Isaya

36 Hi lembe ga wu 14 ga kufuma ka hosi Hezekiya, Senakeribhe, a hosi ya Asiriya,+ i no kandziha a ta dhumela a madhoropa wontlhe ma vhikelweko khwatsi ya Judha, a ma teka.+ 2 Andzhako ka lezvo, a hosi ya Asiriya yi no rumela Rabxake*+ hi le Lakixe+ aya ka hosi Hezekiya le Jerusalema na a hi ni butho ga hombe. Va no ya yima kusuhani ni nonga wa citivana ca le hehla,+ leci ci nga laha ndleleni ya simu ga muhlazvi.+ 3 Makunu Eliyakimu,+ a n’wana wa Hilkiya, loyi a nga wonelela a yindlu,* na Xebna,+ a matsalani, na Jowa, a n’wana wa Asafa, a muhlayisi wa timhaka, va no huma vaya kakwe.

4 Hikwalaho, Rabxake i te ngalo kabye: “Byelani Hezekiya, muku: ‘A hosi ya hombe, a hosi ya Asiriya, yi ngalo: “Wo tsumba yini ke?+ 5 U ngalo: ‘Ndzi na ni tipulani ni ntamu wa kulwa yimpi’, kanilezvi a magezu lawo a ma vhuni nchumu. Wo tsumba mani a kuza u tiya a ku ndzi vhukela?+ 6 A! U tsumba ku vhuniwa hi Gibhite, a lihlanga lo pandzeka, leli li tlhavako a canja ga loyi a ti seketelako ka lona. Faro, a hosi ya Gibhite, i maha lezvo ka vontlhe lava va mu tsumbako.+ 7 Loku u ndzi byela ku: ‘Hi tsumba Jehovha, a Nungungulu wa hina’, a hi yena loyi a matshamu yakwe yo tlakuka ni maalati yakwe ma susilweko hi Hezekiya,+ na a byela Judha ni Jerusalema, aku: ‘Mu ta khizama ka alati legi’ ke?”’+ 8 Makunu maha bheja ni hosi ya mina, a hosi ya Asiriya:+ Ndzi ta ku nyika a 2000 wa mahaxi loku u kuma a vanhu vo enela ku khilela a mahaxi lawo. 9 Hambu a govhernadhori loyi wa mutsongwani cikari ka malandza ya hosi ya mina u wa ta mu hlongolisa kuyini, kuveni u tsumba Gibhite lezvaku a ku nyika tikareta ni vakhileli va mahaxi? 10 Kasi a hi Jehovha a nga ndzi ruma kuta ndzi talwa ni tiko legi ndzi gi lovisa ke? Jehovha hi yena a nga ndzi byela, aku: ‘Kandziha u yalwa ni tiko legi u gi lovisa.’”

11 Makunu Eliyakimu, na Xebna,+ na Jowa va no byela Rabxake,+ vaku: “Wulawula ni malandza ya wena hi lirimi la ciAramaiko,*+ hakuva ha li tiva; u nga wulawuli na hina hi lirimi la vaJudha na zvi zwiwa hi vanhu lava va nga le hehla ka muro.”+ 12 Kanilezvi Rabxake i te: “Kasi a hosi ya mina yi no ndzi ruma a ku ta wula a timhaka leti ka hosi ya wena ni ka wena basi ke? A yi ndzi rumangi ku ta wula timhaka leti ni ka vanhu lava va tshamileko le hehla ka muro, lava va toga a macimba yabye va tlhela vanwa a mixixito yabye zvin’we na n’wina ke?”

13 Hi kulandzela, Rabxake i no suka a kanyuluka hi gezu ga hombe hi lirimi la vaJudha,+ aku: “Hi nga zwani a mhaka ya hosi ya hombe, a hosi ya Asiriya.+ 14 A hosi yi ngalo: ‘Mu nga tsiki Hezekiya a mu kalavela, hakuva a nga ta zvi kota ku mu tlhatlhisa.+ 15 Mu nga tsiki Hezekiya a mu kucetela ku tsumba Jehovha,+ aku: “Hakunene Jehovha i ta hi tlhatlhisa, niku a dhoropa legi gi nga ta nyikelwa canjeni ga hosi ya Asiriya.” 16 Mu nga ingisi Hezekiya, hakuva a hosi ya Asiriya yi ngalo: “Mahani kurula na mina mu ti nyikela;* a mun’we ni mun’wani wa n’wina i taga a mihandzu ya vhina* wakwe ni mihandzu ya nkuwu wakwe, anwa a mati ya hlowo yakwe, 17 kala ndzita ndzi ta mu teka muya ka tiko go fana ni legi ga n’wina,+ a tiko ga timbewu ni vhinyo yiswa, a tiko ga tipawa ni zvivhina.* 18 Mu nga tsiki Hezekiya a mu kanganyisa, aku: ‘Jehovha i ta hi tlhatlhisa.’ I kona nungungulu cikari ka vanungungulu va matiko a nga tshuka a tlhatlhisa a tiko gakwe canjeni ga hosi ya Asiriya ke?+ 19 Va kwihi a vanungungulu va Hamate ni Arpadhe?+ Ahati a vanungungulu va Sefarvhayime,+ va kwihi? Va zvi kotile ku tlhatlhisa Samariya canjeni ga mina ke?+ 20 Himani cikari ka vanungungulu vontlhe va matiko lawa a tlhatlhisileko a tiko gakwe canjeni ga mina, laha ka kuza Jehovha a tlhatlhisa Jerusalema canjeni ga mina ke?”’”+

21 Kanilezvi va no miyela; a va mu hlamulangi nchumu hakuva a hosi yi wa layile, yiku: “Mu nga mu hlamuli nchumu.”+ 22 Makunu Eliyakimu, a n’wana wa Hilkiya, loyi a nga wonelela a yindlu,* na Xebna,+ a matsalani, na Jowa, a n’wana wa Asafa, a muhlayisi wa timhaka, va no wuya ka Hezekiya na va handzulile a tinguwo tabye va ta mu byela a timhaka ta Rabxake.