A misalela ya Siriya
Yi ta fana ni wudzundzo ga vaIzrayeli”,* ku wula Jehovha wa mabutho.
4 “Ka siku lego, a wudzundzo ga Jakobe gi ta hunguleka,
Ni miri wakwe wu hanyako khwatsi wu ta wondza.*
5 Zvi ta fana ni loku a mutshoveli a tshovela timbewu,
Ni woko gakwe gi tshovela tihlanga ta timbewu,
A ku khwatsi hi loku a munhu a tshovela timbewu Nkoveni wa Refayime.+
6 Ku ta sala a timbewu ta ku kutsula basi,
A ku khwatsi hi loku a sinya ya olivha yi phophiwa,
Ku sala ntsena maolivha mambiri kutani manharu ka dhavi ga le madembeleni,
Ku sala ntsena mune kutani ntlhanu wa maolivha lomu ka madhavi ma chelileko nguvhu”,+ ku wula Jehovha, a Nungungulu wa Izrayeli.
7 Ka siku lego, a munhu i ta cuwuka a Mumahi wakwe, ni matihlo yakwe ma ta cuwukela Loyi a Basileko wa Izrayeli. 8 A nga ta cuwuka a maalati,+ a ntiro wa mandla yakwe;+ niku a nga ta cuwuka lezvi zvi mahilweko hi titiho takwe, kani tisinya to basa* kutani maalati yo hisela kona libani.
9 Ka siku lego, a madhoropa yakwe ma vhikelweko khwatsi ma ta fana ni rumbi gi nga lomu khwatini,+
A ku khwatsi i dhavi gi tsikilweko mahlweni ka vaIzrayeli;
Ma tava ciwula.
10 Hakuva u rivele a Nungungulu+ wa kuhanyiswa ka wena;
A wu alakanyangi a Ribye+ ga khokhola ga wena.
11 Ni hlikanhi, u bhiyela khwatsi a simu ga wena,
Ni mixo, u milisa a mbewu ya wena,
Kanilezvi a tshovelo wu ta n’walala sikwini ga mababyi ni ga kubayisa ku nga tiriwiko.+
12 Hi nga zwani! Ku na ni gujeguje ya mifumo yo tala,
Leyi yi vangako guwa go khwatsi mabimbi!
Ku na ni gujeguje ya matiko
Leyi a guwa ga kona gi nge khwatsi kudzindza ka mati ya ntamu!
13 A matiko ma ta vanga guwa go khwatsi kudzindza ka mati yo tala.
I ta ma kawuka, niku ma ta tsutsuma maya kule,
Ma hangalaswa a ku fana ni mungu* wu kukuletwako hi moya lomu zvitsungeni,
A ku khwatsi tisinya to woma ti kokiwako hi cingulo.
14 Laha gi phumako, ku na ni kuchava;
Gi gica na ma nga ha hi kona.
Leci ciavelo ca lava va hi wutlelako zva hina
Ni nchachazelo wa lava va hi phangako.