Isaya
27 Ka siku lego, hi cipadha cakwe co kariha, ca hombe, ni ca ntamu,+
Jehovha i ta alakanya Levhiyatani,* a nyoka yo tsutsuma,
Levhiyatani, a nyoka ya kuya hi ku ndzundza,
Niku i ta daya cingondzomu ca lomu bimbini.
2 Ka siku lego, yimbelelani kakwe,* muku:
“A civhina* ci humesako a vhinyo yo pupuma!+
3 Mina Jehovha hi mina muhlayisi wa cona.+
Contlhe cikhati ndzi ci chetela mati.+
Ndzi ci wonelela wusiku ni mumu
Kasi ku ngavi ni wa ku ci wonhetela.+
4 A ndza ha zangarangi.+
Himani a tolwa na mina hi makhuho ya mimizwa ni nyasavari yimpini ke?
Ndzi ta va kandzihetela ndzi va hoxa zvin’we ndzilweni.
5 Loku zvi nga hi lezvo, i wa tsutsumele khokholeni ga mina.
I wa mahe kurula na mina,
Ina, i wa mahe kurula na mina.”
6 Ka masiku ma ha tako, Jakobe i ta mila mutsu,
Izrayeli i ta hluka a pfepfa;+
Va ta tata tiko hi mihandzu.+
7 Xana i ta biwa hi cibhakela ca loyi a mu bako ke?
Kutani i ta dayiswa ku khwatsi hi lezvi va nga dayiswa zvona a vadelweko vakwe?
8 U tava ni timhaka ni tiko legi niku u ta gi hlongola hi guwa ga kuchavisa.
I ta gi hlongola hi kubuvheta ka ntamu sikwini ga moya wa cikobani.*+
9 Hikwalaho, a ciwonho ca Jakobe ci ta tsetselelwa;+
Lowu wu tava wona a handzu wakwe laha a ciwonho cakwe ci to susiwa:
I ta maha ku a maribye wontlhe ya alati
Ma fana ni maribye ya mhemba* ma fayetelweko;
Ku nga ta sala sinya yo basa* hambu alati go hisela kona libani.+
10 Hakuva a dhoropa gi vhikelweko khwatsi gi ta maha ciwula,
Ni wuriselo gi ta rivaliwa gi tsikiwa a ku khwatsi ciwula.+
A cihon’wana ci ta gela kona ci etlela lomo,
Ciga a madhavi ya kona.+
11 Laha a zvidhavana zvakwe zvi to woma,
Ku tata vavasati va ta zvi tshova,
Va dzivela hi zvona ndzilo.
Hakuva a vanhu lava a va zwisisi.+
Hikwalaho, a Mumahi wabye a nga ta va mahela wuxinji,
Ni Loyi a va vangileko a nga ta va kombisa tipswalo.+
12 Ka siku lego, Jehovha i ta phopha mihandzu kusukela nongeni wa Congo* zvi famba kala le Nkoveni wa Gibhite,+ niku mu ta hlengeletana hi mun’we mun’we, n’wina vanhu va ka Izrayeli.+ 13 Ka siku lego, ku ta biwa a linanga* la hombe;+ lava va lovako le tikweni ga Asiriya+ ni lava va hangalakileko tikweni ga Gibhite+ va tata va ta khizama ka Jehovha citsungeni co basa lomu Jerusalema.+